¿Nibaaka chi Diablo?
Chi Bibliaba panau ɓuu
Maka ɓuma, chi Diablo nima, ichi ángel biʼia nimina ɓoapeɗa Jeowa ɓuiɗa baɗa. Ichi joma nau iujãa uru kuɓuu (Juan 14:30; Efesios 6:11, 12). Bibliaba diwara trʉ̃ jara kuɓua kawabii baita ichi saka nia:
Satanás abadauba “Jeowa iadaa ãrĩã nii” (Job 1:6).
Diablo abadauba “Atua jarabarii nii” (Apocalipsis 12:9).
Chi dama, besɗe Bibliaɗe chi dama jara ɓuuba chi niiba engañabarii nii (2 Corintios 11:3).
Chi kũruapeɗa kachirua asebiabarii (Mateo 4:3).
Chi setaa jarabarii (Juan 8:44).
Ne kachirua ʉ̃rũbena jarabudauɗe Diabloɗebenadu jaraɗawẽe
Chi nureeba ijãabadau chi Diablo dachi aɓaaɓaara kakuaɗe eɗa nibabarii, maaɗaba jarabadau Dachi Akõreɗe eɗa biɗa nii, mau maka ɓuuwẽma. Bibliaɗe jara ɓuu chi Diablo Dachi Akõre ome beɗeaɗa. Maka ɓumina Dachi Akõreba jipa ɓuudu ase nia, kachirua asekau. Maka niibʉrã, ¿Diablo ichiɗe nika? (Deuteronomio 32:4; Job 2:1-6). Bibliaba jara ɓuu Diabloba Jesús kũrua ne kachirua asebi ɓoosii (Mateo 4:8-10; 1 Juan 3:5). Bibliaba biʼia kawabi ɓuu Diablo biawãra nima.
Ẽbẽrarã aribiaurãba kʉ̃risiabadau Diablo biawãra niiwẽe. Bibliaba jara ɓuu Satanasba dachi kũruapeɗa kachirua asebibarii (2 Tesalonicenses 2:9, 10). Ichia ãrĩã asebarii ẽbẽra ichi niiwẽe kʉ̃risiabii baita (2 Corintios 4:4).
Chi ãyaa kʉ̃risia duanuu waabenarã ẽbẽrarãba Diablo ʉ̃rʉbena
Chi nureeba ãyaa jarabadau: Chi Diablo siɗa Lucifer abadau.
Chi ariɗe ɓuu: Chi ɓee Bibliaɗe jara ɓee chi beɗea “Lucifer” abadau teɗechoa kuɓuu kĩraka ɓuu jara ɓuu (Isaías 14:12). Bibliaɗe teɗechoa kuɓuu kĩraka a ɓuuɗe profecía Babiloniaɗebena jara ɓuu, warrarã rey Babiloniaɗebenamaa mechibena nureapeɗaaɗa baɗa ẽebariyua ne kachirua asebachiɗauɗeeba (Isaías 14:4, 13-20). Nau pasasiiɗe Bibliaba jara ɓuu teɗechoa kĩraka ɓuu ãchiɗebena ʉiɗayua.
Chi nureeba ãyaa jarabadau: Diabloba Dachi Akõre baita trajabarii.
Chi ariɗe ɓuu: Diabloba Dachi Akõre iadaa niiɗeeba ichi baita traja ɓuuwẽe. Ichi Dachi Akõre baita traja nureerã iadaabarii nii mauɗeeba ichia ãchiɗebena atua jarapeɗa mauɗe ida jaradeabiwẽe Dachi Akõreɗebena (1 Pedro 5:8; Apocalipsis 12:10).