JOMA ẽbẽrarã ãchi culturaɗe mauɗe religionɗe ʉtaa wiɗi panuu. Barikiau lukarmaa —iglesiarã, sinagoga, mezquita, pagoda maebʉrã santuario abadaurãmaa— maabea ãchia rosario, camándula, tablilla mauɗe cilindro abadau ome ʉtaa wiɗibadaa.

Nama iujãaɗe joma barau tãeɗe ẽbẽrarãdu ãrĩã ʉtaa wiɗii nurea. Ara jãka animararã kĩra, dachirãba chiko kodayu, bania, mauɗe ʉ̃yabaɗai nesita nurea. Mauɗe dachirã, naseɗapeɗa, wariɗapeɗa mauɗe biubadaa (Eclesiastés 3:19). Maamina, ¿sakayua ẽbẽrarãdu ʉtaa wiɗi nurea?

Dachia nesita panuuɗeeba. Ʉtaa wiɗiburu kĩrabara pana dachiɗeeba mauɗe chi Dachi Akõre baita kuɓuu kĩra ɓuu; jãra kĩrabara chi aude jayoaswẽe ɓuu mauɗe biuwẽe ɓuu kĩra ɓua. Bibliaba jara ɓuu mau dachia aude nesita panuu (Eclesiastés 3:11). Jesusba naka asia: “Chi kuitaa duanuu ãchia nesita panuu kawaɗai Dachi Akõre ʉ̃rʉbena kĩrajʉʉ nurea” (Mateo 5:3).

Chi Dachi Akõre jʉ̃kaa duanaɗa kʉ̃ria panuuɗeeburu ẽbẽrarã ãrĩãdu ãchi temploɗaa wãuribadaa ãrĩã wiɗiɗe wãɗayua mauɗéburu ãchia ne joma baraa ua duanua deeɗaa mama aria maumaa wiɗiɗai baita mauɗeeba tiempo ãrĩãdu. Chi nuree ẽbẽrarãba mauɗeeba waabenarã ẽbẽrarãmaa aiɗaɗai baita wiɗibadaa. Ẽbẽrarã ara ãchi ãstuburu bereka panuu chi ãchia nesita panuu deayua. Maamina ẽbẽrarã biubaribadau mauɗe biʼia kawaɗawẽa saka ɓua nau iujãaɗe. Aɓaburu nii chi kuitaa ɓuu mauɗe waaburu nibaɗe wãsiiɗe biuwẽa, mauɗe poder ãrĩã bara nii, ichiaburu dachimaa deɗeka ɓuu dachirãba nesita panuu. Maamina, ¿sakayua nesita panaa ʉtaa wiɗiɗayu?

Nauɗe kʉ̃risiaba, ¿bichia aɓabenaba aiɗayu mauɗe beɗea biarã ariɗe jaradeayu nesita ɓue maabea unuwẽa ɓue? Dachirã problema baraa duanuu maebʉrã deɗabena biubariburuuɗe, mauɗe dachia kawa kʉ̃risiaɗayu kosarã aseɗai naeɗe mauɗe pekao choroma asebudauɗe, ¿bichi konsejo biarã nesita ɓuuɗe mauɗe waaburu beɗea biʼia ãrĩãdu jarapeɗaaɗaɗe bichi baita ara maka wãʼãe ɓuu senti ɓuka?

Chi Biblia arikʉɗe nauɗebena biʼia jara ɓuu jãuba jara ɓuu ʉtaa wiɗiiruuba ãrĩã aiɗa ɓuu dachia jãka kʉ̃risiabudauɗe. Maubapeɗa Bibliaɗe jara ɓuu mukĩrarã wẽrarã baara ãrĩãdu jipa kiruree asepeɗaaɗaba ʉtaa wiɗipeɗaaɗabaɗa ãchi kĩrachuburiaɗayua, konsejo bia deaɗayua mauɗe perdón wiɗiɗayua, mauɗe panauɗayua ãchia wiɗi ɓee kakua (Salmo 23:3; 71:21; Daniel 9:4, 5, 19; Habacuc 1:3).

Jomaurãba naka ʉtaa wiɗisiɗau araɓau kuitaa panasia. Ãchi beɗea ũriɗayua ãchia kuitaa panasia kaimaa wiɗiɗaiba.

IƊIBEA, ãrĩã ẽbẽrarãba wiɗiɗai kawaɗawẽe kaimaa wiɗiburuu, ãchia ijãa duanuuɗeeba chi wiɗibudau Dachi Akõremaa nee ɓuu aɗapeɗa. Mauɗe ara jãka kʉ̃risia duanuu ẽbẽrarãba religión joma araɓaudu duanuu aɗapeɗa. Maamina ¿mau makabaka?

Dachi Akõre Beɗeaba jaradea ɓuu ãchia ʉtaa wiɗibudau jãra chi ariɗe niiwẽemaaburu jara panuu. Yataɗeeɗa chi Biblia ɓʉsiɗauɗe, ẽbẽrarãba santorãmaaburu wiɗibachidau. Maamina Dachi Akõreba ichi puurumaa ãrĩã jarasii jãka aseebai baita. Salmo 115:4-6ɗe jara ɓuu chi santorã “kʉʉrʉ bara duanumina, maamina ũriɗawẽe”. Makarã, ¿kãarea wiɗiɗai jãu dios ichia dachi beɗea ũrikaumaa?

Naeɗebena waaburu kawaɗayua chi profeta jipa nibaɗa Elías ʉ̃rʉbena, ichia ʉtaa wiɗibi ɓoosii chi sacerdoterã Baalɗebenarãmaa ãchi diosmaa: Eliasba ʉtaa wiɗiburua ichi Akõremaa maamina chi sacerdoterãba Baalmaa wiɗibudaa, chi panauburuuba unubibasia kai chi Akõre ariɗe nii. Chi profetarã Baalɗebenarãba maka aseɗai jarasiɗaa, maabea ãchia wiɗi kopaneesiɗaa. “Ãrĩãdu ãchia wiɗisiɗaa maamina, ni aɓa biɗa poyaa panauubasia, akawa ũriɗaabasiɗau” (1 Reyes 18:29). ¿Ara jãka pasasaka Elías ome?

Makawẽe basia: ichia ara naka ʉtaa wiɗi koɓooɗabaɗaɗe, Dachi Akõreba ʉtʉareba auko ɓaebisia chi ãchia deasiɗau ʉ̃rʉ. ¿Sãu ãyaa ɓoosama? Chi panau ɓuu chi Eliasba ʉtaa wiɗiɗaɗe, mau unu panua 1 Reyes 18:36, 37ɗe. Ichia ʉtaa wiɗisiiɗe ɓaʼãraburu beɗearã 30 hebreoɗe ɓoosia, maamina 3 veces chi trʉ̃ Jeowa aɗabasii.

¿Sakayua jãu biʼia ãrĩã ɓoosia? Kawa kuitaa baraaɗai chi beɗea Baal (mara “chi chibari”) jãu basii chi trʉ̃ chi dios cananeorãɗe maabea jau trʉ̃ puuru ɓuucha kambia kĩra ɓuu. Maamina, Jeowa trʉ̃ra ara aɓa kirua, jãu trʉ̃ra aɓa Nii baita nau universoɗe ira ɓua. Ara ichia jaraɗabasia: “Mʉ Jeowa. Mau mʉ trʉ̃; mauɗe chi mʉʉɗe kĩrawãrea ãrĩã ɓuu junebenamaa deawẽa” (Isaías 42:8).

Makarã, ¿chi ʉtaa wiɗisii Eliasba mauɗe chi profetarã Baalɗebenarãba wiɗipeɗaaɗa aɓa nii diosmaaburu neesaka? Makawẽe basia. Baal kʉ̃riapeɗa ũriyu unubiyua ẽbẽrarã kena panasii, mauɗe prostitución abadau ase panasii, mauɗe jãka ɓee kĩrabara jayoabidu mauɗe chi miadaa ɓuu asebi panasia ẽbẽrarãmaa. Maamina Jeowa kʉ̃riapeɗa ũriyua miadaa aseɗakabasia bari torroa kiruu kĩra ɓoosii. Jãuba ariɗe unubi ɓua chi ʉtaa wiɗisii Baalmaa poyaa neebasii. Jari araɓau ẽbẽra amiko biamaa karta dea ɓueruu, madu chi karta kĩrabara ẽbẽra kachiruamaa neeruu kĩra.

Chi Jeowamaa ʉtaa wiɗi duanuu, ãchiara wiɗi panuu chi joma iujãaɗe barau Wauɗamaaburu, chi Akõre joma ẽbẽrarãɗe.a “Bichi, Jeowa dai Akõrebʉ”, jãu jarasia chi profeta Isaiasba ichia ʉtaa wiɗisiiɗe (Isaías 63:16). Jesusba ichi ʉ̃rʉbena jarasii ichi kaaɗe ãda nureerãmaa asiiɗe: “Mʉ ʉtaa wãaruu mʉ Akõremaa mauɗe jãu machi Akõrebʉ mauɗe ichi mʉ Dios mauɗe machi Diosbʉ” (Juan 20:17). Makarã Jeowa Jesús Akõre ɓuubʉrã, maabea jãkara ara ichimaa Jesusba ʉtaa wiɗiɗabasia, mauɗe ichi kaaɗe ãda nureerã biɗa wiɗi panasia (Mateo 6:9).

Maamina ¿chi Bibliaba Jesús, María, santorã maebʉrã angelerãmaa wiɗiɗai baita jara ɓue? Makawẽe. Bari Jeowamaaburu wiɗiɗayu. Kawásturu omeɗebena. Aɓa, ʉtaa wiɗiiruu ara jãka Jeowa kʉ̃riapeɗa ũriyu ɓuu, Bibliaba jara ɓuu dachirãba Jeowadu kʉ̃riapeɗa ũriɗayua (Éxodo 20:5). Ome, Jeowaburu dachia “ʉtaa wiɗibudau Ũribarii nii bẽrã” (Salmo 65:2). Jãma jara ɓuu kĩra, Dachi Akõreba ãrĩãdu ida bʉisii waabenarãba aseɗayua, maamina aɓabenamaa chi dachia ʉtaa wiɗiiduu ũkuru ũribikau, ichi ara aɓaburu ũri nii.

Makarã, dachia ʉtaa wiɗiɗai baita ichimaaburu ase baraaɗai. Chi Bibliaba jara ɓuu: “Ẽbẽraba Jeowa trʉ̃ jara niibʉrã jãarã kareba ɓeeɓua” (Hechos 2:21). ¿Mauba jara kʉ̃ria ɓue ichia joma ʉtaa wiɗiɗakare ũri ɓuu? Makawẽebʉrã ¿kãare maucha ase baraaɗai?

BARIARA chi Bibliaba jarawẽmina, religiorã ãrĩãrãba kawa ochiabadaa saka beɗeaburuuka, saka bari noɓeepeɗa makawẽebʉrã akʉ ɓeepeɗa ʉtaa wiɗiburuuɗe. Maamina Bibliabara jara ɓua kãare aude ãrĩã ɓeeɗebena chi ʉtaa wiɗiiruu ʉ̃rʉbena.

Bibliaba jara ɓua ẽbẽrarã jipa ãrĩã kirureapeɗaaɗa Dachi Akõre ome, ãchia ʉtaa wiɗibudauɗe barikiau druareba asebachiɗaa mauɗe bari noɓeepeɗa makawẽebʉrã akʉ ɓeepeɗa ʉtaa wiɗibachiɗaa. Ɓesesɗe ãchirãbara ʉtaa wiɗibachiɗaa ni beɗea aɓa biɗa jaraɗayua, makawẽebʉrã beɗea jĩwa beɗeabachiɗaa. Chi nuree ãchirãɗebena ʉtaa wiɗibudauɗe ʉtaa ochiabachiɗaa bajãaɗaa maebʉrã boro eɗaa wiɗibachiɗaa. Maamina maarãba juaɗe camándula, santorã, ʉrretratorã uru panakabachia. Ãchirãba ãchi sõɗe sentibudaudu jarabachiɗaa. ¿Sakayua Dachi Akõremaa ãrĩã busta basaa ãchia wiɗibudau?

Ãchirãba ʉtaa wiɗibachiɗau Jeowamaaburu, jãdu chi aude ãrĩã ɓuu dachia kawasiɗau kĩra. 1 Juan 5:14ɗe aɓa maucha jara ɓuu: “Dachirãra arikʉɗe kʉ̃risia duanua, bariara ne joma wiɗibudau adua dachia Jeowamaa ichia busta kuɓuu wiɗibudauɗe, ichia ũri nia”. Mauɗeeba, dachia ʉtaa wiɗibudauɗe ichia ãrĩãdu bustabariiɗebena bayua. ¿Nau kãare jara kʉ̃ria ɓua?

Naa kawa baraaɗai kãare Dachi Akõreba kʉ̃ria ɓuu. Mau baita dachirãba kawa baraaɗai ichi Beɗea. Jeowaba kʉ̃ria ɓuuwẽe dachirã chi kuitaa duanuurã Bibliaɗebena baɗayu. Jeowaba kʉ̃ria ɓuura dachirãba kawaɗayu ichia kãare kʉ̃ria ɓuu dachirãɗebena mauɗe dachia ase bara ɓuuba unubiɗayu (Mateo 7:21-23). Chi dachirãba Bibliaɗebena kawabudau jãdu unubiɗayua dachirãba ʉtaa wiɗibudauɗe.

Dachia Jeowaɗebena mauɗe ichia kʉ̃ria ɓuu ʉ̃rʉbena waaburu kawaɗarã, dachi fe aude chaarea ɓeeyua. Nau ase baraaɗai ichia dachi beɗea ũriyua, mauɗeeba Jesusba naka asia: “Joma ʉtaa wiɗibudauɗe fe baraa duanuurã, audayua” (Mateo 21:22). Fe baraa nibayu jãu jara kʉ̃ria ɓuu ijãaɗayu chi dachia unuɗawẽeɗe, maamina jãu jara kʉ̃ria ɓuuwẽe dachia ijãa nibayu joma dachimaa jarabudauɗe: jãu fe Jesusba jaraɗabaɗaɗebena jara kʉ̃ria ɓuu dachia kuitaa baraaɗai biʼia ijãaɗai baita (Hebreos 11:1). Ariɗe ɓuu dachirãba Jeowa poyaa unuɗawẽe, maamina Bibliaba dachirãmaa ãrĩãdu ariɗe jara ɓuu ichi nii, ichira Dachi Akõre Beɗea ariɗe biawãra jara nii, mauɗe kawa ochia ua ɓuu chi ẽbẽrarã fe baraa duanuuɗe. Dachi Akõre kĩruwẽa dachirãba fe wiɗiɗarã; ichia dea kʉ̃ria ɓuu joma dachirãba nesita panuu (Lucas 17:5; Santiago 1:17).

Biʼia ãrĩã ɓuu kawaɗayu Dachi Akõreba ũriyua Jesusba jaraɗadu waa.“Ni aɓa biɗa Akõremaa neewẽe mʉʉɗeeba” (Juan 14:6). Makarã, Dachi Akõre Warrɗeeburu dachirã chi Dachi Akõre jʉ̃kaa panaɗai ɓua. ¡Mauɗéburu basia chi Jesús kaaɗe ãda nureabariirãmaa ʉtaa wiɗii kawabiasii ichi trʉ̃ɗeeba! (Juan 14:13; 15:16). Maamina, Jesús trʉ̃ ʉtaa wiɗiiruuɗe jarayu, jãuba jara kʉ̃riawẽa dachirãba Jesusmaaburu wiɗimaa panuu. Bari, dachirãba Jesús trʉ̃du adau panuu dachirãra ara kiruma duanuuɗeeba Dachi Akõre ome Jesusɗeeba.

Ɓes aɓa, Jesús kaaɗe ãda nibabariiba nau wiɗisia: “Señor, jaradeɗekas daiba saka ʉtaa wiɗiɗai ɓuu” (Lucas 11:1). ¿Sakayua nau wiɗisaa? Ãchiara ʉtaa wiɗiɗayu kuitaa duanasia. Ãchia wiɗi panasia, kãareɗebena ʉtaa wiɗiɗayu.

ɄTAA WIƊIIRUU ãrĩã, maamina aude apii wiɗi niidu jãdu Jesusba jaradeɗekaɗa: padrenuestrobʉ. Maamina ẽbẽrarãba adua mauba kãare ariɗe jara ɓuuɗebena. Ẽbẽra ãrĩãba noremaacha ãrĩãdu wiɗibadaa chi padrenuestro aɓa ɓuudu, mau kʉ̃risiaɗakau kãare jaramaa ɓuu, maamina jãuwẽe basia Jesusba kʉ̃ria ɓoosii. ¿Sakayua nau kuitaa panaa?

Jãu kuitaa panuu Jesusba jarasii jãu wiɗiiruuɗebena: “Ʉtaa wiɗiiruuɗe, ara aɓa ɓuudu jararãaba” (Mateo 6:7). Jesusba jaraɗa ʉtaa wiɗiiruuɗe aɓaaɓaa beɗea ɓuu jãdu jarawẽe bayu aɗa. Jesusba jaradeaɗabaɗa kãareɗebena ʉtaa wiɗiɗai panua. Mauɗeeba biʼia kawaɗayua chi ʉtaa wiɗi ɓuuɗebena Bibliaba jara ɓuu Mateo 6:9-13ɗe.

“Dachi Akõre ʉtʉ bajãaɗe ɓuu, bichi trʉ̃ ʉ̃rʉbena miadaa jaraɗai idarabirãaba”.

Jesusba jaraɗa ichi kaaɗe ãda nureerãmaa saka ʉtaa wiɗiyu Jeowamaaburu. Maamina ¿sakayua waya ãyaa beɗeaabayu chi trʉ̃ Jeowaɗebena?

Chi naeɗebena chi ẽbẽrarãba ãyaa jarakuasiɗauɗeeba chi Jeowa trʉ̃ɗebena. Chi enemiko, Satanasba Jeowa ʉ̃rʉbena jarasii ichi setaa ãrĩã nii, kachirua ãrĩã nii mauɗe ichia ẽbẽrarã poyaa kobernaabai nii (Génesis 3:1-6) . Chi Satanás jʉ̃kaa nibabadaurãba jara panuu Dachi Akõre chuburiakau aɗabaɗa, dachi ãrĩãdu supribiabarii, chi kachirua asepeɗaaɗabaɗa ara ichia biɗa araɓau kachirua aseyu, mauɗe jarasiɗaa Dachi Akõreba joma wauwẽebaɗa. Chi nureeba chi Dachi Akõre trʉ̃ ẽekuapeɗaaɗabaɗa Bibliaɗebena mauɗe idarabiɗakau chi ẽbẽrarãba jãu jaraɗayua.

Maamina, Bibliaɗe jara ɓuu Dachi Akõreba akabayua jãu joma (Ezequiel 39:7). Mauɗe Dachi Akõreba jãu akababuruuɗe chi problemarã ẽbẽrarãɗe biɗa akabayu. ¿Nau saka aseiba? Jesusba naka jaradeɗekasii.

“Neebis bichi Kobierno”.

Iɗi ẽbẽrarãba jaradeɗeka panuu religionɗebena ãchia adua nurea kãareba Dachi Akõre Kobierno. Jesús nibasiiɗe jãka pasakabasii. Chi judiorãba biʼia kawabachiɗaa chi profesiarã jarabachiɗau chi karebabarii ʉ̃rʉbena Dachi Akõreba Jʉrʉɗabaɗa, ichiaburu jaradeɗeka koɓeeyu chi Karebakuayu nau iujãaɗebena (Isaías 9:6,7; Daniel 2:44). Cha nau Kobiernoba aseburuu biʼia chi trʉ̃ Jeowaɗe biʼia jaraɗayua, mauɗe unubiyu joma chi setaa jaraɗabaɗa Satanasba, akabayu chi Diabloba jari ichia ase kuɓuuɗebena. Makarã, chi iujãaɗebena akabayu chi kerra, ẽpermabadau, jarrbisia duanaɗa mauɗe biubadau siɗa (Salmo 46:9; 72:12-16; Isaías 25:8; 33:24). Mauɗéburu ʉtaa wiɗiburuuɗe Dachi Akõre Kobierno neebiɗayua, jãmaburu wiɗi kopanuu joma chi Dachi Akõre Kobiernoɗe mau kumpliyua chi Dachi Akõreba dachimaa deɗekai aɗa.

“Bichia kʉ̃ria ɓuu ara jãka ʉtʉ bajãaɗebena kĩra, nama iujãaɗe asebiba”.

Cha naarã beɗeaburu kumpliyu ichia deayu jara ɓuu nau iujãaɗaa, jãka jari kumplisii kĩra bajãaɗe, jãma Dachi Akõre ɓoobariiɗe, naka pasasia Jesusba kanasiiɗe chi Satanás mauɗe ichi ome nureabarii baara dua ɓuekasiiɗe iujãaɗaa (Apocalipsis 12:9-12). Cha nau beɗea, araɓau ɓuu nabena beɗea kĩra, dachia kʉ̃risiabi ɓuu nauba chi Dachi Akõreba kʉ̃ria ɓuu jãra aude biʼia ɓuu dachia ase kʉ̃ria ɓuuɗeeba. Mauba Dachi Akõreba kʉ̃ria ɓuu biʼia ãrĩã ɓuu chi waukaɗaɗebena. Jesús jipa nibasimina naa jarasii: “Mʉa ase kʉ̃ria ɓuu asebirãaba, bari bichia kʉ̃ria ɓuudu asebiba” (Lucas 22:42).

“Iɗi daimaa chiko deaba”.

Jesusba jarasii wiɗiɗai ɓuu iɗi dachia nesita panuu. Jãuɗéburu biʼia ɓuu wiɗiɗayu Dachi Akõremaa noremaacha chi dachia nesita panuu. Jãu ase panuuɗe kawa panuu “Jeowaba dachi chokaebipeɗa chaareabipeɗa mauɗe joma dachia nesita panuu deai ɓuu” (Hechos 17:25). Bibliaba jara ɓuu ichi Akõreka ɓuu chi kʉ̃ria ãrĩã nii, mauɗe ichia dea kʉ̃riabarii chi warrarãmaa ãchia nesita duanuuɗebena. Maamina ãrĩã wiɗiibʉrã chi biʼiswẽe ãchirã baita, ichia poyaa deaabai ɓuu.

“Perdonaba chi pekao ase panuu”.

¿Dachirãba kãare paaɗaiba Jeowamaaa? ¿Sakayua nesita panua Jeowaba perdonayua? Chi ẽbẽra ãrĩãba jãuɗe ijãaɗakamina chi pekao abadau jãu kachirua ãrĩã ɓuu, jãuburu dachi miadaa asebi ɓuu, chi pekaoba dachi baita ãrĩã miadaa ɓuu dachi biubarii kĩra. Joma dachirã pekao baara nasesiɗau bẽrã, chi miadaa ɓuu ãrĩãdu ase nuree chi Dachi Akõremaa bustakau. Jãuɗéburu, dachi biuɗawẽa nureaɗai kʉ̃ria panuubʉrã, biʼia ãrĩã ɓuu Dachi Akõreba dachirã nau perdonayua (Romanos 3:23; 5:12; 6:23). Jãuɗéburu chi Bibliaba jara ɓuu Jeowa biʼia ãrĩã kiɗii mauɗe dachi perdona kʉ̃ria ɓuu (Salmo 86:5).

“Kachiruaɗebena karíbaɗe”.

Dachirãba nesita duanuu Dachi Akõreba dachi isa aiɗayua. Ẽbẽra ãrĩãba ijãaɗakau wãrabenaɗe “jʉbawãe nii”, Satanás. Maka ɓumina Jesusbara ichi wãrabena nii aɗabasia; mauɗe jaraɗabaɗa ichiaburu “cha nau iujãa joma koberna ua kuɓuu” (Juan 12:31; 16:11). Chi jʉbawãe niiba chi miadaa asebipeɗa mauɗe nau iujãa ichiaburu uru ɓuu kʉ̃ria kuɓuu, mauɗe dachi ãyaa ɓee asebii kʉ̃ria ɓuuɗe mauɗéburu ida ɓuɗaabayua dachirã Dachi Akõre, Jeowa jʉ̃kaaburu nibayu (1 Pedro 5:8). Mauɗeebiɗa pera nureaɗaabayua, Dachi Akõredu audeara poder baraa nii mauɗe dachi kʉ̃ria ãrĩã ua nii mauɗéburu karebakuai a ɓuu ichi kʉ̃ria nureerã.

Ãrĩã kãare wiɗiɗai ɓuu Dachi Akõremaa. 1 Juan 5:14ɗe jara ɓuu: “Ne joma wiɗiɗai ɓua ichia bustaaruu, mauɗe ichia dachi ũribaria”. Jãuba jara kʉ̃ria ɓuu, dachirãba Dachi Akõremaa jaraɗai ɓuu chi dachia ãrĩã preokupa ɓuu, mauɗéburu jãu joma ariɗe ɓuu Dachi Akõre baita (1 Pedro 5:7).

¿Saka mauɗe sama wiɗiɗai ɓua dachia? ¿Kãare Dachi Akõre Beɗeaba jara ɓua jãuɗebena? Panauɗayua jãuɗebena uruburuu articuloɗe.

ÃRĨÃ wiɗibadaurã chi religiona ãrĩã nau iujãaɗe jarabadau ẽbẽrarãba sama mauɗe sakaeɗe wiɗiɗayu. Mau, ¿chi Bibliaba araɓau ase ɓue?

Chi Bibliaba jara ɓuura sakaeɗe wiɗiyu. Jesusba ara kiruma aɗa chiko koi naeɗe (Lucas 22:17). Ichi kaaɗe ãda nureerã siɗa ʉtaa wiɗibachiɗau ãchi chibʉrʉsiɗauɗe chi Dachi Akõre ũriɗayua. Jãu ʉ̃rãburu aseyu wãʼãe basii. Jãu asebachiɗau chi sinagoga judiorãɗe mauɗe chi templo Jerusalenɗe, madu kʉ̃ria ɓoosia Dachi Akõremaa “chi ichi de jomaurã wãɗapeɗa ʉtaa wiɗiɗe wãɗayu” (Marcos 11:17).

Chi Dachi Akõremaa ãrĩã bustabachii chi ichi baita trajabadaurã ʉtaa wiɗiɗayua mauɗe jomaurã unibaɗayua aɓa ɓuu kʉ̃risiaɗéburu aseɗai baita chi Bibliaba jara ɓuu kĩra. Jãka ʉtaa wiɗibudauba aiɗai ɓua, jãuburu asei ɓuu chi naeɗeeɗa poyaaɗakabasiɗau (Hebreos 13:18, 19). Mauɗéburu, chi Jeowa ɗebena jaranũrẽrã ãchi chibʉrʉbadau maarã ʉtaa wiɗibadau baita. Bichia ũri kʉ̃ria niibʉrã naka wiɗibudau, wãse chi Jeowa ɗebena Jaranũrẽ De, jãma joma chibʉrʉbadau.

Mauɗéburu chi ora, chi ewari, sama ʉtaa wiɗiyu jara ɓuuwẽe chi Bibliaba. Chi Bibliaba jara ɓuu chi Dachi Akõre baita trajabadaurã ãchia ʉtaa wiɗibachiɗau barikiau parteɗe mauɗe barikiau oraɗe biɗa. Jesusba jaraɗabasia: “Ʉtaa wiɗiburuuɗe, wãse bichi kãiɗe ɓoobariimare, maabea chi poroa jʉ̃atáse, wiɗíse bichi Akõremaa ichira miru ɓuuka ɓua unuɗawẽe; makarã bichi Akõreba paayua” (Mateo 6:6).

¿Mipitaa ãrĩã ɓuuwẽe ʉtaa wiɗiburuu chi Aude mechia ɓuu mauɗe kuitaayu ichia ũribarii barikiau parteɗe nii biɗa? Mauɗéburu Jesús ʉtaa wiɗibachii ichi du aɓa ɓuuɗe. Ɓoobasia aɓa ɓuu ichia ẽsebuɗe joma ʉtaa wiɗii ɓeebachia chi biadu asei naeɗe (Lucas 6: 12, 13).

Mauɗe mukĩrarã wẽrarã ãrĩã jipa nuree yataɗebenarã jãka ʉtaa wiɗibachiɗau ãchi kʉ̃risiaɗe biʼia ɓuu makawẽebʉrã problema baraa kuɓuuɗe. Wiɗiiruuɗe aribia beɗearuu makawẽebʉrã chõpea wiɗiburuu, mauɗe ãchi du aɓa biɗa asebachiɗau, makawẽebʉrã waabenarã ome biɗa, mau chi biʼia ãrĩã ɓoosii chi ʉtaa wiɗibudaudu. Jãuɗéburu Jeowaba jarabarii: “Kapichia ʉtaa wiɗi panábaɗa” (1 Tesalonicenses 5:17). Naka jara nii mipitaa ãrĩã ɓua. Dachi Akõreba kʉ̃ria ɓuu ichimaa wiɗibudau.

Maka ɓumina, nurea ẽbẽrarãba jarabadau chi ʉtaa wiɗiiruu, serbiwẽa ɓuu abadau. ¿Bichia kʉ̃risiabaribaka?

ẼBẼRA ãrĩãrãba kʉ̃risiabadau ʉtaa wiɗiiruu biʼiawẽe ɓuu. Maka ɓumina chi Bibliaba ãyaa jara ɓuu (Lucas 22:40; Santiago 5:13). Chi ʉtaa wiɗiiruuba dachi Jeowa kaita kʉ̃risiabi ɓuu, mauɗe aiɗa ɓuu dachi kĩrajʉʉbipeɗa mauɗe ẽpermawẽa nureaɗayua. ¿Saka aseiba mau?

Jari wãwa chekerãba rekalo adaubadau kĩra, ¿saka aɗaiba ichi Akõrerãba jãka unubudauɗe? Kĩrajʉʉ adauwẽe bari ara kiruma aɗai jãu rekalo kakua, ara kiruma abudauɗe biʼia ãrĩã ɓua. Ara jãka ɓua dachia ʉtaa wiɗibudauɗe Dachi Akõremaa. Kawaɗayua saka biʼia ɓuu chi ɓeerãɗebena ʉtaa Dachi Akõremaa wiɗibudauɗe.

Ʉtaa wiɗiburuu ara kiruma aɗayua. Dachia Dachi Akõremaa ara kiruma abudauɗe jomaurãɗebena, jãuba dachi aiɗa ɓuu kʉ̃risiaɗayua chi biʼia ɓee dachimaa deayuɗebena. Jãu wiɗiburuu kʉ̃risiabibarii ẽbẽrarãmaa ara kiruma ayua mauɗe kĩrajʉʉɗapeɗa maabea chi biʼia ɓuudu kʉ̃risiayua (Filipenses 4:6).

Ara jãu kĩra: Chi Jesús wiɗiburuuɗe ichi Akõremaa ara kiruma ayua ichia ũrisiiɗeeba (Juan 11:41).

Ʉtaa wiɗiburuu perdón wiɗiyua. Dachia Dachi Akõremaa wiɗiburuuɗe biʼia ãrĩã kʉ̃risiabibarii nomaa akʉ ɓeemaaba. Mauba dachi aiɗabarii kʉ̃risiabiyua dachia kachirua aseɗaɗebena maabea jãuba aiɗabi ɓuu dachi waaburu kachirua asebiimaaba.

Ara jãu kĩra: Davidba ʉtaa wiɗisii ichi kʉ̃risia puʼua senti ɓoosiiɗe ne miadaa ase ɓoosiiɗeeba (Salmo 51).

Ʉtaa wiɗiburuu orientabipeɗa kawa kʉ̃risiabiyua. Nauba aiɗabi ɓuu dachi juakaya ãrĩã nibabiimaaba, jãuba dachi kʉ̃risiabi ɓuu dachia ne joma poyaa aseɗaabai ɓuu, jãuburu dachi ãrĩã aiɗa ɓuu ijãa nibabii baita Dachi Akõreɗe, mauɗe ara dachi du aɓaburu ɓuuwẽe (Proverbios 3:5, 6).

Ara jãu kĩra: Salomonba ʉtaa wiɗisii Dachi Akõremaa ichi kʉ̃risia ãrĩã deabipeɗa ichia biʼia jaradea koɓeebiyua chi Israel kobernai baita (1 Reyes 3:5-12).

Ʉtaa wiɗiburuu dachi ãrĩã preokupa nureeɗe. Dachi ãrĩã preokupabadauɗebena, beɗeaburuu Jeowamaa dachi sõ eɗapeɗa mauɗe biʼia ãrĩã kʉ̃risiabii baita. Naka asebudauba kʉ̃risiabi ɓuu Jeowaburu dachi aiɗa ɓuu (Salmo 62:8).

Ara jãu kĩra: Chi ʉtaa wiɗisii rey Asaba karebai baita chi enemiko chaarea niiɗebena (2 Crónicas 14:11).

Ʉtaa wiɗiburuu waabenarã aiɗaɗai baita. Nau serbi ɓuu dachi juakaya nibabiimaaba mauɗe kʉ̃risiaɗai baita waabenarã saka kʉ̃risia duanuu.

Ara jãu kĩra: Jesusba ʉtaa wiɗisiiɗe ichi kaaɗe ãda nureerãɗebena (Juan 17:9-17).

Ʉtaa wiɗiburuu biʼia ãrĩã jaradeayua Jeowaɗebena. Beɗeabudauɗe joma mipitaa ɓuu ase nii Jeowaba mauɗe ichi saka nii, jãuɗeeba dachia kʉ̃ria ãrĩãdu mauɗe ãrĩã respetadayu ichi. Jãka wiɗibudauba Dachi Akõre bajãaɗebena kaita nuree sentibi ɓuu.

Ara jãu kĩra: David Dachi Akõremaa ʉtaa wiɗisiiɗe joma ichia mipitaa ɓuu aseɗabaɗaɗebena jarasia (Salmo 8).

Ʉtaa wiɗibudauɗe adaubadau chi mipitaa ãrĩã ɓeeɗebena: unibadau ɓua “Akõreba biʼia ãrĩã akʉ duanuyua jari ẽbẽra jomaurã nau iujãaɗebenarãba kawaɗawẽa duanuu” (Filipenses 4:7). Dachi biʼia ãrĩã akʉ duanuurã nama nau iujãaɗe jãu biʼia ãrĩã ɓua. ¡Jãu dachi ẽpermaɗawẽa nureai baita biɗa! (Proverbios 14:30.) ¿Saka ara jãka biʼia akʉ duanaɗayua? ¿Dachia bereka ase panuuɗebenaburu, maebʉrã waabena aude nesita panuu?

NAUƊEBENA ẽbẽrarã aribiaurãba ãrĩãdu wiɗibadaa. Dachia unusiɗau kĩra Dachi Akõreba chi ɓee ichimaa ʉtaa wiɗibudau ũribaria, maamina jomaurã wãʼãe bayu. Makarã, ¿ichia dachia ʉtaa wiɗi panuu ũri ɓoabaka? Ichia ũribaria dachia wiɗiburuu ẽbẽra bia kirureerãbʉrã.

Jesusba chi nuree líder religiosorãmaa ichi nibasiiɗe jarasii jãarãba ãyaa ase panuu ʉtaa wiɗibudauɗe: ãchirãba waabenarãmaa unubii kʉ̃ria panasii sakaburu ãchia ʉtaa wiɗi duanasia. Mauɗeeba ichia jarasii jãarãba adausiɗau “chi ãchia wiɗi panaɗabaɗa”. Jãarã religiosorãba Dachi Akõreba ãchi beɗea ũribiɗaabai panasii, bari ẽbẽrarãmaadu unubii kʉ̃ria panasii, mauɗeeba ãchirã jãdu adau panasii (Mateo 6:5). Iɗibea jãu kĩra pasa ɓua. Ẽbẽrarã ãrĩãrãba wiɗibadau Dachi Akõre kʉ̃risiaɗawẽa, bari ãchi du aɓauɗeeburu, maabea ãchia Bibliaba jara ɓuu kĩra ase duanuuwẽe bẽrã, chi nabena articulorãɗe Bibliaɗebena jarasiɗau kĩra, ãchi beɗea poyaa ũriwẽa.

Dachi Akõreba dachia ʉtaa wiɗi duanuu ũri baita aɓa ɓuu razaɗebena maebʉrã aɓa ɓuu iujãaɗebena duanaɗai nesitawẽe, ni chi nejarra ãrĩã baraa nii nesitawẽe siɗa. “Dachi Akõre baita joma araɓaudu kirurea”, Bibliaba jara ɓuu. “Ichia kʉ̃ria ua nia ichi beɗea ũribudaurã mauɗe chi joma biʼia ɓee asebadaurã” (Hechos 10:34, 35). Chi ẽbẽraba ‘Dachi Akõre kʉ̃ria ãrĩã u niiʼ ichia chi kachirua ɓuu Dachi Akõreba bustakau asekaa. Mauɗe ‘chi ẽbẽra jipa asebarii niibaʼ Dachi Akõreba kʉ̃ria ɓuu joma biʼia ase nibabarii, mauɗe ichiaburu kʉ̃ria kuɓuurã asekaa, ni waabenarãba jarabudau asekaa. Dachirãba ʉtaa wiɗibudauɗe Dachi Akõreba ũribiɗai kʉ̃ria panuubʉrã makarã ichi beɗeaɗe jara ɓuu ase baraaɗai.a

Ẽbẽrarã aribiaurãba ʉtaa wiɗi duanuuɗe kʉ̃ria panua Dachi Akõreba milakro aseyua. Maamina, yataɗeeɗa, ichia milakrorã ãrĩã asekabachia. Naeɗe milakro aɓa pasaɗakaaɗe siglo ãrĩãdu pasa basia ara maucha milakro unuɗai baita. Maubapeɗa Bibliaba jara ɓuu chi apostolerã nureaɗabaɗa biupeɗaaɗakare milakrorã akabaɗai basii (1 Corintios 13:8-10). Mauba jara kʉ̃riawẽa Dachi Akõreba dachia ʉtaa wiɗi duanuuɗe ũrikau. Ochiásturu saka Jeowaba panau ɓuu ʉtaa wiɗibudau iɗibea.

Ichia dachirãmaa aude kawabiabaria. Dachi Akõredu chi aude kawa ɓuu bẽrã, ichia kawabi ɓuu ẽbẽrarã ãchia jipa nureaɗai kʉ̃ria panuuɗe (Santiago 1:15).

Ichia ichi Jauri deɗekabarii. Chi Jauri aɓa maucha ara jãu kĩra ɓuuwẽe, mau ichi poder joma barau asei baita. Dachia choroaɗai baita problema barauɗe chi Jauri biʼia adauɗai ɓuu, mauɗe biʼia akʉ ɓeebiyua kĩrukaraa ɓeeduuɗe, maabea biʼia ɓua jipa ãda duanaɗayua (Gálatas 5:22, 23). Maubapeɗa, Jesusba jarasii joma dachirãmaa nau Jauri bia deɗekadu dachia nesitaɗakare (Lucas 11:13).

Ẽbẽrarãba biawãrabena kawaɗa kʉ̃ria panuurã naarãmaa aiɗa kawabiabaria. Hechos 17:26, 27ɗe jara ɓuu kĩra, ẽbẽrarã sõ bia kirureerã iujãa jomauɗe Dachi Akõredu jʉrʉ duanua. Ãchia kawaɗa kʉ̃ria panuu Dachi Akõre trʉ̃, ichia kãare ase kʉ̃ria ɓuu nau iujãa baita mauɗe ẽbẽrarã baita, mauɗe kuitaaɗa kʉ̃ria panuuɗe saka ãchi Dachi Akõre jʉ̃kaaɗe meraaɗai panuu (Santiago 4:8). Chi Jeowa ɗebena jaranũrẽrã ãrĩãdu unu duanua jãka ẽbẽrarã nureemaa. Mauɗe kʉ̃ria iɗaa jaradeɗeka panua chi Bibliaɗebena panau ɓuu ãchia wiɗi duanuu baita.

¿Mau kakua bichia nau karta adausee? ¿Bichia Dachi Akõre jʉrʉ kãrii? Makarã, nau kartabʉ chi panau ɓuu bichia ʉtaa wiɗiɗebena.