Chi Bibliaba jaraɓuu bi’ia ãrĩã ɓua mauɗe waaburu bi’ia ɓooyua

KAWA KɄ̃RISIACHÃU bichi museoɗaa wãburuu. Aria kuadrorã juaba pintapeɗaaɗa jiraɓee pareemaa, mambea chi naarã diujorã chi ɓee kõa wãuriɗapeɗa, chi ɓee uyaɓeerã waa wakuaɗai paltaɓeerãɗe. Maamina bichia jãarãɗe kuadro aɓa jũi jiranuu bi’ia ãrĩã unusia. Kawa ochiaruubara chi wiɗi ɓuu mambea bichia chi museoɗebenamaa wiɗiɗe wãruu: “¿Jãu kuadro jari jiranu jãu chi nauɗe nureepeɗaaɗabaɗa o chi chi wiɗika?” apeɗa, maamina bichimaa panauburuu: “Chi jãu kuadro jãma jiranuu jãra aude chi waarã, aude chõra ɓuu mambea jãra arreklaɗaka ɓuu jãma jũi jiranuu”. Bichia waya wiɗiyua chi jãu kuadro ara aɓa ɓuu lukarɗe uarda uniɗau kawayua, maamina ãchia panauɗai: “Jãu kuadrora kuechekuɓuu tãeɗe ɓoapeɗa, chi lukar baniaba waabiruruuɗe ɓoapeɗa asta bereka orroapeɗaaɗabaɗa jaraɗayua, jãu joma awãtaɓua chi jãu kuadroba”. Makãrã bichia kʉ̃risiai ɓua: “Mau joma maka ɓeeɗe pasaɗabʉrã, ¿kãareba waupeɗaaɗaba makãrã?”.

Chi Biblia jãu kuadro kĩraka ɓuu. Jãu librora aude chõra ãrĩã ɓua. Bariara librorã chõrarã ara ichi ɗauchia ɓeemina, jãarãra kõa wãuriɗapeɗa uya wãurisiɗaa chi waarã kuadrorã chõra ɓee kĩra. Jãarã waarã librorã nau iujãaɗebena mauɗe moɗeɗebena beɗeaduanua, maamina sientipikorãba ãchia kawa jʉrʉsiɗauɗe kuitaasiɗaa chi jãu makawẽ ɓoosii. Chi konsejorã jãarãba jaraduanuura dachi kakua saka kuidaɗai ãrĩãdu pelikroso ɓea, mambea dachirã ariɗe aiɗaɗawẽa. Chi jãarã libroɗebenarã chi jorarãdu duaneesia. Ãchirãra ãrĩãdu dañaɗapeɗa perdekuasiɗaa.

Chi Bibliara diwara ɓua. Bariara ichi 3500 año wañaa basii, ara maka naeɗeeɗabena kĩra ara chi ɓuudu ɓua. Bariara yateɗeeɗa chi Biblia baataɗapeɗa, learãabaɗa aɗapeɗa, ichi ʉ̃rʉbena atua jaraɗapeɗa duanuumina, chi ichia ariɗe, chi biawãradu jaraɓuu. Chi Bibliaba kosarã ãrĩã barau ʉ̃rʉbena jaraɗaa junebena libroba jarai naeɗe (rekuadro ochiaba “¿Anticuada, o adelantada para su tiempo?”).

BIBLIABA BI’IA JARADEƊEKAƁUU

Jãu adua bichia kʉ̃risiai ɓua: “¿Ariɗe bi’ia ɓue chi konsejo Bibliaba deɗekaɓuu?”. Kʉ̃risias problemarã jari mechia ãrĩã ɓee nama iujãaɗe barau ʉ̃rʉbena, ãchi chiya kenapanuu, nau iujãa ãrĩãdu jayoa panuu, waabenarã pu’uaɗapeɗa mauɗe politikorãba chi nejarradu ãrĩã orroaduanuu. Jambea kʉ̃risiachãu Bibliaba jaradeaɓuu, mambea bichi du aɓa wiɗichãu: “¿Chi iujãa bi’ia ãrĩã ɓoi basee Bibliaba jaraɓuu kĩra asepeɗaaɗabasirã?”.

PELEAƊAWẼA DUANAƊAI

“Kĩrajʉʉ nurea chi waabenarã ambua nureabi kʉ̃riaduanuu, ãchirãra Dachi Akõre warrarã trʉ̃aɗai bẽrã” (Mateo 5:​9). “Berekábaɗa peleaɗawẽa duanaɗai baita jomaurã ome, mauɗe ẽbẽrarã iujãaɗe baraurã ome biɗa” (Romanos 12:18).

MIA CHUBURI KIRUREE UNUƊAPEƊA WAABENARÃ AIƊAƊAPEƊA MAUƊE PERDONAƊAI

“Kĩrajʉʉ nureabadaa waabenarã mia chuburi kiruree unuɗapeɗa aiɗabadaurã, ãchi siɗa ara jãka mia chuburi unuɗapeɗa aiɗaɗai ɓuuɗeeba” (Mateo 5:7). “Waaburu awãtaduanábaɗa machi chiya, mambea perdonaduanaɗai ãrĩãdu machi aɓa aɓaa, bariara aɓa junebena ʉ̃rʉbena ãrĩã jarai ɓuuadua. Ara jãka Jeowabaa machi perdonakuasii kĩra, ãrĩãdu machia biɗa perdonakuaɗayua” (Colosenses 3:13).

AMBUA DUANAƊAI ẼBẼRARÃ ÃCHI BEƊEA AÑAA KIRUREERÃ OME

Dachi Akõreba “ẽbẽra aɓa niiɗeeba wausia joma ẽbẽrarã puururã choroma ɓeeɗe barau, chi iujãa jomauɗe duanabiyua” (Hechos 17:26). “Dachi Akõre baita joma ara aɓaudu kirurea, ichia kʉ̃ria uania ichi beɗea ũribudaurã mauɗe chi joma bi’ia ɓee asebadaurã, chi puuru sãmabena nii importawẽa” (Hechos 10:​34, 35).

DACHI IUJÃA ÃRĨÃDU KUIDAƊAI

“Jeowaba mukĩra iujãa mipitaa kiruu Eden abadauɗe ɓusia, ichia ne uupeɗa mauɗe bi’ia ochia irakerayua” (Génesis 2:15). Dachi Akõreba “kenayua chi jari iujãa kiruu dañamaapanuu” (Apocalipsis 11:18).

WAABENARÃBA IRAƁEE KɄ̃RIAƊAABAI MAUƊE KAKUABA KOSA MIAƊAA ƁEE WAUƊAABAYUA

“Waaburu kosarã ãrĩãdu baranureaɗaiɗe bibinurearãabaɗa, nejoma baraniiɗeeba bichi kĩrajʉʉ nibapeɗa biuwẽa nibaɗe wãabayua” (Lucas 12:15). “Machirãra Dachi Akõre ẽbẽrarã bẽrã, machi kakuaba kosa miaɗaa ɓee wauɗaabayua, kosarã chi jayoa ãrĩã ɓee waurãabaɗa, waabenarãba iraɓee kʉ̃riaɗaabai, jãka ɓee ʉ̃rʉbena barikia beɗeapanarãabaɗa” (Efesios 5:​3).

SETAA JARAABAPEƊA ORROAƊAABAI, BARI ARIBIADU TRAJAI

“Daiba waabenarã orroaɗapeɗa mauɗe waabenarãmaa biɗa setaa jara kʉ̃riaɗawẽa” (Hebreos 13:18). “Chi orroabarii nii waaburu orroarãaba jãkai baɗabara bari ãrĩãdu chaarea trajaba” (Efesios 4:28).

AIƊAƊAI CHI NESITADUANUURÃ

“Nomaa akuɓeerãmaa bi’ia beɗeábaɗa ãchi bi’ia duanaɗai baita, chi suredu duanuu aiɗábaɗa, mauɗe jomaurã ome bikãa esperaduanaɗayua” (1 Tesalonicenses 5:14). Dachirãba “aiɗabaraaɗai chi jẽrãmarãrã mauɗe pẽedrãarã ãchi supriduanuuɗe” (Santiago 1:27).

Bibliaba naarã konsejorãdu jaraɓoowẽ, bari ara jãka bibiduanaɗaidu jaraɓua. Ẽbẽrarã aribiaurã naka bibiduanaɗabasirã, ¿bʉmaa nau iujãaɗe aude ariɗe bibiduanaɗai ɓoosme? Konsejorã Bibliaɗebena ariɗe neeɗapeɗa mauɗe bi’ia ãrĩã ɓee naeɗebena aude. Maamina, ¿Bibliaba bichi saka aiɗai ɓua?

¿IƊIBEA BIBLIABA SAKA ŨKURU AIƊAI ƁUA?

Mukĩra aude kuitaaɓuu niiba naka aɗabasia: “Kuitaapanua ẽbẽra chi kuitaaɓuu ãrĩã nii, ichia aseniiɗeeba” (Mateo 11:19). ¿Jãka ɓume bʉmaa? Konsejo ariɗe ɓuu kuitaai baita, naaburu ara jãka asebaraaɗai, mambeaburu unuɗai saka wãsii. Bichia nau ʉ̃rʉbena du aɓa wiɗii ɓua: “Chi Biblia bi’ia ãrĩã ɓuubʉrã, ¿jãuba mʉ bida aude bi’ia buebai ɓuka? ¿Ariɗe mʉ ũkuru chi problemarã uaɓuu, solusionai ɓue ichia?”. Ochiaɗaika saka aiɗasii wẽra aɓa nii.

Dianab kĩrajʉʉ niika ɓoosia, ichi trajo baraaniiba, maamina, kawawẽɗe ichi kau awẽra kiɗibaɗa biubaripeɗa, mauɗe chi kimaba ɓuipeɗa, chi nejarra wã’ãe ɓeepeɗa mauɗe trajo siɗa perdeɗabasia. “Mʉa mʉ kai baɗa adua basii; nomaa ãrĩãdu ɓeepeɗa, mʉ kima wã’ãe ɓeepeɗa mauɗe kau siɗa, ni dee siɗa wã’ãe ɓeeɗabasia. Mʉa joma perdeɗabasia, puersa perdeɓeeɗa, mʉa kosa biarãra esperaabasia”.

Dianaba nau beɗea ariɗe jaraɓuu kʉ̃risiasia: “Dachia iɗibea chi 70 añoɗaaburu neeɓua; mauɗe ẽbẽra kakua chaarea niibʉrã, chi 80 añoɗaa unu neepanua, maamina jãarã añorãra kosarã miaɗaa ɓeeɗe pasabadaa; chi añorã isa wãɗapeɗa mambea dachirã siɗa ara mau ɗauchia biupanua” (Salmo 90:10).

Jãu jãka ɓeeɗebena kawayua, Dianaba jʉrʉsia Bibliaɗe, mambea nau ãrĩãdu serbisia ichi baita. Diana kĩra, ẽbẽrarã ãrĩãrã problema baraaduanuuba, chi Bibliaba jaraɓuu aseduanua. Makaburu, ãchi bida aude kĩrawãrea ɓeeɓua. Ãchia kawasiɗaa chi Biblia libro bi’ia ãrĩã ɓuu mauɗe jãra waabenarã librorã sõre duanuu kĩra ɓoowẽ. Chi Biblia diwara ɓua, mauɗeeba jãu libro, ¿Dachi Akõreba ɓʉbiɗabaka o ẽbẽrarãburu ɓʉpeɗaaɗabasaa? (1 Tesalonicenses 2:13).

Dachirã iɗibea ɓa’ãraburu bibinurea, maamina problemarã ãrĩã iɗaa. Problemarã baraaɓuuɗe, ¿kai jʉrʉbaraa chi mauba bichi korason kĩrajʉʉbiyua, bichi aiɗapeɗa mauɗe beɗea bia deayua?

Bibliaba dachimaa jaradeɗekai ɓua nau baita:

1. Problemarã baraubʉrã ida kuɓui baita.

2. Dachia problema bararuuɗe saka solusionai jʉrʉɗayua.

3. Dachia problemarã barau choroa kawaɗai baita, chi poyaa kambiaɗaabai ɓee.

Chi naarã õbea artikulorãba jarabudaa nau õbea puntorã ʉ̃rʉbena.