Nejoma kĩrawãrea ãrĩã ɓee neebudau kereɗayua, ¿mauba dachi aiɗaɓubaka?

DANIEL 10 añoburu nibasiiɗe, aɓa año basii kanser kakua ãrĩã supriɗabaɗa. Chi dotorã mauɗe ichi deeɗabenarãba ichi biui baɗa a kʉ̃risiaɓoosiɗau, maamina ichiara naka kʉ̃risiakabasii. Ichia wauripeɗaaɗakarera, biʼia kawayua ʉrmidia jʉrʉpeɗa kanser anibiayua kʉ̃riabachia. Ichia kĩrajʉʉ esperaɓoosia chi dotor espesialista niiba aiɗayua chi kanser ichia adauɗabaɗa anibiyua. Maamina mau dia neeruuɗe chi dotor poyaa wãabasii ãrĩã kuechesiiɗeeba. Makaɗapeɗa Daniel nomaa ãrĩã akubuekapeɗa jãaduawẽa koɓeesii. Jambeburu biusii.

Chi Daniel pasasiiɗebena chi dotorba jaraɗa saka biʼia kʉ̃risiaɗauɗe chi kĩrawãrea neeburuuɗebenaba aiɗaɓua choroaɗai baita ẽpermaduuɗe. Ara jãka pasabarima chõracheke biui iraɓuuɗe, ichia ãrĩã kʉ̃riaɓuu ichi deeɗabena waya unui baita. Maka pasaɗakare, ichi biuyua. ¿Sakayua chõracheke biui irabasiimina biuubasaa? Chi nureeba kʉ̃risiabadau kĩra, ¿ichia biuubasee chi kĩrawãrea ãrĩã ɓuu neeburuu esperasii kakua?

Iɗibea dotor ãrĩãrãba jarabadaa dachia chi biʼia ɓuudu kʉ̃risiaɗapeɗa, chi kĩrawãrea neeburuuɗebena kʉ̃risiaduuɗe mauɗe kĩrajʉʉ paneeɗakare nakaburu alentao kopaneebadau. Maamina jomaurãba jãka kʉ̃risiaɗakau. Waabenarãba jarabadau mau makawẽma, mau siensia baare poyaa komprobakauɗeeba. Ãchidu kʉ̃risiapanuu dachi kakuaburu ẽpermaɗai ɓuu.

Yataɗeeɗa ãrĩã ẽbẽrarãba ara jãka kʉ̃risiabadau. 2000 año basiiɗe, chi kʉ̃risianibabarii Greciaɗebena Aristotelesmaa wiɗisiiɗe chi kĩrawãrea neeburuu kʉ̃risiapanuu ʉ̃rʉbena jarayua, ichia a jarasii: “Nau ara jãka ẽbẽra komakaraamaaɓuu kãinuɓuuwẽmina kĩra ɓua”. Jãɗakare chi presidente Benjamin Franklin Norteaméricaɗebenaba kachirua jaraɗabasii: “Chi ẽbẽra esperakoɓeebariiba jarbaba biui”.

¿Kãare ariɗe ɓua chi nejoma kĩrawãrea neebudau kʉ̃risiaduanuu ʉ̃rʉbena? Nejoma kĩrawãrea neebudau kʉ̃risiaduuɗe, ¿bariarã kʉ̃risiapanue? Maebʉrã, nejoma kĩrawãrea neebudau kʉ̃risiaduuɗe, ¿ariɗe serbiɓue dachi alentao nibabiɗapeɗa kĩrajʉʉ nureabiɗai baita?

¿Sakayua biʼia ɓua kʉ̃risiayu nejoma kĩrawãrea neebudau ʉ̃rʉbena?

¿KÃARE pasai basaa Daniel, chi warr ẽpermo kanserɗeeba chi artikulo naeɗe berreasiɗauɗebena ichia chi kĩrawãrea neeburuu kʉ̃risiayu ɓuiɗaabasirã? ¿Biuubai baɗa kanserɗeeba? ¿Wabiɗa chokae ɓubaka? Ẽbẽrarãba bustapanuu kʉ̃risiayu nejoma kĩrawãrea neebudau ʉ̃rʉbena, jãarã biɗa makabʉ jaraɗakau. Bariara biʼia ɓuu kʉ̃risiayu nejoma kĩrawãrea neebudauɗebena adua, nauba dachi akawa anibiibai ẽperma koɓeeruuɗe.

Notisiaɗe CBS News berreaɓoosii chi dotor Nathan Cherney ome, sakayua kʉ̃risiayu kĩrawãrea neebudauɗebena mauburu anibiibai dachi ẽperma duanuuɗe ʉ̃rʉbena. Chi dotorba naka asii: “Chi nuree mukĩrarãba ãchi wẽramaa iadaabadaa nejoma kĩrawãrea neeburuu ãrĩã kʉ̃risiakauɗeeba. Maamina nau ariɗe ɓuuwẽ, chi ẽpermo kiruu kanserɗeeba alentawẽebʉrã ichi kulpa wãʼãe ɓuuɗeeba”.

Chi nuree ẽbẽrarã ãrĩã suprimaaduanuu ẽpermo atua duanuuɗeeba. Chi deeɗabenarãba kʉ̃risiabiɗakau ãchidu kulpaɗeeba alentaɗakau. Makãrã, ¿kʉ̃risiayu nejoma kĩrawãrea neebudau ʉ̃rʉbena akawa serbiwẽka?

Makawẽma. Chi dotor Cherney espesialista niibʉ ichia aiɗawẽ chi ẽpermo kiruu anibiyua ni maucha chokae nureabiyua. Bari, ichia aiɗaɓua chi ẽpermo keɗee biʼia sentibiyua chokae nureemisa. Naarã dotorãba ariɗe kerepanuu bariara ẽpermo atua ɓuɓusiɗa chi tratamientoba ãrĩã serbiɓuu ãchi biʼia sentiyua. Aribiaurãmaa ara jãka pasaɗabaɗa, mauɗeeba biʼia kʉ̃risiayu neeburuuɗe ariɗe serbiɓua.

Kʉ̃risiayu nejoma kĩrawãrea neebudauɗebena biʼia ɓua

“Kʉ̃risiayu nejoma kĩrawãrea neebudauɗebena ãrĩã serbiɓua ẽpermo nureeɗe”, chi dotor mauɗe periodista medisinaɗebena W. Gifford-Jonesba naka jarasii. Ichia jʉrʉɗabaɗa nauba saka biʼia ɓuu aiɗayua ẽpermo atua nuree biʼia sentibiyua. Nau aseruuba aiɗayua chi ẽpermo keɗee chi mipitaaburu kʉ̃risiapaneeɗayua. 1989ɗe kawasiɗaa mau tratamiento asesiiɗe chi ẽpermo keɗeerã waaburu chokae nibasiɗau. Mambea waabenarãba jʉrʉsiɗauɗe ara jãka jaraabasiɗau nauɗebena. Maamina, chi ẽpermo duanuu biʼia sentibiruubʉrã nomaa akubueɗaabai ni puʼua ãrĩã sentiɗaabai aɓau kañabara.

Chi ɓeeba jʉrʉsiɗau ẽbẽrarã ãchi korason ẽpermo duanuuɗe, biʼia kʉ̃risiaɗarã alentao kiɗibai, maebʉrã kachirua kʉ̃risiasirã audeburu ẽperma kopaneeɗai. 1.300 mukĩrarã aude kawa ochiasiɗaa kawayua saka kʉ̃risiapanuu nureaɗaiɗebena. Mauɗe 10 año pasaɗakare waya ochiasiɗauɗe 12% ãchiɗebena chi korason ẽpermo ɓeesiɗau. Ãchiɗebena ãrĩã kachirua kʉ̃risiasiɗaa. Laura Kubzanskyba propesor chi Salud y Conducta Social ʉ̃rʉbena Facultad Salud Públicaɗe Harvarɗebena jaraɓuu: “Kabanaa ẽbẽrarãba jarabadaa ‘ariɗe ɓuudu biʼia kʉ̃risiayu alentao nureaɗai baitaʼ, maamina nakaburu jarabadaa ẽbẽrarãba. Daibara biʼia jʉrʉɗapeɗa komprobasiɗau medisinaɗeeba biʼia kʉ̃risiayu ãrĩã serbiɓua chi korason ẽpermo nureerã anibii baita”.

Chi dotorãba unubibadaa waabenarãba a kʉ̃risiaduanuuɗe: “Mʉ kachirua ãrĩã ɓuu”, ãchi operasion aseɗakare aude demorabadau alentayua, maamina “mʉ ẽpermawẽa ɓoobarii” asirã, isa alentayua. Ẽbẽrarãba biʼia ɓuudu kʉ̃risiabadauɗe waa nibaɗai ɓua. Ara mau kĩra pasabadaa chõrachekerã paneeɗakare. Chõrachekerãba ũrisiɗauɗe ãchi aude kuitaabadau mauɗe esperiensia aude irapanuu, kĩrajʉʉ jipa kãribasiɗau. Naka jaraaruuba aude biʼia ɓoosia ãchirã baita 12 semana ejersisio ãchi chaareabiyua kañabara.

Ẽbẽrarãba kʉ̃risiaduanuubʉrã nejoma kĩrawãrea neebudauɗebena, mauɗe chi biʼia ɓuudu, ¿sakayua nau aseduuba alentao duanabiɗayua? Chi dotor mauɗe chi sientipikorã abiɗa adua nureerã saka waunuree dachi kakua mauɗe dachi kʉ̃risiaɗeeba. Chi nuree espesialistarã kuitaanureerãba jãarãburu biʼia jaraɗai ɓua nauɗebena. Jari, chi propesor Neurologíaɗebenaba jaraɓuu: “Kʉ̃risiaburuuɗe chi biʼia ɓuu neeruuɗebena mauɗe kĩrajʉʉburu akuduanuuɗe, aude biʼia ɓuu, nakaburu dachi kakua biʼia nureabaria. Mauɗeeburu ara dachi du aɓa ara jãka aseɗai ɓua ẽpermawẽa nureaɗai baita”.

Naka kʉ̃risiaruuba chi nuree dotor, sikoloko mauɗe sientipiko baita wiɗi ɓuu, maamina chi Bibliaɗebena kawanureerã baita chi wiɗi wãʼãema. 3.000 año basii chi aude kuitaanibasii Salomonba Jeowa kʉ̃risiaɗebena naka jarasia: “Dachi korason kĩrajʉʉ ãrĩã ɓuubʉrã,dachi kakua alentao nibabii ɓua. Maamina nomaa akuduanuubʉrã chi ɓʉʉrʉ sekabiyua (Proverbios 17:22). ¡Nau bersikuloba ariɗe jarakiruma! Dachi kĩrajʉʉ nureeɗeebiɗa, nakaburu dachi kakua akawa ẽpermawẽa nureaɗai jaraabasii, bari jarasii: “Dachi kakua alentao nibabii ɓua”.

Nejoma kĩrawãrea neebudauɗebena kʉ̃risiaruu ʉrmidia kĩraka ɓuubʉrã, ¿joma dotorãba ẽpermo keɗeemaa nau ʉrmidia deaɗaabai baɗa?

Nejoma kĩrawãrea neebudauɗebena kʉ̃risiayu maebʉrã chi miaɗaaɗebena kʉ̃risiayu naarã dachi biʼia nureabii ɓua maebʉrã biʼiawẽ nureabii ɓua

Chi imbestikadorãba kawapeɗaaɗa dachia kʉ̃risiaburuuɗe chi biʼia ɓuudu neeruuɗebena, nakaburu dachi kakua biʼia nureabaria. Chi ẽbẽraba biʼia kʉ̃risianii, jãu biʼia wãɓua trajoɗe, eskuelaɗe mauɗe jemenebadauɗebena. Jʉrʉɗabasia wẽrarã pirabadaurãmaa. Chi kawabibadaurã biʼia piraɗayua ãchia jʉrʉsiɗau, saka ɓua chi wẽrarã kakua piraɗayua, mauɗe ãchia saka kʉ̃risiabadau chi neeburuuɗebena. Chi biʼia ɓuudu kʉ̃risianureerã biʼia wãɗai kawaɗabasia. Makãrã, ¿sakayua biʼia ɓua kʉ̃risiayu nejoma kĩrawãrea neebudauɗebena?

Ãrĩã kawapeɗaaɗa kachirua kʉ̃risiayu neebudauɗebena. 1960ɗeeɗebena 1970ɗaa chi imbestikadorãba kawasiɗau animararãba kãare pasabadaa ara mau kĩra ẽbẽrarãba pasabadau. Jari, ẽbẽrarãmaa chi ruido mechibena ũribisiɗau, maucha ũriɗaamaba kawabisiɗau saka ãchia eɗaa sũɗai ɓoosia boton. Jomaurãba mau biʼia asesiɗau.

Ara maka asesiɗau junebena ẽbẽrarã ome, maamina boton eɗaa sũɗakare wabiɗa chi ruido mechibena ũriduanasia. Mauɗeeburu, ãrĩãrãba poyaawẽ ɓuuɗeeba maucha eɗaa boton sũɗaabasiɗau. Mambea chi boton eɗaa sũɗaabasiɗaa ãchia kuitaapanasii nau ruido akabaabasiiɗeeba. Maamina waabenarãba ɓaʼãra berekaɓoosia nau ũriɗaamaba.

Chi dotor Martin Seligmanba madu unusiiɗe, imbestikakoɓeesia biʼia kʉ̃risiayua maebʉrã biʼia kʉ̃risiaɗaamaba ʉ̃rʉbena. Ichia kawaɓoosii chi ẽbẽrarãba kawayuswẽa ɗiɗibariiɗe ãchi baita chaarea ɓuu barikiau kosa asei baita asta poyaaɗawẽa ɗiɗibarii. Seligmanba naka jarasii chi miaɗaa kʉ̃risiayu ʉ̃rʉbena: “Mʉ 25 año kawapeɗa dachia kʉ̃risiaɓeeruubʉrã ‘mʉdu kulpa baraaɓuuʼ chi ẽbẽraba kawawẽa kʉ̃risianii jaraɓuu kĩra, chi problema akabaabayua, mauɗeeba dachia biʼia poyaa aseebayua maka kʉ̃risiaruubʉrã problema ãrĩãdu baraarua, chi ẽbẽrarãba kʉ̃risiaruu makawẽ ɓuuɗe”.

Mambea chi waabena ẽbẽramaa mau chi wiɗi ɓuu kĩraka ɓua, maamina dachi chi Biblia estudianureemara mau chi wiɗiwẽ ɓua. Bibliaɗe proverbioba naka jaraɓua: “¿Chi diarã neeburuuɗe problema ãrĩãɗe bichi nomaa barika? Bichi puersa wãʼãe bai” (Proverbios 24:10). Makabʉ, Bibliaba jaraɓua dachi nomaa akuɓuumare dachia biʼiawẽ kʉ̃risiaɓuumaa, mauba dachi puersa kitabaria kosa asei baɗa. ¿Kãare aseɗaiba biʼiawẽ kʉ̃risiaɗaamaba mambea nejoma kĩrawãrea neebudauɗebena mauɗe biʼia ɓuudu kʉ̃risiaɗayua?

[Poto]

Dachia kʉ̃risiaburuuɗe chi biʼia neeruuɗebena nakaburu dachi biʼia nureabaria

Dachia miaɗaa ɓee kʉ̃risiaɗaabayua

¿BɄA sãa unuɓua problema dachi bidaɗebena? Chi kuitaanureerãba jarabadau chi nureeba biʼia ɓuu kʉ̃risiapanuu maamina ãibenarãba biʼiawẽ ɓuuɗe kʉ̃risiaduanuu. Dachi bidaɗe jomaurã problema baraanureayua, chi nureerã aude junebenaɗeebiɗa. ¿Sakayua chi nuree ẽbẽrarã chi problema isa solusionaɗapeɗa naa kãribadaa, maamina junebena ẽbẽra problema ãrĩãɗeeba poyaa naa kãriɗaabai ɓua?

Kʉ̃risiachãu bichia trajo jʉrʉnii kĩraka ɓua. Chi patronmaa wãaruumina maamina trajo deakaa. ¿Bichi saka sentiɓua? Nauburu naka kʉ̃risiai ɓuu: “Mʉmaa ni aɓa biɗaba trajo deaɗaabai ɓuu”. Maebʉrã trajo deaɗawẽɗeeba naka kʉ̃risiai ɓua: “Mʉ serbiwẽa koɓeebarii”. Ẽbẽraba naka kʉ̃risiasirã kawayuwẽ kʉ̃risiania.

¿Saka jãka kʉ̃risiaamaba?

¿Saka ida ɓuiba miaɗaa ɓuuɗe kʉ̃risiaamaba? Naa, naka kʉ̃risiaabayua chi miaɗaa ɓuuɗeburu. Mauɗeeburu kʉ̃risiaba: “Bichi trajo baita deskojewẽebʉrã, ¿mau bichi serbikaa ɓuunii kʉ̃risiaɗaime, maebʉrã ãibena ẽbẽra nesitaɓoosia nau trajo baita?

Chi miaɗaa ɓuuɗe kʉ̃risiaruuɗe kawawẽa kʉ̃risiai ɓua. Dachi trajo asei baita deskojeɗawẽebʉrã, ¿dachi serbikaa nuree kʉ̃risiaɗaime, makawẽebʉrã chi mipitaaburu kʉ̃risiaɗai ɓua, jari ambua duanua amikorã baara, deeɗabena ome, maebʉrã biʼia kʉ̃risiayu dachia biʼia aseniiɗe? Chi miaɗaa neeburuuɗe kʉ̃risiarãaba. Makãrã, ¿dachi akawa trajo unuɗaabayue? Mauɗe dachia biʼia kʉ̃risiaɗayua chi miaɗaa ɓuuɗe kʉ̃risiaɗaamaba.

Dachia kawa kʉ̃risiabaraaɗai dachia kʉ̃rianiiɗeeburu aseɗayua

Chi ultimo añoɗe, imbestikadorãba jarabadaa dachia biʼia ase kʉ̃riaɓuuɗeeburu kʉ̃risiayu. Chi jaraaruu kĩraka artikulo uruburuuɗe, ichia jaraɓuuɗe biʼia aiɗayua. Dachia biʼia kʉ̃risiaabʉrã, biʼia aseyua dachia kʉ̃rianiiɗe.

Kawa kʉ̃risiayua uruburuuɗe, kapichia kʉ̃risiabaraaɗai dachia ase kʉ̃riakuɓuuɗeeburu. Nau aseɗawẽebʉrã kawa kʉ̃risiabaraaɗai chi ase kʉ̃rianiiɗeeburu. Naa kʉ̃risiaɗaiba: ¿dachia chi ase kʉ̃riaɓuu kʉ̃risiayue? Dachia noremaacha ara aɓa ɓuudu asenii bẽrã dachia ãrĩãdu kawayuwẽ chi ase kʉ̃rianibaɗa. Dachia chi ase kʉ̃riakuɓuu importante ãrĩã ɓuuɗe naeɗebena chi Bibliaba konsejo deasia “chi nabena importante ãrĩã ɓuu aseɗayua” (Filipenses 1:10).

Dachia kuitaaɗakare kãare chi importante ãrĩã ɓuu aseɗai ɓua, chi trajaɗayu Jeowa baita, dachi deeɗabenarã baara mauɗe trajoɗe biɗa. Maamina kʉ̃risiaɗaabayua kosa ãrĩãdu aseyuɗeeburu, kosa dachia aseɗai ɓuudu. Makawẽebʉrã ãrĩãdu nomaaɗai ɓua dachia poyaa aseɗawẽba. Mauɗeeba asebaraaɗai chi dachia aseɗai ɓuudu, mauɗe poyaabai kuɓuurã kaaɗeburu asei ɓua.

Chi nureeba jarabadaa, kʉ̃riaɓuu asei ɓua. Nau ariɗe ɓua. Bereka asebaraaɗai dachia ase kʉ̃riaɓuuɗe, kʉ̃risiaɗai ɓua dachia ase kʉ̃rianiiɗe makãrã aseɗai ɓua. Kʉ̃risiaɗai ɓuubʉrã chi ase kʉ̃riakuɓuuɗe, chi biʼia ɓuudu adauɗai. Dachi problema baraapanuu adua biʼiaɗaiba chi dachia aseɗai ɓuudu.

Maka ɓuumina kʉ̃risiabaraaɗai chi aseɗai ɓuudu. Chi dotor C.R. Snyder, chi ichia estudiasiiɗe chi bia ɓuudu kʉ̃risiayuɗebena, ichia jaraɓua dachia kʉ̃risiaɗai ɓua dachia adaui kʉ̃rianiiɗe, poyaa nuubʉrã june jʉrʉi baraa adau kʉ̃rianii adauyua.

Snyder biɗa jarabaria sakaiɗaa adaui dachia kʉ̃riaɓuuɗebena. Dachia adauwẽebʉrã dachia kʉ̃riaɓuu, mauɗeeburu kʉ̃risiaɗabʉrã poyaa adauwẽ dachia kʉ̃riaɓuu, mauba nomaa ɓeebiyua. Maamina, dachia asebudaubʉrã chi aseɗai ɓuudu nejoma biʼia neeburuuɗebena kawa kʉ̃risiaɗayua.

Chi Bibliaɗe jaraɓuu chi rei Davidba dee choroma ase kʉ̃riaɓoosii Jeowa baita. Maka ɓuumina Jeowaba jarasii ichi warr Salomonburu asei baɗa. David nomaa akuɓeebasia waaburu jaraɗaabasia mau ʉ̃rʉbena. Ichia kʉ̃risiaɓoosii ichi warr nesitabachia mauɗe aiɗakoɓeesia chi dee choroma Jeowa baita aseyua (1 Reyes 8:17-19; 1 Crónicas 29:3-7).

Kawa kʉ̃riabaraaɗai adauyua dachia kʉ̃rianii maamina abiɗa esperaɗai ɓua. ¿Sakayua? Kosarã ãrĩãba dachia nomaabibaria poyaa kambiawẽa. Dachirãba kʉ̃risiabudauɗe ãrĩã nomaabibaria ẽbẽrarãba ãrĩãdu kerra asebadau, ẽpermaɗapeɗa biubaraɓeesii, ¿sakaburu dachirã kĩrajʉʉ duanaɗaiba?

[Poto]

Bichi trajo baita deskojewẽebʉrã, ¿mau bichi serbikaa ɓuunii kʉ̃risiaɗaime?

[Poto]

Rei Davidba chi asei ɓuudu aseɓoosii

¿Saka unuɗaiba chi kĩrawãrea ãrĩã ɓuu neeburuu?

KɄ̃RISIACHÃU bʉ reloo paraɗiɗiruuɗe mauɗe nau dañasiiɗe. Bichia ẽbẽra kuitaanii jʉrʉɗe wãi arreklabiyua, bichia anunsio ãrĩã ochiamaaɓuu maamina maarãba berda jaraɗawẽ. Makãrã bichia kuitaaɓuu chi besinoba yataɗe biʼia ara aɓau reloo asesii mauɗe ichia bari areklai ɓua. Makãrã bichia jarayua ichimaa arreklabiyua, ¿makaka?

Mau reloo ara mau dachia kʉ̃risiaduuɗe chi biʼia neeburuuɗebena kĩra ɓua. Nau tiempo dipisil ãrĩã ɓuu bẽe, chi nureeba chi biʼia neeburuuɗe maucha kʉ̃risiaɗakau, mauɗeeburu, ¿kaimaa wiɗiiba bichi aiɗayua? Ẽbẽrarã aribiaurãba jarabadaa chi problema solusionaɗai ɓua, chi konsejo deabudaumina biʼiawẽ ɓua, ariɗe jaraɗakau. ¿Sakayua wiɗiɗaiba chi dachi asesiimaa? Chi Bibliaba jaraɓua “ichi kaitawẽ koɓeekau ẽbẽrarã ome” ichia aiɗa kʉ̃riaɓua” (Hechos 17:27; 1 Pedro 5:7).

¿Kãareba mau nejoma kĩrawãrea neebudauɗebena kʉ̃risiayu?

Chi Bibliaba aude biʼia jaraɓua neeburuu dachia esperaniiɗe dotor sientipiko mauɗe sikoloko ãchia jarapanuu kañabara. Chi beɗeaɗe Biblia ɓʉkuɓuaɗa biʼia jaraɓoosii nauɗebena, jãuba jaraɓuu dachia nejoma kĩrawãrea neebudau kʉ̃risiayu ʉ̃rʉbena. Dachia kʉ̃risiaduuɗe chi biʼia ɓuu neeburuuɗebena mau ariɗe kʉ̃riapanuu, mauɗe dachia kerepanuu nauɗe. Chi Bibliaba jaraɓuuɗe nejoma kĩrawãrea neebudauɗebena, atua jarakaa. Ariɗeburu jarakiruma.

Ara jãka pasabarima dachi pe baare, chi ariɗe ɓuudu kereɗayua, bariarã poyaa kereɗaabai (Hebreos 11:1). Maamina chi Bibliaba diwara jaraɓuu pe ʉ̃rʉbena dachi biʼia neeburuu esperapanuuɗeebiɗa (1 Corintios 13:13).

Nau kʉ̃risiachãu: dachia amiko bia kiɗiimaa pabor asei baita wiɗiɗabasirã, dachia kʉ̃risiapanuu ichia biawãra aiɗayu. Sakayua kereɗai ɓua ichia ariɗe aiɗayua. Dachia unupeɗaaɗa ichia ãrĩã aiɗabarii, ãrĩã deabarii nesesitao keɗeemaa. Mauɗeeba dachia pe baraanureeɗe ara aɓau dachia kʉ̃risiaduuɗe nejoma kĩrawãrea neebudauɗebena kĩra ɓua. Mauɗeeba, ¿saka aseɗaiba ariɗe kereɗayua Dachi Akõreɗe?

Kaiburu ariɗe jaraɓua nejoma kĩrawãrea neebudauɗebena

Jeowaburu biʼia jaraɓua nejoma kĩrawãrea neeburuuɗebena. Mauɗeeba yataɗe Bibliaba jarasiika chi puuru Israelba biʼia esperaɗai ɓoosia Jeowaba ãchi aiɗaɗayua (Jeremías 14:8). Ichi puuruba Jeowa beɗeaɗeburu kereɓoosiɗau, mauɗeeba chi biʼia neeburuu esperapanasia ichidu aiɗaɓoosiiɗeeba. Ãchia chi biʼia ɓuu esperapanasii bẽrã, Dachi Akõreba ãchi ariɗe kerebiɓoosi ichi beɗeaɗe. Tiempo pasaɗakare, Jeowaba joma jarasii ãchi aiɗaɗai baita ariɗe kumpliɓoosia. Josue chi ochia uabariiba Israel baita, puurumaa naka asii: “Machia biʼia kuitaabadau bẽe [...] joma beɗea biʼia Jeowaba jaraɗabaɗa machi aiɗaɗai baita akawa kumplibarima” (Josué 23:14).

Ãrĩã tiempo pasaɗamina, ẽbẽrarãba ara jãka kʉ̃risiabadau Jeowa ʉ̃rʉbena. Bibliaɗe eɗa ɓʉkuɓuu chi Jeowaba jaraɓooɗabaɗa, mauɗe saka ichi beɗea akawa kumpliɗapeɗa. Chi pasaruuɗebena Bibliaɗe ɓʉsiiɗe ariɗe jarasia ara mau momentoɗe kumplikãriɓoosii kĩra.

Mauɗeeburu dachia jaraɗai ɓua Biblia ʉ̃rʉbena, jãu libroba ariɗe jaraɓua chi kĩrawãrea neebudauɗebena. Dachia kawaɗakare saka Jeowaba biʼia trata uakeraabarii ẽbẽrarã, maucha chi ichia jaraaruu daiba kereɗaima. Chi apostol Pabloba naka ɓʉsii: “Joma naeɗeeɗa ɓʉɗabaɗaba biʼia ɓua dachi kawabiɗayua, dachia choroaduuba mauɗe chi Bibliaba mipitaa jaraɓuuba dachi biʼia akuɓeebiɗai ɓua, mauɗeeba dachia esperaɗai ɓua chi biʼia neeburuu” (Romanos 15:4).

¿Dachi Akõreba kãare kĩrawãrea jaraɓua neebudauɗebena?

¿Sakayua chi biʼia neeruuɗebena kʉ̃risiai nesitabadaa? ¿Ẽbẽra biuɗakare? Maamina, ẽbẽrarã aribiaurã ãchi ãbachekerã biuɗakare dipisil ɓuu ãchirã baita chi biʼia neeburuuɗe kʉ̃risiaɗayua. Mau pasaɗakare chi biʼia neeburuuɗe kʉ̃risiakau kopaneebadau. Joma dachirãra biuɗayua. Dachi ɓaʼãraburu chokae nuree mambea biupanuu. Mauɗeeba chi Bibliaba jarabaria, biuyu kĩrabara “chi ultimo enemiko kĩra ɓua” (1 Corintios 15:26).

Makãrã, dachi ãba biuɗakare, ¿sakayua kʉ̃risiaɗai ɓua chi kĩrawãrea neebudauɗebena? Bibliaɗe chi bersikuloba jaraɓuuɗe biuyu kĩrabara chi ultimo enemiko kĩra ɓua, jãu biɗa jaraɓuu dachi “akawa biuɗaabai”. Bariara biupanuu adua, Dachi Akõre Jeowaba unubibaria ichi aude poder baraaɓuu. ¿Mau sakaba? Biupeɗaaɗabaɗa piradruɗakare. Chi Bibliaba jaraɓuu Dachi Akõreba 9 ẽbẽrarã piradrubisia ichi poderɗeeba.

Yataɗe, Jeowaba poder deaɗa ichi Warrmaa, Jesus, Lazaro ichi amiko biʼia kiɗii kĩmarẽ dia biuɗabaɗa piradrubiyua. Jesusba miruubasii Lazaro piradrubisiiɗe, bari kabanaa ẽbẽrarã daaɗe mau aseɓoosii (Juan 11:38-48, 53; 12:9, 10).

Bichia kʉ̃risiai ɓua, sakayua maarã ẽbẽrarã piradrusiɗau, ãchi waya chõracheke baɗapeɗa mambea biusiɗau. Maka ɓuma, maamina chi pasasiiba biupeɗaaɗa piradrubisiiɗe, mauba dachi ariɗe kerebiɗai ɓua dachi ãbachekerã biupeɗaaɗabaɗa ãchi siɗa waya piradruɗai, dachia ariɗe mau kerepanuu. Mauba jara kʉ̃riaɓuu dachia esperapanuu chi kĩrawãrea ariɗe neeburuu.

Jesusba jaraɓooɗabaɗa: “Mʉ chi piradrubibariibʉ mauɗe chi chokae nibabibariibʉ” (Juan 11:25). Ichimaaburu Jeowaba poder deayua ẽbẽrarã joma iujãaɗebenarã piradrubiɗai baita. Ichia biɗa jaraɓoosii: “Chi ora neeyu joma ʉaɓee duanuu ãchia ichi beɗea ũriɗapeɗa awara saliɗayua” (Juan 5:28, 29). Ariɗe ɓuma, joma ʉaɓee duanuu waya piradruɗai iujãa mipitaa kiruuɗe duanaɗai baita.

Chi propeta Isaiasba biʼia jaraɓoosii biupeɗaaɗa piradruɗaiɗebena, naka mipitaa jarasii: “Bichi biupeɗaaɗarã waya chokae nureaɗai, ãchi kakua biuɗabaɗa waya ʉ̃rʉmaapanaɗai. ¡Chi iujãaɗe duanuu ʉ̃rʉmáabaɗa mambea kĩrajʉʉ panuuɗeeba biábaɗa! Dapeɗe bania ɓaeruu bichi kĩraka ɓua, iujãaɗebena chi akawa poyaa aseɗawẽ biupeɗaaɗarã neeɗai” (Isaías 26:19).

¿Jãu mipitaa ãrĩã ɓuuwẽ? Chi biupeɗaaɗabaɗarã biʼia duanuu ara jãka warrcheke dana bitaɗe eɗa kuɓuu kĩraka duanua. Joma ʉaɓee duanuu Dachi Akõre joma poder baraaɓuu kʉ̃risiaɗe biʼia paneebadau (Lucas 20:37, 38). Ãchi waya piradruɗai iraɓuu iujãa mipitaa kiruuɗe, kĩrajʉʉburu duanaɗai baita, ara aɓau warrcheke ichi dana akõre baara kʉ̃ria iɗaa esperapanuu kĩra. Mauɗeeba, biupanuumina chi biʼia ɓuudu neeburuu esperamaapanuu.

Nejoma kĩrawãrea neebudauɗebena kʉ̃risiaduuɗe biʼia ɓuu dachirã baita

Pabloba ãrĩãdu kawabiɓuu chi kĩrawãrea neebudau kʉ̃risiaduuɗe biʼia ɓuu dachirã baita. Ichia jarasii naka kʉ̃risiaduuɗe nau kokoroaba kasko jʉ̃barii kĩra ɓua (1 Tesalonicenses 5:8). ¿Sakayua naka jarasaa? Yataɗe, kokoroarãba peleaɗe wãpanuuɗe boroɗe kasko ierroba wauɗabaɗa jʉ̃bachidau, mauɗe kasko eɗa paru paka e wauɗabaɗa jʉ̃bachidau. Nau kaskoɗeeba boro ãrĩã sĩɗapeɗamina biubiibasia. Ara aɓau kĩra kaskoba idabikau boro puʼuayua, dachia nejoma kĩrawãrea neebudau kʉ̃risiapanuuɗe, mauba kawawẽa kʉ̃risiabiɗaabai. Dachia ariɗe kereɗarã chi Jeowaba deai aɗabaɗaɗe, ãrĩã kĩrukaraaɗaabai ni peraɗaabai siɗa problema ãrĩã neeruu adua. ¿Kaiba nau kasko jʉ̃i nesitaabaiba?

Pabloba biʼia jaraɓoosii ejemploɗeeba saka Jeowaba kʉ̃riaɓuu dachia chi biʼia neeburuuɗeburu kʉ̃risiaɗayua. Naka ɓʉɗa: “Dachia chi biʼia ɓuu esperapanuu ara jãka ankla kĩra ɓua dachi jãaduabipeɗa chaareabiyua” (Hebreos 6:19). Bera biusii bẽe barko doidu wãsiiɗe, Pabloba biʼia kuitaaɓoosia chi ankla ãrĩã serbiɓuu. Mimichia kuechekuɓuuɗe chi barkoɗe wãurimaaduanuuba chi ankla jiratabachiɗaa, nau doidu chaarea jiɗaurã chi barkoba chi chekuɓuu awãtabachia teratawẽa ni doidutawẽa, maka momaa druɗe wãkaabasia.

Mauɗeeba, chi Jeowaba asei aɗabaɗaɗe dachia ariɗe kereɗarã, mauɗe nejoma kĩrawãrea neebudauɗebena kʉ̃risiaɗarã, biʼia choroaɗapeɗa chaarea duanaɗayua problema taẽɗe duanuuɗe. Jeowaba jarabarii wãʼãe bai kerra, ni ẽbẽrarã beaɗapeɗa orroabadau, maucha supriɗaabai ni biuɗaabai (ochias chi rekuadro pakina 10ɗe). Dachia chi biʼia ɓuudu neeruu kʉ̃risiaɗarã añaa kãriɗaabai, Jeowa ichi normarãburu kawa ũriɗayua, chi miaɗaa ãrĩã ɓuu nau iujãa ẽbẽrarãba asekopanuu aseɗaabai.

Chi kĩrawãrea neebudau Jeowaba jaraɓuuɗebena mau bichi baita ɓua. Ichia kʉ̃riaɓuu bichi biʼiaburu nibai baita. Ichia kʉ̃riaɓuu “ẽbẽrarã jomaurã biuɗawẽa nureaɗayua” ¿Saka aseɗaiba biuɗawẽa nureaɗai baita? Ẽbẽrarã jomaurãba “biʼia kawabaraaɗai chi ariɗe ɓuuɗebena” (1 Timoteo 2:4). Chi nau karta asepeɗaaɗarãba kʉ̃riapanuu bichia kawayua chi ariɗe ɓuu Dachi Akõre beɗeaɗeeba biuwẽa nibayua. Chi Jeowaba jaraɓuu nejoma kĩrawãrea neebudauɗebena aude biʼia ɓuu chi ẽbẽrarãba iujãaɗebena jaraɗai ɓuu kañabara.

Chi biʼia neeburuuɗebena kʉ̃risiaɗarã, dachi poyaabai ɓuu kʉ̃risiaɗaabai, Dachi Akõreba puersa deaɗai nejoma ichia bustaruu aseɗayua (2 Corintios 4:7; Filipenses 4:13). ¿Maubʉ chi dachia nesitapanubama? Chi biʼia neeruuɗebena bichia espera kʉ̃riaabʉrã, kĩrajʉʉse, chi biʼia neeruu unui ɓua.

[Chi poto mauɗe chi rekuadro]

Sakayua esperaɗai ɓua chi biʼia neeburuu

Naarã testorã Bibliaɗebenaba dachi aiɗaɗai ɓua kʉ̃risiaɗayua nejoma kĩrawãrea neebudauɗebena:

◼ Dachi Akõreba jaraɓuu dachia kĩrajʉʉburu nureaɗaiɗebena.

Ichi beɗeaba jaraɓuu joma iujãa kĩrawãrea babiruu jomaurã ambua kĩrajʉʉ nureaɗai baita (Salmo 37:11, 29; Isaías 25:8; Apocalipsis 21:3, 4).

◼ Dachi Akõreba setaa jarakau.

Ichia bustakaa ẽbẽrarãba setaa jarapanuuɗe. Ichi jayoawẽ nibabarii mauɗe chi jipaburu asenii, mauɗeeba setaa jarakau (Proverbios 6:16-19; Isaías 6:2, 3; Tito 1:2; Hebreos 6:18).

◼ Dachi Akõreba joma poder baraaɓuu.

Jeowaburu aude poder baraanii. Ichia ase kʉ̃riaɓuuɗe wãʼãema ichi idabiɗaabayua (Éxodo 15:11; Isaías 40:25, 26).

◼ Dachi Akõreba kʉ̃riaɓuu dachi biuɗawẽa nureaɗai baita.

​(Juan 3:16; 1 Timoteo 2:3, 4).

◼ Dachi Akõreba dachiɗe chi biʼia ɓuudu kʉ̃risiaɓuu.

Dachia añaa asepanuuɗeburu ichia unukaa, bari dachi ẽbẽra bia duanuuɗe mauɗe chi biʼia ɓuu asepanuuɗe, ichia dachi kawa ochiabarima (Salmo 103:12-14; 130:3; Hebreos 6:10). Ichia kʉ̃riaɓuu dachi jipa kãribaɗayua mauɗeeba chi biʼia asepanuuba ichi kĩrajʉʉbiyua (Proverbios 27:11).

◼ Dachi Akõreba aiɗai aɗa dachia chi ase kʉ̃riakuɓuu aseɗayua.

Ichi baita trajanureerã ara ãstuburu duanaɗakaa. Dachi Akõreba aiɗabarima dachi ichi Jauriɗeeba, mau Jauri ara mau kĩra ichi poder mechia ɓuu (Filipenses 4:13).

◼ Ichiaburu jaraɓuu nejoma kĩrawãrea neebudauɗebena.

Jeowaba jipaburu asenii bẽe ichiɗe kereɗai ɓua, ichia dachi ɓuiɗaabai (Salmo 25:3).

[Poto]

Ara aɓau kĩra kaskoba idabikau boro puʼuayua, dachia nejoma kĩrawãrea neebudau kʉ̃risiapanuuɗe mauba kawawẽa kʉ̃risiabiɗaabai

[Poto]

Chi anklaba jãaduabii kĩrachaa, nejoma kĩrawãrea neebudauɗebena kʉ̃risiaɗarã dachi chaarea duanaɗai

[Chibari naarã potoɗebena naubʉ]

Ichia deasii René Seindal/Su concessione del Museo Archeologico Regionale A. Salinas di Palermo