¿Kairãba jaramaa duanaa chi beɗea biarã ʉ̃rʉbena?

Jeowaba ichi Kobiernoɗeeba iujãaɗe ẽbẽrarã ãrĩã supri duanuu akabaiɗea ira ɓua. ¡¿Sakayua nebʉrʉɗaabaima dachia ẽbẽrarãmaa nau beɗea biarãɗebena?! Jesusba kʉ̃ria ɓoosii ichi kaaɗe ãda nureerãba nau beɗea jaraɗayua iujãa jomauɗe (Mateo 28:19, 20). ¿Kãare ase duanua Jeowa ɗebena Jaranũrẽba Jesusba jaraɗa aseɗayua?

1. ¿Iɗi saka kumplimaa ɓua Mateo 24:14?

Jesusba naka jarasia: “Chi beɗea biarã Kobierno ʉ̃rʉbena iujãa jomauɗe jaradea panaɗayua” (Mateo 24:14). Jeowa ɗebena Jaranũrẽba ãrĩã bustabadau nau biʼia kiruu ʉ̃rʉbena jaraɗayu. Jaradeabadau nau beɗea biaɗebena 1.000 waa idiomarãɗe joma nau iujãaɗe. Nau trajo mechia ãrĩã ɓuu bẽrã, orden iɗaaburu aseyua mauɗe ãrĩã bereka jaradeɗekaɗayua. Jeowaba aiɗawẽe basirã, naarã poyaa aseebai ɓoosia.

2. ¿Kãare asebadaa ẽbẽrarãmaa jaradeɗekaɗai baita?

Ẽbẽrarã baraumaa jaradeɗekabadaa. Chi cristianorã nabẽrarãba asepeɗaaɗa kĩra, dai siɗa “decha” wãbadaa (Hechos 5:42). Ara jãka ordenɗe duanuu bẽrã, ãrĩãdu jaraɗai ɓua ẽbẽrarãmaa añocha. Maamina, ɓesesɗe ẽbẽrarã deeɗaa duanaɗakaa bẽrã, mauɗeeba jaradeɗekabadau ẽbẽrarã ãrĩã imibadaumaa biɗa. Dairãbara ochia kopanua ẽbẽrarãmaa Jeowa ʉ̃rʉbena jaraɗai baitaburu mauɗe ichia asei jara ɓuu ʉ̃rʉbena.

3. ¿Kairãba chi beɗea biarãɗebena jarabaraaɗaiba?

Chi cristianorã ariɗe nureerãba chi beɗea biarã jarabaraaɗai. Nau trajo dairã baita bariarãwẽe ɓuu. Daiba bereka jaradeɗekabadaa dai juaɗeeba, daiba kuitaa panua ẽbẽrarãba ũriɗawẽebʉrã ãchi kiniɗai ɓuu (1 Timoteo 4:16 leas). Nau trajo ase panuuɗeeba daimaa paaɗakaa, Bibliaba jara ɓuuɗeeba: “Bari deasiɗau bẽrã, bari deábaɗa” (Mateo 10:7, 8). Bariara jomaurãba ũriɗakamina, waaburu jaradeɗeka panua, jãkaburu daiba Jeowa kʉ̃ria iniɗau unubi panua mauɗe ichi kĩrajʉʉ ɓoayua.

AUDE KAWABA

4. Dairã bereka duanua joma ẽbẽrarãmaa neeɗai baita

BIDEO: Dairãba jaradeɗeka panua “drua kaitawẽe ãrĩã ɓeeɗe biɗa” (7:33)

• ¿Kãare aude busta baraa Jeowa ɗebena Jaranũrẽrãba ase panuu jaradeɗekaɗai baita?

Mateo 22:39 mauɗe Romanos 10:13-15 leaɗapeɗa, mambea nau ʉ̃rʉbena beɗeasturu:

• ¿Saka unubi panaa waabenarãmaa ãchi kʉ̃ria ãrĩã ira nuree jaradeabudauba?

• ¿Jeowaba saka unubaraa chi beɗea biarã jaradea duanuurã? (Versículo 15 ochiábaɗa).

5. Dachi Akõre ome traja panua

Jeowaburu ua kuɓua jaradeaɗe wãburuuɗe. Ochiaɗaika kãare pasasii puuru Nueva Zelanda abadauɗe. Kewaraa, Jeowa ɗebena Jara nibabarii Paul abadau, decha jaradeaɗe wãsiiɗe, ichia wẽra unusia. Ara mau diaɗe dapeɗeeɗa, chi jãu wẽraba ʉtaa wiɗiɗa basia Dachi Akõremaa ichi trʉ̃ Jeowaɗeeba, ichia wiɗiɗa basia junebenaba ũkuru ichi ʉ̃rʉbena kawabiyua. Paulba naka a ɓua: “Tres hora baɗakare mʉ aria koɓoosia ichi poroa toka ɓuu”.

1 Corintios 3:9 leaɗapeɗa, mambea nau ʉ̃rʉbena beɗeasturu:

• ¿Saka unubi ɓua jãu wẽramaa pasasiiba Jeowaburu chi jaradeɗeka duanuu uaɗo ɓuu?

Hechos 1:8 leaɗapeɗa, mambea nau ʉ̃rʉbena beɗeasturu:

• ¿Sakayua dachirãba nesita panua Jeowaba aiɗayua jaradeabudauɗe?

¿Bichia kuitaa ɓoosee?

Reunión semanachaɗebenaɗe ũkuru kawabi panua waarãmaa jaradeai baita. Bichi naarãɗebena reuniorãɗaa wã ɓuubʉrã, ¿saka unu ɓua bichia daimaa kawabi panuu waabenarãmaa jaradeaɗai baita?

6. Daiba kauwa ũri duanua Dachi Akõre waarãmaa kawabibudauɗe

Nabẽraeɗeeɗa, chi Jesús kaaɗe ãda nureabadaurã iadaa nureerãba berekasiɗaa jaradeɗekabiɗaamaaba. Naarã cristianorã nabena ãchia defendesiɗaa chi derecho jaradeɗekaɗai baita, ãchi “wãsiɗau juezrã kĩrapeta ãchimaa ida jaradeɗekabiɗayua” (Filipenses 1:7). Iɗibea, Jeowa ɗebena Jaranũrẽrãba ara jãka ase duanua.a

BIDEO: Dairã wãbadaa juezrã kĩrapeta daimaa ida jaradeɗekabiɗayua (2:28)

Hechos 5:​27-42 leaɗapeɗa, mambea nau ʉ̃rʉbena beɗeasturu:

• ¿Sakayua ida ɓueɗaabaiba jaradea panuu? (Versiculorã 29, 38 mauɗe 39 ochiábaɗa).

NAU KAWASIƊAA

Jesusba ichi kaaɗe ãda nureabadaurã bʉekasia iujãa jomauɗe jaradeaɗayua. Jeowaba aiɗamaa ɓua ichi baita traja duanuurã jaradeɗekaɗayua.

Waya berreaɗaika

• ¿Kãare ase duanaa joma iujãaɗe beɗea biarã ʉ̃rʉbena jaradeɗekai baita?

• ¿Saka unubi panaa waabenarãmaa ãchi kʉ̃ria ãrĩã ira nuree jaradeabudauba?

• ¿Bichia kʉ̃risia ɓue waabenarãmaa jaradeɗekaaruuba dachi kĩrajʉʉbii ɓuu? ¿Sakayua?

NAU OCHIAS MAUCHABURU KAWAYUA

Ochias saka jaradea panuu Jeowa ɗebena Jaranũrẽrãba puuru choromarãɗe.

Parisɗe ẽbẽrarã ãrĩã unubadaumaa chi carro kartarã deɗekabariiɗeeba jaradeabadaa (5:11)

¿Saka asesiɗaa Jeowa ɗebena Jaranũrẽba jaradeɗekaɗai baita chi ãchi druaɗebena wãuripeɗaaɗa baɗa?

Dachi Akõre ʉ̃rʉbena jaradeɗeka panua chi ãchi druaɗebena wãuripeɗaaɗa baɗamaa (5:59)

Ũris saka wẽra niiba Dachi Akõre ʉ̃rʉbena jaradea ɓuuba kĩrajʉʉ nii.

Mʉ puuru choromacha wãɗa basia jaradeɗekai baita (6:29)

Ochias saka Jeowa ɗebena Jaranũrẽrã kobernador kĩrapeta wã panuu ãchimaa ida jaradeɗekabiɗayua.

“Chi Dachi Akõre Kobierno ʉ̃rʉbena jaradea nureerã juezrã kĩrapeta wãusiɗaa” (El Reino de Dios ya está gobernando, capítulo 13)

5. 1914ɗe nau iujãa o ãi wãsia

BIDEO ochiábaɗa.

BIDEO: 1914ɗe nau iujãa o ãi wãsia (1:10)

Jesusba jaraɗa basia chi iujãa saka ɓooyu ichia koberna koɓeeɗakare. Lucas 21:9-11 leaɗapeɗa, mambea nau ʉ̃rʉbena beɗeasturu:

• Chi Bibliaba jara ɓuu pasaiɗebena, ¿bichia kãare unupeɗa mauɗe kãare ũri ɓua?

Apóstol Pabloba jaraɗa basia saka panayu ẽbẽrarã chi último diarãɗebenarãɗe. 2 Timoteo 3:1-5 leaɗapeɗa, mambea nau ʉ̃rʉbena beɗeasturu:

• Nau textoɗe jara ɓuuɗebena, ¿kãare unu ɓua bichia?

6. Dachirãba chi Dachi Akõre Kobierno kobernamaa ɓuu kuitaa panuu bẽrã, dachirã apii duaneeɗaabayua

Mateo 24:3, 14 leaɗapeɗa, mambea nau ʉ̃rʉbena beɗeasturu:

• ¿Kãare trajo biʼia ãrĩã ɓuu unubi ɓua chi Dachi Akõre Kobierno jãabera kobernamaa ɓuu?

• ¿Bichi saka nau trajoɗe ɓeei ɓua?

Chi Dachi Akõre Kobierno jãabera kobernamaa ɓua, maabea ara ɓaʼãraburu kuɓuu ichia chi iujãa koberna neeyua. Hebreos 10:24, 25 leaɗapeɗa, mambea nau ʉ̃rʉbena beɗeasturu:

• ¿Kãare aseɗaiba jomaurãba “chi jãu día neemaa ɓuu bẽrã”?