¿Kãarea ne miadaa baraba mauɗe ẽbẽrarã supri duanaa?

Ne kachirua ãrĩãdu unubudauɗe, ẽbẽrarãba wiɗibadau “¿Sakayua jãu pasasaa?”. Ariɗe ɓua Bibliaba jara ɓuu nau ʉ̃rʉbena.

1. ¿Kãare asesaa Satanasba ne kachirua iujãaɗe neebii baita?

Chi Jʉbawãe nii, Jeowa ome kĩrusia. Ichiaburu waabenarã ua ɓuu kʉ̃ria ɓoosii bẽrã, ichia waubiasia nabẽrarã Adán Eva ome ãchi siɗa Jeowa ome kĩruɗayua. Ichia Evamaa setaa jarasiiba miadaa waubiasia (Génesis 3:1-5). Ichia kʉ̃risiabiasii Jeowaburu chi biʼia ɓuu wãakamaa ɓuu maabea chi jãra biʼiwẽe ɓuu apeɗa. Ichia jara kʉ̃ria ɓoosiira ẽbẽrarã kĩrajʉʉ nureaɗai ɓoosii Jeowa beɗea ũriɗawẽebʉrã. Ichia Evamaa ãchi biuɗaabai apeɗa jarasiiba, jãma setaa nabena jarasia. Mauɗeeba Bibliaba jarabarii “ichi setaa jarabarii mauɗe ichi chi akõre setaaɗebenabʉ” (Juan 8:44).

2. ¿Kãare asesiɗaa Adán Eva omeeba?

Jeowa Adán Eva ome jua keɗee sua nibasia. Ichia jarasiira joma bakuruɗebena jõ koɗai ɓuu maamina aɓa ɓuu bakuruɗebena koɗaabai apeɗa (Génesis 2:15-17). Mau adua, ãchia mau bakuruɗebena kosiɗaa. Evaba “chi jõ adaupeɗa ko koɓeesia”. Maabea, mau kaaɗe, Adanba “ko koɓeesia” (Génesis 3:6). Mauɗeeba ãchi omeerãba Dachi Akõre beɗea ũriɗaabasii. Ãchirã ome jipa nibasiɗa bẽrã, ãchirã ne kachirua wauɗai baita panaɗaabasia. Mauɗeeba, ãchia Dachi Akõre beɗea ũriɗaamaa kopaneesii ãchi kʉ̃riaɗeeburu, nakaburu ãchia ida ɓuisiɗau Dachi Akõreba ãchi ua ɓooi baɗa. Nauba ãchi ãrĩãdu supri paneesia (Génesis 3:16-19).

3. ¿Adán Eva baare asesiɗauba dachirã saka duaneesaa?

Adán Eva omeeba ne kachirua asesiɗauɗe, maabea ãchirã jipa panaabasia, mauɗeeba ãchi warrarãmaa jãu deɗeka ɓuisiɗaa. Bibliaba Adán ʉ̃rʉbena jara ɓua: “Ẽbẽra aɓa niiɗeeba chi pekao nau iujãaɗe neesii mauɗe mau pekaoɗeeba dachi biuɗai neesii, makaburu jomaurã ẽbẽrarã biuɗai panuu” (Romanos 5:12).

Makarã, ¿sakayua dachirã supri duanaa? Ɓesesɗe, dachirãba ãyaa asebadauɗeeba. Makawẽebʉrã, waarãba ãyaa aseɗai kʉ̃risiabadauɗeeba. Maebʉrã, kosarã dachia pasaabai kʉ̃risiapeɗaaɗaba (Eclesiastés 9:11 leas).

AUDE KAWABA

4. Chi culpa bara ɓuu dachirã supri duanuu kakua

Ẽbẽrarã aribiaurãba kʉ̃risiabadau Dachi Akõreburu nau iujãa ira ɓuu. ¿Maamina mau makabaaka? BIDEO ochiábaɗa.

BIDEO: ¿Kaiba ira ɓua nau iujãa? (1:24)

Santiago 1:13 mauɗe 1 Juan 5:19 leaɗapeɗa, mambea nau ʉ̃rʉbena beɗeasturu:

• ¿Dachi Akõre culpa bara ɓue supriɗapeɗa mauɗe ne kachirua barauɗebena?

5. Satanasburu ira ɓuu bẽrã chi iujãa dachia chi kachiruadu unu panua

BIDEO: ¿Sakayua Dachi Akõreba idaarabi ɓua supriɗayua? (Bideo ɓaʼãra) (3:07)

Génesis 3:1-6 leaɗapeɗa, mambea nau ʉ̃rʉbena beɗeasturu:

• ¿Kãare setaa jaraɗaba Satanasba? (Versiculorã 4 mauɗe 5 ochiábaɗa).

• ¿Saka jaraɗaba Satanasba Jeowaba bia ɓuu wãaka ɓuu ʉ̃rʉbena?

• Satanasɗeebara, ¿ẽbẽrarãba nesita panue Jeowaba ãchi koberna ua ɓoayua kĩrajʉʉ duanaɗayua?

Eclesiastés 8:9 leaɗapeɗa, mambea nau ʉ̃rʉbena beɗeasturu:

• Jeowa chi nau iujãaɗebena kobernawẽa ɓuumisa, ¿saka duanaa ẽbẽrarã?

1. Adán Eva ome jipa panaɗapeɗa mauɗe chi iujãa mipitaa kiruuɗe panasii, maamina ãchia Satanás beɗea ũriɗapeɗa maabea Jeowa ome kĩrusiɗaa.

2. Adán Eva baare Dachi Akõre ome kĩru kopaneeɗakare, joma iujãaɗe ẽbẽrarã pekao baara duaneeɗapeɗa, supriɗapeɗa mauɗe biuyuɗe duaneesiɗau.

3. Jeowaba akabayua supri duanuu mauɗe kini duanuuɗebena maabea ẽbẽrarã joma jipa duaneeɗai mauɗe chi iujãa kĩrawãrea kiruuɗe duanaɗayua.

6. Jeowa nomaa aka ɓeebarii dachi supribudauɗe

¿Dachi supribudauɗe Jeowaba dachi ʉ̃rʉbena kauwa kʉ̃risia ɓoabaaka? Ochias kãare ɓʉsiɗau chi rey David mauɗe apóstol Pedroba. Salmo 31:7 mauɗe 1 Pedro 5:7 leaɗapeɗa, mambea nau ʉ̃rʉbena beɗeasturu:

• ¿Bichi saka senti baraa kuitaaruuba Jeowaba kauwa ochia ua ɓua chi problemarã maabea ichi nomaa aka noɓeebarii dachi supri ɓuu unuuruuba?

NAU KAWASIƊAA

Satanás Adán Eva baare ãchiaburu deasiɗaa iujãaɗe supriɗai baita mauɗe ne kachirua barau siɗa. Jeowa nomaa aka ɓoobarii dachi supribudau unuburuuɗe mauɗe ichia chi supri duanuu akabaiɗea ira ɓua.

Waya berreaɗaika

• ¿Kãare setaa jarasaa Diabloba Evamaa?

• ¿Adán Eva omeeba asesiɗauba iɗibea dachirã saka duanaa?

• ¿Sakayua dachirãba jara panua Jeowa nomaa aka ɓoobarii dachi supribudau unuuruuba?

NAU OCHIAS MAUCHABURU KAWAYUA

Kawas kãare jara ɓuu Bibliaba pekao ʉ̃rʉbena.

“¿Kãareba mau pekao?” (Artículo jw.org ɗebena)

Mauchaburu leas kãare jarasii Satanasba chi Edenɗe.

“¿Sakayua Dachi Akõreba idaarabi ɓua supriɗayua?” (Chi Kartaba, 1 eneroɗe 2014ɗebena)

Unus biʼia jara ɓuu dachi kãareba biʼia ãrĩãdu sentibi ɓuu maabea panaus beɗea chaarea ãrĩã ɓuuɗebena.

“¿Sakayua Dachi Akõreba idaarabisaa judiorã ãrĩãdu kenasiɗauɗe?” (Artículo jw.org ɗebena)

Ochias mukĩra niiba ẽbẽrarã ãrĩãdu supri duanuu unuɗa baɗa.

Mʉ jãabera du aɓa ɓuuwẽe (5:09)

Chi naa nibapeɗaaɗa baɗa ẽbẽrarã, Adán Eva omeeba, ũriɗaabasii Dachi Akõre. Jãuɗéburu dachi pekao aseɗapeɗa, supri duanapeɗa mauɗe biubari panua.a Maka ɓumina joma perdewẽa. Jeowaba chi Warr iujãaɗaa bʉiɗa baɗaa dachi kakua biubiyua, ara jãuburu dachi pekao baraa nibaɗaabapeɗa biuɗaabayua. Bibliaba jara ɓuu Jesús biusiiba, dachi aiɗa ɓua. Jesusba paasii ichi biʼia kĩra jipa nibaɗa biusiiba (Mateo 20:28 leas). Jesús kĩra jipa nibasiiɗeeba ũri nibasia Jeowa, jãuɗéburu ichi biuwẽa nibai baɗa nama iujãaɗe nibasiiɗe. Maka ɓumina, ichi nibai baɗa dachirã kakua deaɗa baɗaa mauɗe waya adauɗayua joma dachi perdepeɗaaɗa baɗa Adán mauɗe Evaɗeeba. Mauɗe ichia unubisii Jeowaba dachi kʉ̃ria ua nii mauɗe ara ichia biɗa. Cha nau lesionɗe kawaɗayua ara kiruma a jarabaraaɗai chi Jesús biuɗa baɗaɗeeba.

1. ¿Saka aiɗa ɓua jãabea chi Jesús biuɗa baɗaba?

Dachia pekao ira panuu bẽrã, miadaa ɓee ãrĩã ase nurea Jeowaba bustaka ɓuu. Maka ɓumina dachi amiko bia ãrĩã nureaɗayua Dachi Akõre ome, dachi biawãrabenaɗe arrepentibudaubʉrã dachi pekaoɗebena maabea wiɗiɗayua Jeowamaa, mauɗe Jesusɗeeba dachi perdonábaɗa aɗayua. Dachia berekaɗaibʉrã waya jãu miadaa ɓuuɗe ɓaeɗaamaaba (1 Juan 2:1). Bibliaba jara ɓuu: “Cristo ɓes aɓaburu biusia dachirã pekao kakua, aɓa kĩra jipa niiɗe kĩra jipaswẽe nuree kakua, machi wayaburu Dachi Akõre kaita duanayua” (1 Pedro 3:18).

2. ¿Saka aiɗa ɓubaama ɓoapeɗa Jesús biuɗa baɗaba?

Jeowaba bʉisii chi Warr Jesús ichi kĩra jipa nibaɗa deayua “ichiɗe [Jesusɗe] kerea ɓuu kiniimaaba, bari biuwẽa nibayua” (Juan 3:16). Ara jari Jesús asesiiba, Jeowaba akabayua joma chi miadaa ɓuu ɓuipeɗaaɗa baɗa Adán Eva omeeba ũriɗaabasiiɗeeba. Jãuɗéburu, dachirã fe bara duanuubʉrã Jesús biuɗaɗebena, biʼia nureaɗapeɗa biuɗawẽa nureaɗayua chi iujãa kĩrawãrea ɓeeruuɗe (Isaías 65:21-23).

AUDE KAWABA

3. Jesús biusiiba dachi pekao baraa nibaɗaabapeɗa biuɗaabayua

BIDEO: ¿Sakayua Jesús biusaa? (parte 1) (2:01)

• ¿Kãare biʼia inibai baɗa perdesaa Adanba Dachi Akõre ũriwẽe basiiba?

Romanos 5:12 leaɗapeɗa, mambea nau ʉ̃rʉbena beɗeasturu:

• ¿Kãare dea ɓua bichimaa chi pekao Adanɗeeba?

Juan 3:16 leaɗapeɗa, mambea nau ʉ̃rʉbena beɗeasturu:

• ¿Jeowaba sakayua bʉiɗaba chi Warr iujãaɗaa?

1. Adán mukĩra kĩra jipa nibaɗaa mauɗe chi Dachi Akõre ũriibasiiɗeeba, dachi ẽbẽrarã pekao baraa nureapeɗa biuɗayuɗe duaneeɗaa.

2. Jesús mukĩra kĩra jipa nibaɗaa, ichia Dachi Akõre ũri nibasii bẽrã chi o ewaɗa basia jomaurã ẽbẽrarã kĩra jipa nureaɗapeɗa biuɗawẽa nureaɗai baita.

4. Chi Jesús biuɗaba ãrĩã aiɗai ɓua ẽbẽrarã nau iujãaɗebenarã

BIDEO: ¿Sakayua Jesús biusaa? (parte 2) (2:00)

• ¿Mau saka ɓooiba chi Jesús biuɗaba chi ẽbẽrarã jomaurã aiɗai baita?

1 Timoteo 2:5, 6 leaɗapeɗa, mambea nau ʉ̃rʉbena beɗeasturu:

• Adán mukĩra kĩra jipa nibaɗaa mauɗe chi Dachi Akõre ũriibasiiɗeeba dachi ẽbẽrarã pekao baraa nureapeɗa biuɗayuɗe duaneeɗaa. Jesús siɗa mukĩra kĩra jipa nibaɗaa. ¿Kãare asesaa ichia “ẽbẽrarã aiɗakuayua”?

5. Jesús biuɗa baɗa jãu rekalo Jeowaba dearuu kĩraka ɓua bichimaa

Dachirãba kʉ̃risia panuu Jesús biuɗa baɗa jãu rekalo deɗekaburuu kĩraka dachirã aɓaaɓaarãmaa. Nau ʉ̃rʉbena kawai baita, Gálatas 2:20 leaɗapeɗa, mambea nau ʉ̃rʉbena beɗeasturu:

• ¿Kãare jaraɗaba apóstol Pabloba chi Jesús biuɗaba rekalo kĩraka ɓoosii ichi baita?

Adán miadaa asesiiɗe, ichi mauɗe ichi warrarã baara biukuaɗayuɗe duaneeɗa baɗaa. Maka ɓumina Jeowaba ichi Warr iujãaɗaa bʉiɗa baɗaa ichi biuyua, jãuɗéburu bichi waaburu nibayua biuwẽa.

Cha naarã versiculorã leaburuuɗe, kauwa ochiaba Jeowa saka sentisii chi Warr biumaa ɓuu unusiiɗe. Juan 19:1-7 mauɗe 16-18 leaɗapeɗa, mambea nau ʉ̃rʉbena beɗeasturu:

• ¿Bichi saka sentibaraa kʉ̃risiaburuuɗe Jeowa mauɗe Jesús omeeba asesiɗau bichi kakua?

NAU KAWASIƊAA

Jesús dachi kakua biuɗa bẽrã, Jeowaba dachi pekaorã perdona ɓua maabea waaburu nureaɗayua biuɗawẽa.

Waya berreaɗaika

• ¿Sakayua Jesús biusaa?

• ¿Sakayua Jesús ichi kĩra jipa nibasiiba ẽbẽrarã aiɗakuasaa?

• ¿Saka aiɗai ɓua bichi Jesús biuɗaba?

NAU OCHIAS MAUCHABURU KAWAYUA

Kawachãu bichia sakayua Jesús kĩra jipa nibaɗaba dachi aiɗasaa.

“¿Saka Jesús biuɗaba ‘jomaurã aiɗa ɓua’?” (Artículo jw.org ɗebena)

Kawa jʉrʉse kãare aseɗayu dachi biuɗawẽa nureaɗai baita.

“¿Jesusba saka dachi aiɗa ɓua?” (Artículo jw.org ɗebena)

¿Biawãrabaaka Jeowaba dachi pekao miadaabena aseɗa baɗa perdona ɓuu?

“Panauɓee Bibliaɗebena wiɗiɓee” (Chi Kartaba, 1 mayoɗe 2013ɗebena)

Mukĩra aɓa nii ichi miadaabena aseɗa baɗa mauba kachirua senti nii, maka ɓumina kawasiiɗe Jesús biuɗa baɗa miadaa nibaɗa ida ɓusia. Lease ichi ʉ̃rʉbena nebʉrʉ ɓuu.

“Mʉ chĩo nibabarii nibaɗa jãabera ida ɓusia” (Artículo jw.org ɗebena)