• ¿Bichia saka jaradeai ɓua chi beɗea biarã?
    Saka kĩrajʉʉ biuwẽa nibaiba Bibliaɗebena kawaniiba

    • 1. ¿Saka nebʉrʉi ɓua waarãmaa bʉa kawa ɓuuɗebena?

      Chi Jesús kaaɗe ãda nureerãba naka jarapeɗaaɗaa: “Chi daiba unupeɗaaɗa mauɗe ũripeɗaaɗa jaraɗai poyaa ida ɓuɗaabai” (Hechos 4:20). Ãchirãba chi biawãra kawapeɗaaɗa kʉ̃ria duanasiiɗeeba, jara kʉ̃ria panasia jomaurãmaa. ¿Bichis ara jãka senti ɓuka? Jʉrʉba saka beɗeayu respeto iɗaa bichi deɗabenarã mauɗe amikorãmaa bichia kawa ɓuuɗebena (Colosenses 4:6 leas).

      Bichi saka erdaui ɓua beɗeayua

      • Beɗeaburuuɗe deɗabena ome, naka erdauba beɗeayu Bibliaɗebena “Cha nau semana kawasii biʼia ãrĩã ɓuuɗebena”.

      • Bichi amiko ẽpermo kuɓuuɗe, maebʉrã preokupa kuɓuuɗe, texto Bibliaɗebena unubiba biʼia sentibii baita.

      • Bichi baare traja duanuurãba wiɗibudauɗe saka wãsii chi saɗoɗe mauɗe misaɗe, nebʉrʉs ɓaʼãra kawaɗa baɗa chi Bibliaɗebena maebʉrã ɓaʼãra kawaɗa baɗa reunión konkrekasionɗebena.

      • Kawabise bichi amikorã chi sitio internetɗebena jw.org.

      • Waabenarã imibiba bichi ome Bibliaɗebena kawabiyua, mauɗe unubise saka wiɗiyu ichimaa Bibliaɗebena kawabii baita jw.org ɗe.