BIʼIWẼE NIIƊE KɄ̃RISIAYU BIʼIA NIBAI BAITA

¿MAU KÃAREBA?

Bi’iwẽe wãburuuɗe bi’ia kʉ̃risia kawayu chi ariɗe ɓúturu nomaa paneemaaba. Nauɗebena ɓiɗĩi ɓiɗĩia kawaɗayua. Ara jari warra cheke ʉtaa wãburuu drupeɗa jeeɗa ɓaebarii, maka nii wãbarii kĩra, chi nuree problema bara ɓuu tãeɗe biɗa naa tʉabadaa.

¿SAKÃERA MAU IMPORTANTE ƁUA?

Chi nuree warra chekerã nomaa akʉ paneebadaa ãchi ase kopanuu bi’ia asewẽeɗe, problema bara ɓuuɗe makawãebʉrã ãchimaa jãka bi’iawẽe ɓuma abudauɗe, chi nuree warra cheke poyaaɗawẽa ɗiɗibadaa. Maka ɓumina, bi’ia ɓuu nau kawaɗai baita:

• Poyaaɗakaa joma bi’ia asei baita (Santiago 3:2).

• Jomaurã ɓooyua dachi baita neeyu bi’ia duanaɗaabai baita (Eclesiastés 9:11).

• Jomaurã nesita nurea dachimaa jãu bi’iwẽe ɓua aɗai baita. Ara jãkaburu kawaɗayua (Proverbios 9:9).

Bichi warr biʼiwẽe niiɗe kʉ̃risiayu biʼia nibai baita, waripeɗa problema baraaruuɗe ichia kawa nibayua saka bi’iaburu ase nibayu.

¿SAKA BICHI WARRMAA JARADEAIBA ICHI BIʼIWẼE NIIƊE KɄ̃RISIAYU BIʼIA NIBAI BAITA?

Bi’iwẽe asebudauɗe

CHI BIBLIABA JARA KUƁUU: “Bariara chi jipa nii sieteɗe ɓaeburuu siɗa waya piradruyua” (Proverbios 24:16).

Aiɗaba bichi warr bi’ia kʉ̃risiai baita. ¿Examenɗe bi’iwẽe ɓoosiibʉrã, ichia kãare aseiba? ¿Ichi poyaawẽe ayuẽ, “¡Joma mʉ baita bi’ia ɓeewẽe ayuẽ!”?

Bichi warrmaa bi’ia kʉ̃risiayu kawabiiruu bi’ia wãwẽeɗe, aiɗa kʉ̃risiabiba kãare aseyu bi’ia wãi baita. Maka ochiayua kãare aseyu chi problema bi’ia adaui baita.

Idaarabiba ara ichidu aɓa chi problema ochiai baita, bichiara aserã́ba. Bichia wiɗii ɓua: “¿kãare aseiba bichia bi’ia kawai baita chi jaradeabariiba jaradea awa kuɓuu dachi kachirua pasaaruuɗe?”.

Bi’iwẽe pasaburuuɗe

CHI BIBLIABA JARA KUƁUU: “Maamina machiba adua panuu nubena ewariɗe kãare sãai” (Santiago 4:14, Biblia Chamí WPS.).

Adua nubena kãare pasaɗai ɓuu. dachi nejarra bara ɓooɗa iɗi maebʉrã nu jãka perdei ɓua mauɗe kawaɗawẽeɗe ẽpermaɗai ɓua. Ara jari Bibliaba jara ɓuu kĩraka, “Chi isa pirabadaurã jãarãbara pirabadau joma kanaɗakaa, ni ichi aude poder bara nureerãba kanaɗakaa chi peleabudauɗe, [...] Jomaurãmaa kachirua ɓooyu siɗa neebaria mauɗe dachia adua koɓooɗa baɗa chi pasayuɗebena siɗa neebaria” (Eclesiastés 9:11).

Bichia bichi warr cuidaburuu kachirua pasabiimaaba. Joma bichia cuidaabayua chi problema bara ɓoi baita.

Bichi warr kũudrãa ãrĩã nii baerã kʉ̃risiakaa trajo wã’ãe maebʉrã mʉ nejarra wã’ãe, nauɗeburu kʉ̃risiai ɓua mʉ amikoba mʉ ɓuisii, maebʉrã mʉ deɗabena aɓa biusii.a

Chi niiba jaraburuuɗe bichi kachirua ase ɓuu aaruu

CHI BIBLIABA JARA KUƁUU: “Consejo deaduu ũriba [...] kuitaa ɓuu nibai baita” (Proverbios 19:20).

Chi niiba bichimaa jaraburuuɗe bichi kachirua ase ɓuu, mauba bichi nomaawẽebayua bari jara panuu ida ɓúbaɗa bichi kachirua ase ɓuu a panuu.

Bichi warrmaa jaradea niibʉrã, ũriba consejo deabudau a niibʉrã, ichi ni bichi siɗa ãrĩã supriɗaabayua. Akõre nii John abadauba jara ɓuu. “Bichiaburu chi problema joma arregla ɓuubʉrã bichi warrɗe, bichi warrba kawaabayua ara ichidu aɓa arregla nibai baita. Ara jãka bichíturu ichi kaaɗe nibayua problemarã arreglayua. Jãka bi’iwẽe ɓooyua omerã baita”.

¿Saka aiɗai ɓua bichia bichi warr ichia ũri baita junebenaba jãka aserã́ba aaruuɗe, chi niiba jãkarã́baɗa aaruuɗe escuelaɗe maebʉrã awara biɗa?. Ichimaa jãka aseɗaabai ɓoosiiɗe aabayua. Mau kãyabãra wiɗiiba:

• “¿Sakãera kuitaa ɓua bichi jãkarã́baɗa asiɗau?”.

• “¿Saka bi’ia nibai ɓua?”.

• “¿Kãare aseiba maucha araɓau aseeruu pasaaruuɗe?”.

Kʉ̃risiaba, bichi warrba kawaaruubʉrã ũri baita jãkarã́baɗa abudauɗe, jãu serviyua ara nauɗe mauɗe dawara baaruuɗe biɗa.