LESION 34
¿Saka unubiɗaiba Jeowamaa dachia kʉ̃ria ãrĩã nuree?
¿Bichi ara Dachi Akõre kaita ɓuu senti ɓuka Biblia kawa koɓeesii bẽrã? ¿Bustai ɓuka bichi ichi ome amiko aude chaarea ɓooyu? Maka ɓuu bẽe, Jeowaba unu ɓuuɗe bichia ichi aude kʉ̃ria ɓuu maabea ichia bichi kʉ̃riapeɗa ochia uayua. ¿Saka unubii ɓua bichia ichi kʉ̃ria nii?
1. ¿Saka unubi panaa Jeowamaa dachia kʉ̃ria nuree?
Ichia jaraburuu joma ũri panuubʉrã, unubi panua dachia kʉ̃ria nuree ichi (1 Juan 5:3 leas). Maka ɓumina Jeowaba ẽbẽrarã obligakaa ichi ũriɗayua. Dachimaa kʉ̃risiabi ɓuu dachia ũriɗa kʉ̃ria nuree makawẽebʉrã ũri kʉ̃riaɗawẽa nuree. ¿Sakayua? Jeowaba kʉ̃ria nii bẽrã dachirãba “ũri nureaɗapeɗa dachi corazonɗeeba” (Romanos 6:17). Ichia kʉ̃ria nii bichia ichi ũriyu kʉ̃riaɗeeba. Chi 3 mauɗe Chi 4 cha nau libroɗebenaba aiɗa ɓua bichi ichi kʉ̃riayua omeɗebena: ichia bustabarii aseyu mauɗe ichia bustakaa ɓuu aseebayu.
2. ¿Sakayua chaarea ɓua unubiyu Jeowamaa dachia kʉ̃ria nuree?
“Chi ẽbẽra jipa nii supri ɓua ãrĩãdu” (Salmo 34:19). Jomaurãba bereka panuu chi miadaa ɓee ase kopanuu ida ɓuiɗai baita. Mauɗe, dachi problema baraa duanuu chi nejarra wãʼãeɗeeba, mauɗe chi miadaa ɓee pasa duanuu ẽbẽrarã bia kirureerãmaa kakua, mauɗe junebena siɗa ara jãu kĩra. Dachi problema baraa duanuuɗe, chaarea ɓua aseɗayu Jeowaba kʉ̃ria ɓuu kĩra. Dachirã isa wã kʉ̃ria panuu o miadaa ɓuuɗe. Maamina, bichia berekapeɗa aseyua chi Jeowaba jarabarii, bichia unubi kuɓuu ichi aude kʉ̃ria nii. Mauɗe unubi kuɓuu bichi jipa nibayua ichi ome. Mauɗéburu, ichi bichi ome jipa nibapeɗa mauɗe ɓuibayua (Salmo 4:3 leas).
AUDE KAWABA
Ochiaɗaika sakayua dachia ũri panuubʉrã biʼia ãrĩã ɓuu Jeowa baita, mauɗe kãareba aiɗayua dachi jipa nibaɗai baita.
3. Cha nau siɗa bichi baita
Bibliaɗe libro Jobɗe jara ɓuuɗeebara, chi Satanasba setaa jarasii Job ʉ̃rʉbena, mara Job baitaburuwẽe, mau jomaurã chi Jeowa baita traja kʉ̃ria nureerãmaa. Job 1:1 mauɗe 1:6-2:10 leaɗapeɗa, mambea nau ʉ̃rʉbena beɗeasturu:
Satanasba jarasiiɗeebara, ¿sakayua Job ichia ũri nibasii Jeowa? (Job 1:9-11 ochiábaɗa).
¿Kãare setaa jarasaa Satanasba jomaurã ẽbẽrarã ʉ̃rʉbena mauɗe bichi ʉ̃rʉbena siɗa? (Job 2:4 ochiábaɗa).
Job 27:5b leaɗapeɗa, mambea nau ʉ̃rʉbena beɗeasturu:
¿Job ichia saka unubiɗaba biawãrabenadu kʉ̃ria nibaɗa Jeowa?
Job ichi jipa nibasiiɗeeba, unubiɗa baɗaa Jeowa kʉ̃ria nibaɗa.
Dachirã jipa nureabudauba, unubi panua Jeowa kʉ̃ria nuree.
4. Jeowa kĩrajʉʉbise
Proverbios 27:11 leaɗapeɗa, mambea nau ʉ̃rʉbena beɗeasturu:
¿Saka sentibaraa Jeowa bichia ichi ũriiruuɗe mauɗe chi biʼia ɓuu aseburuuɗe? ¿Sakayua?
5. Bichi jipa ãda nibayua Jeowa ome
Dachia Jeowa kʉ̃ria panuubʉrã, junebenamaa biʼia jaraburuu ichi ʉ̃rʉbena. Mauɗe dachirã jipa nuree bẽrã ichi ome, mau aseburua fácil ɓuuwẽe siɗa. BIDEO ochiaɗapeɗa, mambea nau ʉ̃rʉbena beɗeasturu:
¿Bichimaa chaarea ɓoobarika beɗeayu ẽbẽramaa Jeowaɗebena?
Bideoɗe unubi ɓuu kĩraka, ¿Graysonba saka ida ɓuɗa basaa chi pera nibaɗa?
Dachia bustaburuuɗe chi Jeowaba bustabarii mauɗe iadaaburuuɗe chi ichia iadaabarii, jãkaburu jipa nibaɗayua ichi ome. Salmo 97:10 leaɗapeɗa, mambea nau ʉ̃rʉbena beɗeasturu:
Chi bichia kawasiiɗebena namauɗaa, ¿Jeowaba kãare kʉ̃ria nia? ¿Jeowaba kãare iadaa nia?
¿Bichia saka kawai ɓua kʉ̃riayu chi biʼia ɓuu mauɗe iadaayu chi miadaa ɓuuɗebena?
6. Jeowa ũri nibayu biʼia ɓua dachi baita
Ũri nibayu Jeowa jãdu biʼia ɓua. Isaías 48:17, 18 leaɗapeɗa, mambea nau ʉ̃rʉbena beɗeasturu:
¿Bichia kerea ɓue Jeowaba kuitaa ɓuu kãaredu biʼia ɓuu dachi baita? ¿Sakayua jãka kʉ̃risia ɓua?
Chi Bibliaɗebena mauɗe Jeowa, Dachi Akõre biawãrabena nii ʉ̃rʉbena kawaaruuba, ¿saka aiɗa ɓua ara nauɗaa?
CHI NUREE ẼBẼRARÃBA NAKA JARABADAA: “Dachi Akõreba kʉ̃risiakaa mʉa aseburuu”.
¿Sãu texto Bibliaɗebena unubii ɓua dachia aseburuuba Jeowa biʼia aka ɓeebiyu makawẽebʉrã biʼiwẽe aka ɓeebiyu?
NAU KAWASIƊAA
Bichia Jeowamaa unubi ɓua ichi kʉ̃ria nii, ũriburuuɗe mauɗe jipa nibaaruuɗe ichi ome bariara problema bara ɓuu adua.
Waya berreaɗaika
¿Kãare kawa ɓua bichia Jobɗebena?
¿Bichia saka waaburu kʉ̃ria nibayua Jeowa?
¿Kãareba aiɗai ɓua bichi jipa nibayua Jeowa ome?
NAU OCHIAS MAUCHABURU KAWAYUA
Kawaba saka jipa nibayu Jeowa ome mauɗe chi konkrekasion ome biɗa.
Maucha kawaba setaa jaraɗa baɗa Satanasba ẽbẽrarã ʉ̃rʉbena.
Ochiaba saka warrarãba unubiɗai ɓua kʉ̃ria nuree Jeowa.
¿Saka chi kũudrãarã jipa nureaɗai ɓua Jeowa ome bariara waabenarã kũudrãarãba kʉ̃ria duanuu siɗa miadaa ɓuu aseɗayua?