Saka jayoaswẽe panaɗai ɓuu Dachi Akõreba bustabarii kĩra

Kʉ̃risiaba nawe kʉ̃ria kiɗiiba ichi warr escuelaɗaa bʉeyua, naeɗe ichia ochiabarii ichi kuiɗe wãpeɗa mauɗe biʼia jayoaswẽe jʉ̃yua. Mau ase ɓuu bẽrã chi warr ẽpermawẽa koɓeebarii mauɗe waabenarãmaa unubibarii ichi akõre dana omeeba biʼia ochia iniɗau. Jeowa, Dachi Akõrebʉ ichia dachirã kʉ̃ria ua nia, mauɗeeba ichia kʉ̃ria ɓuu dachi siɗa jayoaswẽe nibaɗai baita dachi kʉ̃risiaɗe mauɗe dachi kakuaɗe biɗa. Dachirã jayoaswẽe duanuubʉrã biʼia ɓuu dachi baita mauɗe waabenarãmaa biʼia ãrĩãdu unubiɗayua Dachi Akõreɗebena.

1. ¿Saka dachi jayoaswẽe duanaɗai ɓua dachi baraurãɗe?

Jeowaba jara ɓua: “Jayoaswẽe nureaɗayu” (1 Pedro 1:16). Dachi jãka nureaɗai baita, jayoaswẽe duanaɗayua dachi kʉ̃risiaɗe mauɗe dachi kakuaɗe biɗa. Dachia jayoaswẽe kiruree unubiɗai ɓuu kapichia kui duanuuba mauɗe dachi ropa, de mauɗe carro maebʉrã moto jayoaswẽe ira duanuuba. Mauɗe ũkuru aiɗa panua chi Jeowa ɗebena Jaranũrẽ De jayoaswẽe ira panuuba. Dachirã jayoaswẽe kirureebʉrã, waabenarã ẽbẽrarã biɗa Jeowa ʉ̃rʉbena biʼia beɗea kʉ̃riaɗayua (2 Corintios 6:3, 4).

2. ¿Kãare aseɗaabaiba jayoaswẽe kirureaɗayua?

Bibliaba naka a ɓua: “Jareɗaika chi joma dachi kakuaɗe mauɗe dachi kʉ̃risiaɗe jayoabii ɓuu” (2 Corintios 7:1). Mauɗeeba ne joma ase panua dachi kakua maebʉrã dachi kʉ̃risia jayoabiɗaamaaba. Mauɗe, Jeowa siɗa kĩrajʉʉ ɓoayua dachi kʉ̃risiarã ome, mauɗeeba berekabadau dachirãba chi jayoa ɓeeɗe kʉ̃risiaɗaamaaba (Salmo 104:34). Mauɗe, berekabadau joma jayoaswẽe keɗee ʉ̃rʉbena jaraɗai baita (Colosenses 3:8 leas).

¿Kãareba maucha dachi kakua kʉ̃risia baara jayoabi ɓua? Chi ɓeerã biɗa dachi kakua jayoabiɗai ɓuu. Mauɗeeba, dachirãba taaku doɗakau, mauɗe coca kiɗua siɗa kaeɗakaa, mauɗe dachirãba atua ʉrmidia doɗakaa mauɗe kũba ʉtaa ʉ̃barii aseɗaabayua. Naka ɓee joma aseɗawẽebʉrã, dachi kakua biʼia ɓooyua, mauɗe unubiɗai kĩrajʉʉ panuu dachi chokae nureeɗeeba. Maubapeɗa, dachi kʉ̃risia jayoaswẽe ira nibaɗayua, mauɗeeba ãrĩãdu berekabadau bideorã pornoɗebena ochiaɗaamaaba mauɗe du juaba sĩarãɗe eɗa wauɗaabai (Salmo 119:37; Efesios 5:5). Ãrĩãdu difícil ɓueka jãka ɓee ɓuiɗai baita maamina, Jeowaba ũkuru aiɗai ɓua (Isaías 41:13 leas).

AUDE KAWABA

3. Joma jayoaswẽe ira nureabudauba Jeowa ʉ̃rʉbena biʼia jarabi ɓua

Dachirãba leabudauɗe Jeowaba yataɗeeɗa Israel puurumaa leyrã jaraɗa baɗa ʉ̃rʉbena, kawabadaa Jeowa baita ara ɓuu dachirã jayoaswẽe duanuuɗeeba. Éxodo 19:10 mauɗe 30:17-19 leaɗapeɗa, mambea nau ʉ̃rʉbena beɗeasturu:

• ¿Kãare jara ɓua naarã versiculorãba dachi kakua jayoaswẽe ira nureaɗai ʉ̃rʉbena?

• ¿Kãare aseɗaiba noremaacha dachi jayoaswẽe kirureaɗai baita?

Dachi jayoaswẽe kirureaɗai baita tiempo jʉrʉyu nesita panuu mauɗe ãrĩã berekabaraaɗai. Dachi ɓoobariimaa, chi nejarra ãrĩã bara nii o wãʼãe nii siɗa, dachi jayoaswẽe kirureaɗai ɓua. BIDEO ochiaɗapeɗa, mambea nau ʉ̃rʉbena beɗeasturu:

BIDEO: Dachi Akõreba ẽbẽrarã jayoaswẽe kiruree ãrĩã kʉ̃ria ua nia (4:10)

• Chi ẽbẽrarã dachia jaradea duanuurãmaa ochiaduuɗe dachi barau jayoaswẽe duanuubʉrã, ¿mauba waaburu Jeowa respetabi panubaaka? ¿Sakayua?

4. Ne kachirua ida ɓuba

Bichi cigarillo, ʉrmidia ãrĩã dopeɗa maebʉrã kũɗe ʉtaa ʉ̃barii niibʉrã, bichia kuitaa ɓua jãarã difícil ãrĩã ɓuu ɓui baita. Nau biʼia ɓui baita kauwa kʉ̃risiáse nauba bichi ãrĩãdu daño asemaa ɓuu. Mateo 22:37-39 leaɗapeɗa, mambea beɗeasturu itua dopeɗa mauɗe cigarrillo dobarii ãrĩã busta niibʉrã saka mau biʼiawẽe ɓua...

• ... Jeowa ome jʉ̃kaa nibaɗayua.

• ... chi deɗabenarã mauɗe ichi amikorã baita.

Kauwa kʉ̃risias bichia kãare asei ɓua ne kachiruarã asebarii nii ɓui baita.a BIDEO ochiábaɗa.

BIDEO: Du aɓa controlaɗaika (2:47)

Filipenses 4:13 leaɗapeɗa, mambea nau ʉ̃rʉbena beɗeasturu:

• Bichiɗeebara ʉtaa wiɗipeɗa, Biblia kawapeɗa mauɗe reuniorãɗaa wã ɓuubʉrã, ¿jãuba ũkuru aiɗai ɓue ẽbẽra ne kachirua ase kuɓuu ɓuiyua? ¿Sakayua?

5. Berekas bichia ne kachirua kʉ̃risiapeɗa asebarii ɓuiyua

Colosenses 3:5 leaɗapeɗa, mambea nau ʉ̃rʉbena beɗeasturu:

• ¿Sakayua kuitaa panaa bideorã pornoɗebena ochiayu, mensaje mandayu waabenarã ome ewaraa duanuuɗebena, mauɗe du juaba sĩarãɗe eɗa wauɗayu Jeowa daaɗe jayoa ɓua?

• ¿Bʉʉmaarã biʼia ɓue Jeowaba dachirãmaa jara ɓuuɗe dachi kʉ̃risia jayoaswẽe duanuu kĩra panaɗayu? ¿Sakayua?

Kawas saka bichi kʉ̃risia jayoaswẽe iniibai ɓuu. BIDEO ochiábaɗa.

BIDEO: Joma bereka ase panuu jayoaswẽe paneei baita (1:51)

Jesusba jaradeɗekaɗa basia saka jayoaswẽe duanaɗai ɓuu dachi kʉ̃risiaɗe. Mateo 5:29, 30 leaɗapeɗa, mambea nau ʉ̃rʉbena beɗeasturu:

• Jesusba jara kʉ̃riabasia dachi kakuaɗe puʼua wauruu kĩra duanaɗayu, bari bereka duaɗai biʼia ãrĩã ɓuu aseɗai baita. ¿Kãare dachia asebaraaɗai dachi kʉ̃risia jayoa ɓuu kĩra kʉ̃risiaɗaamaaba?b

Chi kʉ̃risiaɗebena miadaa jayoa kĩra ɓee ɓuiyu chaarea ãrĩã ɓuubʉrã bichi baita, kʉ̃risias Jeowaba ãrĩãdu bustabarii bichia jãu ɓui baita bereka ɓuu. Salmo 103:​13, 14 leaɗapeɗa, mambea nau ʉ̃rʉbena beɗeasturu:

• Bichia bereka ɓuubʉrã chi joma miadaa ɓee jayoa kĩra ɓuu asebarii ɓuiyua, ¿naarã versiculorãba bichi aiɗai ɓue waaburu berekayua mau ida ɓui baita? ¿Sakayua?

Bichia waya ne kachirua asesiibʉrã, mau kakua ¡apii ɓeerã́ba!

Bichia kʉ̃risiai ɓuu “Mʉa waya ne kachirua ase koɓeesii; maucha berekaabai”. Maamina nauɗe kʉ̃risiachãu. Ẽbẽra pirabarii jeeɗa ɓae ɓuubʉrã, jãuba jara kʉ̃riawẽe ichia piramaa ɓuu perdesia, ichi waya akarrnaa wãwẽe, maumaarã mamareeba ẽpesai ɓua. Ara jãu kĩra, bichia waya ne kachirua ase koɓeesiiba, kʉ̃risiarã́ba chi mau ase kuɓuu poyaa ɓuibai. Joma chi bichia berekaɗa baɗa perdewẽa ɓua ara maka. Waya ne kachirua aseeruu, jãra normal ɓua, jãu pasai ɓua dachi kambiai baita. Mauɗeeba ¡apii ɓeerã́ba! Bichia barikiau ne kachirua ase nibabarii ɓui kʉ̃ria ɓuubʉrã, Jeowa jua kiruuɗeeba asei ɓua.

NAU KAWASIƊAA

Dachirãba dachi kakua, dachi kʉ̃risia mauɗe dachia ase kopanuu baara jayoaswẽe ira nureebʉrã, mauba Jeowa ãrĩã kĩrajʉʉbi ɓua.

Waya berreaɗaika

• ¿Sakayua biʼia ãrĩã ɓua jayoaswẽe kirureaɗayu?

• ¿Kãare aseɗai ɓua dachi kakua mauɗe dachi baraurã jayoaswẽe ira duanaɗai baita?

• ¿Kãare aseɗai ɓua dachia ase kopanuu mauɗe dachi kʉ̃risia jayoaswẽe ira duanaɗai baita?

NAU OCHIAS MAUCHABURU KAWAYUA

Bariara dachi ara ɓiɗĩikaburu juaɗe ira duanuubʉrã, ¿kãare aseɗai ɓua dachirã jayoaswẽe duanuu kĩra nureaɗai baita?

Dachi kakua biʼia ãrĩãdu nureaɗayu mauɗe jayoaswẽe duanaɗai: jua jeraaɗayu (3:01)

Leas konsejorã barau ũkuru cigarillo dobarii nii ɓuibii baita.

“Saka ida ɓui cigarillo dobariiɗebena” (¡Despertad!, mayo 2010ɗebena)

Kawas sakayua ne kachirua ãrĩã nii bideo pornoɗebena ochia nibayu.

“Pornoɗebena ochiayu: ¿biʼia ɓue o biʼiwẽe ɓoabaaka?” (Chi Kartaba, 1 agostoɗe 2013ɗebena)

Ochias saka mukĩra niiba porno ochiabarii baɗa ɓuiɗa.

“Mʉa kachirua ãrĩãdu waya asebaria maka ɓuuɗe chi biʼia ãrĩã ɓuu ase ɓeesia jãabera” (Chi Kartaba, 2016ɗebena chi 4)