Matthai

4 Cun Jesuh cu Satan* nih tukforh awkah thlarau nih ramcar ah a hruai. 2 Jesuh cu ni 40 le zan 40 chung rawl a ulh caah a paw a ṭam. 3 Tukforhtu cu a sinah a ra i, “Pathian fapa na si ahcun mah lung hna hi changreu ah can ding in nawl pe hna ngat” tiah a ti. 4 Asinain Jesuh nih “‘Minung cu rawl lawng in a nun awk a si lo, Jehovah* kaa in a chuakmi bia paoh in a nun awk a si’ tiah Cathiang ah aa ṭial” tiin a leh.

5 Cun Satan nih Jesuh kha khuathiang ah a kalpi i biakinn par* ah a dirter. 6 “Pathian fapa na si ahcun hika hin zuang tuah ngat, ‘Pathian nih a vancungmi kha nawl a pek hna lai,’ ‘An kut in an in domh lai i na ke cu lung ah aa khawng lai lo’ tiah Cathiang ah aa ṭial ko kha” tiin a ti. 7 Mah tikah Jesuh nih “‘Jehovah* na Pathian cu va hneksak hlah’ tiah Cathiang ah aa ṭial” tiin a leh.

8 Satan nih Jesuh cu tlang sangpi cung ah a kaipi ṭhan i vawleicung pennak vialte le an sunparnak vialte kha a hmuhsak. 9 Cun Satan nih “Voikhat te na khuk naa bil i na ka biak ahcun mah vialte hi kaan pek dih lai” tiah a ti. 10 Jesuh nih “Satan, va kal cang! ‘Jehovah* na Pathian lawng na biak lai, amah rian lawnglawng na ṭuan lai’ tiah Cathiang ah aa ṭial” tiin a leh. 11 Mah tikah Satan nih a kaltak. Cun vancungmi cu an ra i Jesuh kha an rung hramh.

12 Johan an tlaih ti thawng a theih tikah Jesuh cu Galili ram ah a kal. 13 Mah hnuah Nazareth khua in a chuak i Zebulun le Naftali peng, rili pawng i Kapernaum khua ah a va um. 14 Cucaah profet Isaiah sinin chimmi mah bia hi a hung tling: 15 “Jordan Tiva ral, rililei kalnak lam ah a ummi Zebulun le Naftali rammi hna, Galili ram ah a ummi miphun dang hna, 16 muihnak chung ah a ummi hna nih ceunak nganpi an hmuh cang. Thihnak thladem tang ah a ummi hna cung ah ceunak a tlung cang.” 17 Mah caan thawk in Jesuh nih “I ngaichih u, vancung Pennak cu a nai cang” tiah phungchim hram a thawk.

18 Jesuh cu Galili Rilikam i aa chawh lioah Peter tiah auhmi Simon le a nau Andru kha a hmuh hna. Annih cu ngatlai an si i sur an rak cheh lenmi kha a hmuh. 19 Mah tikah “Ka zul u law mi tlaitu ah kaan ser hna lai” tiah a ti hna. 20 An sur kha an kaltak colh i Jesuh hnu an zulh. 21 Cuka in a kal tikah unau pahnih Zebedi fapa Jeim le a nau Johan kha a hmuh hna. Annih cu an pa Zebedi he, lawng chung ah an sur kha an rak belh. Jesuh nih a auh hna tikah, 22 an pa le an lawng kha an kaltak i a hnu an zulh colh.

23 Mah hnuah Jesuh cu Galili ram dihlak ah a tlawng i pumhnak inn ah a cawnpiak hna. Pennak kong thawngṭha kha a chimh hna i zawtnak le fahnak a phunphun a ingmi kha a damter hna. 24 A thawngpang cu Siria ram dihlak ah a thang. Khuachia nih a tuahmi, tluk zawtnak a ngeimi, a zengmi i telin zawtnak a phunphun a ngeimi kha an ratpi hna caah Jesuh nih a damter hna. 25 Cucaah Galili, Dekapolis,* Jerusalem, Judea le Jordan Tiva ral in mi tampi nih Jesuh hnu kha an zulh.