Johan

11 Bethani khua ah Lazaruh tiah auhmi pa pakhat cu a zaw; cuka khua cu Mary le a u Martha an umnak khua a si. 2 Mary cu Bawipa Jesuh ke ah zihmui a toih i a sam in a hnawttu kha a si; a zawmi Lazaruh cu a ṭa a si. 3 A farle nih cun Jesuh sinah “Bawipa, na dawtmi na hawipa cu a zaw” tiah bia an cah. 4 Jesuh nih mah thawngpang kha a theih tikah “Hi a zawtnak hi thihnak caah a si lo, Pathian sunparnak a langh nakhnga caah a si. Pathian Fapa zong nih cu thawng cun sunparnak a hmuh lai” tiah a ti.

5 Jesuh nih Martha, Mary le Lazaruh kha a dawt hna. 6 Asinain Lazaruh a zaw ti thawng a theih tikah a umnak hmun ah khan nihnih a caam rih. 7 Mah hnuah a zultu hna kha “Judea ram ah kal ṭhan hna u sih” tiah a ti hna. 8 A zultu hna nih cun “Saya,* kan hnulei te ah khan Judah mi nih lung in cheh an in timh kha, cuka ah cun maw na kal ṭhan ko lai?” tiah an hal. 9 Jesuh nih “Chun ah suimilam 12 a um a si lo mei? Chun ah aa chawh ahcun hi vawlei ceunak kha a hmuh caah a tluril lo. 10 Asinain zan ah aa chawh ahcun a sinah ceunak a um lo caah a tluril tawn” tiah a leh hna.

11 Cutin a chim dih hnuah Jesuh nih “Kan hawi Lazaruh cu aa hngilh cang, amah hlauh awkah ka va kal lai” tiah a ti. 12 A zultu pawl nih “Bawipa, aa hngilh ahcun a dam cang ko lai” tiah an ti. 13 Jesuh nih a thihnak kong a chimmi a si nain annih nih aa hngilhnak kong a chimmi a si tiah an ruah. 14 Cucaah Jesuh nih hlangfang tein hitin a ti hna: “Lazaruh cu a thi cang, 15 cuka i ka um lomi cu lunglawmh awk ngai a si, zeicahtiah nan zumhnak a feh deuh nakhnga kaan tuahpiak cang hna lai. Atu a sinah kal u sih.” 16 Mah tikah Faphir tiah auhmi Thomas nih “Kannih zong kal ve u sih, Jesuh a thih ahcun kan thi ve ko lai” tiah a dang zultu hna kha a ti hna.

17 Jesuh cu a va phanh tikah thlan ah Lazaruh an vuinak nili a si cang ti kha a hngalh. 18 Bethani khua cu Jerusalem khua in meng hnih hrawng* lawng aa hlat. 19 Judah mi tampi cu an ṭa nih a thihtakmi hna Martha le Mary kha hnemh awkah an ra. 20 Martha nih Jesuh a ra ti kha a theih tikah a va kal i a va don, Mary tu cu inn ah a ṭhu ko. 21 Jesuh he an i ton tikah Martha nih “Bawipa, hika ah hin rak um law cu ka ṭa hi a thi lai lo. 22 Atu hmanh ah nangmah nih na hal ahcun Pathian nih zeipaoh aan pek lai ti kha ka hngalh ko” tiah a ti. 23 Jesuh nih “Na ṭa cu a tho ṭhan lai” tiah a ti. 24 Martha nih cun “Ni hmanung bik ni i thawhṭhannak ah a tho ṭhan lai ti cu ka hngalh ko” tiah a leh. 25 Jesuh nih “Kei cu thawhṭhannak le nunnak ka si. Keimah a ka zummi paoh cu a thih hmanh ah a nung ṭhan lai. 26 Keimah a ka zum i a nungmi cu zeitik hmanh ah an thi ti lai lo, mah kha na zum maw?” tiah a hal. 27 Martha nih “Ka zumh ko, Bawipa, nang cu Khrih na si i hi vawlei ah a rami Pathian Fapa na si kha ka zumh ko” tiah a leh. 28 Cutin a chim dih hnuah Martha nih a nau Mary kha a va auh, “Saya a phan cang i aan hlam” tiah a thli tein a va chimh. 29 Mah kha a theih tikah Mary cu khulrang in a tho i Jesuh sinah a va kal.

30 Jesuh cu khua chung ah a lut rih lo, Martha he an i tonnak hmun ah a um rih ko. 31 Innchung i amah a hnemmi Judah mi hna nih khulrang in Mary a chuahmi kha an hmuh tikah thlan i va ṭah awkah a kal tiah an ruah caah a hnu in an zulh. 32 Mary cu Jesuh umnak hmun kha a va phan, Jesuh kha a hmuh tikah a kehram ah a bawk i “Bawipa, hika ah rak um law cu ka ṭa hi a thi lai lo” tiah a ti. 33 Jesuh nih Mary le a rak zulmi Judah mi hna an ṭahmi kha a hmuh tikah a ngaih a chia i a lung a fak. 34 “A ruak khoika ah dah nan chiah?” tiah a hal hna tikah “Bawipa, ra law rak zoh hmanh” tiah an leh. 35 Jesuh cu a mitthli a tla. 36 Mah tikah Judah mi nih “Zoh hmanh u, Lazaruh kha zeitluk in dah a dawt!” tiah an ti. 37 A cheu nih cun “Mitcawmi khua a hmuhter ṭhantu hi pa nih hin Lazaruh hi thih lo ding in a tuah kho hnga lo maw?” tiah an ti.

38 A ngaih a chiami Jesuh cu thlan ah a va phan. Thlan cu lungkua a si caah lung in an rak khar. 39 Jesuh nih “Lung kha thawn u” tiah a ti hna tikah mithi pa farnu Martha nih “Bawipa, a thihnak nili a si cang i a nam cang lai” tiah a ti. 40 Jesuh nih “Na zumh ahcun Pathian sunparnak na hmuh lai tiah ka rak in ti, a si lo maw?” tiah a ti. 41 Mah tikah lung kha an thawn. Jesuh nih vanlei kha a zoh i “Ka Pa, ka bia na ka ngaihpiak caah kaa lawm. 42 Ka bia na ka ngaihpiak zungzal ti kha ka hngalh ko, atu ah nangmah thlahmi ka si kha an zumh khawh nakhnga ka pawng ah a ummi mibu caah hihi ka chim” tiah a ti. 43 Mah bia a chim dih hnuah “Lazaruh, rak chuak!” tiah aw thangpi in a au. 44 Mah tikah mithi pa cu a kut le a ke puan zual bu le a hmai khuh puan he a rak chuak. Jesuh nih “Phoih u law kalter u” tiah a ti hna.

45 Mary sinah a rami Judah mi tampi nih Jesuh tuahmi kha an hmuh tikah an hun zumh. 46 Asinain an lak i cheukhat cu Farasi mi sinah an va kal i Jesuh tuahmi kong kha an chimh hna. 47 Mah tikah tlangbawi upa hna le Farasi mi hna nih Judah Biaceihnak Zungpi* i chungtel pawl kha an pumh hna, “Hipa nih khuaruahhar thil tampi a tuah cang caah zeidah kan tuah lai? 48 Hitin kan zoh sawhsawh ko ahcun mi vialte nih amah kha an zumh lai, mah tikah Rom mi cu an ra lai i kan biakinn he, kan miphun he an kan uk lai” tiah an i ceih. 49 An lak i pakhat, mah kum ah tlangbawi ngan a ṭuanmi Kaiafas nih “Zeihmanh nan hngal lo maw? 50 Miphun ning in hrawh si nakin cun mi tampi caah mi pakhat thih cu a ṭha deuh ti kha nan hngal lo maw?” tiah a ti hna. 51 A tak ti ahcun amah lungchuak in a chimmi a si lo, Kaiafas cu mah kum ah tlangbawi ngan a si caah Jesuh nih Judah mi caah a nunnak a pek lainak kong, 52 Judah mi ca lawng ah si loin aa ṭhenṭhekmi Pathian fale kha hmunkhat ah a pumh hna lainak kong a chimchungmi a si. 53 Cu ni thawk in Jesuh thah awkah khua an khang lengmang.

54 Cucaah Jesuh cu Judah mi lakah langhngan in aa chawkvak ti lo, cuka in a chuak i ramcar pawng ah a ummi Efraim khua ah a kal. Cuka ah a zultu hna he an va um. 55 Judah mi hna Lanhtak Puai cu a nai cang, khuate lei in mi tampi cu Puai ni a phanh hlanah Moses Nawlbia ning in i thianh awkah Jerusalem khua ah an ra. 56 Annih nih Jesuh kha an kawl, biakinn i an i pumh tikah “Zeitindah nan ruah? Puai ah hin a ra hnga maw?” tiah pakhat le pakhat an i ceih. 57 Tlangbawi ngan le Farasi mi hna nih Jesuh kha tlaih an duh caah a umnak nan hngalh ahcun thawng nan kan thanh lai tiah nawl an chuah.