Johan

7 Cu hnuah Jesuh cu Galili hrawng ah a tlawng. Judah mi nih thah an duh caah Judea ram ah cun a kal duh lo. 2 Asinain Judah mi hna Deu Puai cu a nai cang. 3 Cucaah a naule nih “Na tuahmi thil hi na zultu hna zong nih an hmuh nakhnga hika hmun hin chuak law Judea ram ah va kal. 4 Mi nih ka hngal hna seh ti a duhmi nih cun zei thil hmanh a thli tein a tuah bal lo. Hi thil hna hi na tuah ṭung ahcun vawleicung dihlak nih an in hngalh nakhnga i langhter tuah” tiah an ti. 5 A tak ti ahcun a naule nih Jesuh kha an zum lo. 6 Jesuh nih “Ka caan a phan deuh rih lo, asinain nannih caah cun a zungzal in caanrem a si ko. 7 Vawlei nih nanmah huat awkah a ruang a ngei lo, asinain kei cu a ka huat. Zeicahtiah a tuahsernak a ṭhalo ti kha ka langhter caah a si. 8 Nannih cu puai ah cun va kal ko u; kei tu cu ka caan a phanh taktak rih lo caah ka kal lai lo” tiah a ti hna. 9 Mah kong vialte a chimh hna hnuah Galili ram ah a taangta.

10 Asinain a naule an kal dih hnuah Jesuh cu langhngan in si loin a thli tein puai ah a kal ve. 11 Judah mi nih puai chung ah cun an kawl i “Mah pa cu khoika ah dah a um hnga?” tiah an ti. 12 Mi nih Jesuh kong kha a thli tein an i ceih. A cheu nih “Anih cu miṭha a si” an ti. A cheu nih cun “A si lo, mi a hlengtu a si” tiah an ti. 13 Asinain Judah mi kha an ṭih hna caah ahohmanh nih Jesuh kong kha langhngan in an chim ngam lo.

14 Puai aa thawk in nili hnu hrawng ah Jesuh cu biakinn ah a kal i a cawnpiak hna. 15 Judah mi cu an khuaruah a har tuk i “Hi pa hi biaknaklei sianginn kai loin zeitindah Cathiang hngalhnak hi tluk in a ngeih hnga?” tiah an ti. 16 Jesuh nih “Kaan cawnpiakmi hna hi keimah cawnpiaknak a si lo, a ka thlahtu cawnpiaknak a si. 17 Pathian duhnak tuah a duhmi nih cun kaan cawnpiakmi hna hi Pathian sinin maw a si asiloah keimah duhnak in dah a si ti kha a hngalh ko lai. 18 Amah duh ning in mi a cawnpiakmi nih cun amah thangṭhatnak kha a kawl. A thlahtu a thangṭhatmi tu cu miding a si i a ding loin thil a tuah lo. 19 Moses nih Nawlbia aan pek hna a si lo maw? Asinain ahohmanh nih Nawlbia kha nan zul lo. Zeicah keimah kha thah nan ka timh?” tiah a hal hna. 20 Mibu nih cun “Khuachia nih aan tuah ko hih. Aho nih dah thah aan timh?” tiah an ti. 21 Jesuh nih “Sabbath ni ah khuaruahhar thil pakhat ka tuah tikah nan dihlak in nan khuaruah a har. 22 Moses nih cuarpar tannak nawlbia kha aan pek hna caah sabbath ni hmanh ah cuarpar nan tan ko hna. A tak ti ahcun mah nawlbia cu Moses chan in aa thawkmi a si lo, pupa hna chan in a rak um cangmi a si. 23 Moses Nawlbia buar nan duh lo caah sabbath ni ah cuarpar nan tan hna ahcun sabbath ni ah mi pakhat kha ka damter cikcek ruang ah zeicah nan thin a hun? 24 Lenglang zoh in biaceih ti hlah u, ding tein biaceih u” tiah a ti hna.

25 Mah tikah Jerusalem khuami cheukhat nih “Hi pa hi thah awkah an kawlmi pa kha a si lo maw? 26 Asinain zoh hmanh u! Langhngan in bia a chim len ko, ahohmanh nih zei an ti fawn lo. Uktu hna nih Khrih a si tiin an ruah taktak cang i a si hnga maw? 27 Hi pa cu khoika in dah a rat ti kha kan hngalh ko cu ta. Khrih cu a rat tikah khoika in dah a rat ti kha ahohmanh nih an hngal lai lo” tiah an ti. 28 Biakinn i a cawnpiak hna lioah Jesuh nih aw thangpi in “Keimah kha nan ka hngalh i khoika in dah ka rat ti zong nan hngalh. Asinain keimah duhnak in ka ratmi a si lo. A ka thlahtu cu a um taktakmi a si i amah cu nan hngal lo. 29 Kei nih cun ka hngalh. Zeicahtiah kei cu amah aiawhtu ka si i amah nih a ka thlahmi a si” tiah a ti. 30 Mah tikah Jesuh kha tlaih awkah an i zuam, asinain a caan a phanh rih lo caah ahohmanh nih an tlai kho lo. 31 Mi tampi nih Jesuh cu an zumh i “Khrih cu a rat hmanh ah hi pa nakin khuaruahhar thil tam deuh a tuah kho hnga maw?” tiah an ti.

32 Cutin Jesuh kong a thli tein an chimmi kha Farasi mi nih an theih. Mah tikah Farasi mi le tlangbawi upa hna nih Jesuh tlaih awkah biakinn cawngtu kha an thlah hna. 33 Jesuh nih “Nan sinah caan tlawmpal lawng ka um lai i mah hnuah a ka thlahtu sinah ka kal lai. 34 Nan ka kawl lai, asinain nan ka hmu lai lo. Zeicahtiah ka kalnak ding hmun ah cun nan ra kho lai lo” tiah a ti hna. 35 Cucaah Judah mi nih “Khoika ah dah a kal hnik i kan hei hmuh khawh hnga lo? Greek mi lakah aa ṭhenṭhekmi Judah mi hna sinah kal in Greek mi maw cawnpiak a timh hna hnga? 36 ‘Nan ka kawl lai, asinain nan ka hmu lai lo. Zeicahtiah ka kalnak ding hmun ah cun nan ra kho lai lo’ a timi hi zei sullam dah a si hnga?” tiah an i ceih.

37 Puai a donghnak ni, a sunglawi bikmi ni ah Jesuh cu a dir i “A ti a halmi paoh cu ka sinah ra hna seh law ti rak ding hna seh. 38 Keimah a ka zummi cu cathiang nih a chim bantuk in ‘A chung in nunnak tiva a luang lai’” tiah aw thangpi in a chim. 39 Mah cu amah a zummi hna nih an hmuh dingmi thiang thlarau kong kha a chimmi a si. Jesuh nih sunparnak a hmuh rih lo caah thiang thlarau kha an hmu rih lo. 40 Mah bia kha an theih tikah mi cheukhat nih “Hi pa hi Profet a si taktak ko” tiah an ti. 41 A cheu nih “Hi pa hi Khrih a si” an ti. A cheu nih cun “Khrih cu Galili ram in a chuak hnga maw? 42 Khrih cu David tefa a si lai i David chuahkehnak Bethlehem khuami a si lai tiah cathiang ah aa ṭial a si lo maw?” tiah an ti. 43 Cuticun Jesuh kong he aa tlaiin mibu lakah i ṭhencheunak a um. 44 An lak i cheukhat nih Jesuh kha tlaih an duh nain ahohmanh nih an tlai kho lo.

45 Biakinn cawngtu hna an rak kir tikah tlangbawi upa le Farasi mi hna nih “Zei ruang ah dah amah cu nan ratpi lo?” tiah an hal hna. 46 Biakinn cawngtu hna nih cun “Amah bantuk in ahohmanh nih bia an chim bal lo” tiah an leh hna. 47 Mah tikah Farasi mi hna nih “Nanmah zong maw aan hlen ve cang hna? 48 Hruaitu hna le Farasi mi lakah amah a zummi aho tal an um maw? 49 Nawlbia a hngal lomi hi mi hna cu chiatserhmi an si” tiah an ti. 50 Mah Farasi mi lakah Jesuh sinah a rak ra balmi Nikodemu zong a um. Anih nih, 51 “Kan phung ning in mi pakhat kha a bia ngaihpiak hmasa loin le a tuahmi hngalh hmasa loin biaceih a si bal maw?” tiah a ti hna. 52 Annih nih “Nang zong Galili mi dahra na si ve? Cathiang ah va kawl tuah ngat, Galili ram in profet pakhat hmanh an chuak bal lo ti kha na hngalh ko lai” tiah an ti.*