Marka

3 Jesuh cu pumhnak innchung ah a lut ṭhan i cuka ah a kut pakhat a zengmi pa a rak um. 2 Farasi mi nih Jesuh kha a sualnak kawl an duh caah Sabbath ni ah mah mipa hi a damter hnga maw tiah ṭha tein an ngiat. 3 Jesuh nih a kut pakhat a zengmi pa kha “Tho law hika a lai ah hin rak dir” tiah a ti. 4 Cun “Sabbath ni ah zeidah tuah awk a si? Ṭhatnak maw, ṭhatlonak dah? Minung nunnak khamh maw, minung nunnak thah dah?” tiah a hal hna tikah zei bia hmanh an let lo. 5 Zaangfahnak an ngeih lo caah Jesuh cu a ngaih a chia. A pawngkam ah a ummi hna kha thinhung ngai in a zoh hna i a kut pakhat a zengmi pa kha “Na kut kha samh” tiah a ti. Mah pa nih a kut a samh tikah a dam ṭhan. 6 Mah tikah Farasi mi cu an chuak i Jesuh thah awkah Herod zultu hna he khua an khang colh.

7 Jesuh cu a zultu hna he rililei ah an kal, Galili ram le Judea ram in mi tampi nih a hnu in an zulh. 8 Jerusalem khua, Idumea peng le Jordan Tiva ral i a ummi hna, Tair le Sidon khua pawngkam ah a ummi hna cu Jesuh nih a tuahmi vialte kha an theih tikah a sinah an ra. 9 Mah tikah Jesuh nih mibu nih an ka naan sual nakhnga lo lawng fate pakhat in ka timhpiak u tiah a zultu pawl kha a ti hna. 10 Mi tampi kha a damter hna caah a zawmi kip nih Jesuh tawngh awkah an i zuam ruang ah a si. 11 Khuachia hmanh nih Jesuh kha an hmuh tikah a hmaiah an bawk i “Nang cu Pathian Fapa na si” tiah an au. 12 Asinain Jesuh nih a kong kha chim lo ding in fakpi in atu le atu a thlauh hna.

13 Jesuh cu tlang cung ah a kai i a zultu cheukhat kha a auh hna tikah an rak phan. 14 Zultu 12 aa telmi phu pakhat kha a dirh i lamkaltu tiah min a pek hna. Annih cu Jesuh a kalnak kip ah a zultu ding an si, cun Jesuh nih phungchim awkah a thlah hna i, 15 khuachia ṭhawl khawhnak ṭhawnnak zong a pek hna.

16 Mah phu ah aa telmi zultu 12 hna i an min cu Peter tiah Jesuh nih min a pekmi Simon, 17 Zebedi fapa Jeim le a nau Johan (“Khuari Fa” tiah sullam a ngeimi Boanerges ti zong in Jesuh nih min a pek hna), 18 Andru, Filip, Bartholomew, Matthai, Thomas, Alfias fapa Jeim, Thaddais, a lung a thomi Simon, 19 a hnuah Jesuh a rawitu Judas Iskariot hna an si.

Mah hnuah Jesuh cu inn pakhat ah a lut. 20 Mibu cu an i pumh ṭhan caah Jesuh le a zultu pawl cu rawl einak caan hmanh an ngei lo. 21 Mah kong kha Jesuh a chungle nih an theih tikah “A hrut cang” tiah an ti i va lak awkah an i thawh. 22 Jerusalem in a rak ṭummi phungbia cawnpiaktu hna zong nih “A chung ah Beelzebul* aa hrolh, khuachia bawi bawmhnak thawng in khuachia a ṭhawlmi a si” tiah an ti. 23 Cucaah Jesuh nih annih cu a auh hna i tahchunhnak in hitin a chimh hna: “Satan nih zeitindah Satan cu a ṭhawl khawh lai? 24 Ram pakhat ah mi pawl an lung aa rual lo ahcun cu ram cu a hmun kho lai lo; 25 chungkhar pakhat cu an lung aa rual lo ahcun mah chungkhar cu a hmun kho lai lo. 26 Cu bantuk in Satan nih Satan kha a doh i an lung aa rual lo ahcun a hmun kho lai lo, a dong ko lai. 27 Miṭhawng pa kha ṭem hmasa loin cun a innchung ah luh in a thilri kha fir khawh a si lo. An ṭem hmasa lawng ah pei a innchung ah luh in an fir khawh lai cu. 28 Biatak kaan chimh hna lai, mi hna an sualnak vialte le serhsatnak bia vialte cu ngaihthiam an si lai. 29 Thiang thlarau serhsat in bia a chimmi tu cu zeitik hmanh ah ngaihthiam a si lai lo, zungzal sualnak a tuahmi a si.” 30 Jesuh nih cutin a chimmi cu “A chung ah thlarau ṭhalo aa hrolh” tiah mi nih an ti caah a si.

31 Mah tikah Jesuh i a nu le a naule cu an rak phan, a leng ah an dir i Jesuh kha mi an va auhter hna. 32 Jesuh pawngkam ah mi an i but caah “Saya, na nu le na naule nih ton an in duh i a leng ah an in hngah ko” tiah an ti tikah, 33 Jesuh nih “Ka nu le ka naule cu ahote dah an si?” tiah a ti hna. 34 Cun a velchum ah a ṭhumi hna kha a zoh hna i “Anmah hi ka nu le ka unau cu an si! 35 Pathian duhnak a tuahmi paoh cu ka nu le ka unau an si” tiah a ti hna.