Korin Pakhatnak

14 Dawtnak kha langhter peng u. Thlarau laksawng, a hleiin profet bia chim khawhnak laksawng hmuh awkah fakpi in i zuam peng u. 2 Holh dang in a holhmi cu minung sinah si loin Pathian sinah bia a chimmi a si. Thiang thlarau thawng in a thiangmi biathli a chimmi a si nain ahohmanh nih an hngalthiam lo. 3 Asinain profet bia a chimmi nih cun a bia in mi kha a fehter hna, thazaang a pek hna i a hnemh hna. 4 Holh dang in a holhmi nih amahle amah kha thazaang aa pe. Asinain profet bia a chimmi nih cun Khrihfabu kha thazaang a pek. 5 Nan dihlak in holh dangdang in holh kho u ti kaan duh hna, asinain profet bia chim kho u ti kaan duh deuh hna. Profet bia a chimmi cu holh dangdang in a holhmi nakin a ṭhahnem deuh. Holh dangdang in chimmi kha holh leh a si lo ahcun Khrihfabu caah thazaang petu a si lai lo. 6 Asinain unau hna, atu ah nan sinah holh dangdang in ka holh nain phuanmi bia siseh, hngalhnak bia siseh, profet bia siseh, cawnpiaknak siseh ka chim ṭung lo ahcun zeidah a ṭhahnem lai?

7 Cu bantuk in thonglawi asiloah tingtang ti bantuk nunnak a ngei lomi awdawh tumnak hmanh a aw ah aa dannak a um lo ahcun thonglawi a si ah, tingtang a si ah zei aw dah a si ti kha zeitindah hngalh khawh a si lai? 8 Muko zong fiang tein an tum lo ahcun raltuknak caah ahodah timhcia tein a um lai? 9 Cu bantuk in hngalhthiam a fawimi bia nan hman lo ahcun nan chimmi kha aho nih dah a hngalh lai? Mah cu thlitu lakah biachim bantuk a si ko lai. 10 Vawleicung ah holh phun tampi a um i sullam a ngei lomi an um lo. 11 Asinain ka hngalhthiam lomi holh a si ahcun a chimtu caah kei cu ramdang mi ka si ko lai i a chimtu cu ka caah ramdang mi a si ko lai. 12 Nannih zong cutin nan si ve. Thlarau laksawng hmuh a duh ngaingaimi nan si caah Khrihfabu thazaang petu a si dingmi laksawng kha tampi in hmuh awkah i zuam u.

13 Cucaah holh dang in a holhmi nih holh a leh khawh nakhnga thlacam seh. 14 Holh dang in thla ka cam tikah thlarau laksawng ruang ah ka cammi a si nain a sullam cu ka hngalthiam lo. 15 Cucaah zeitindah ka tuah lai? Thlarau laksawng ruang ah thla ka cam lai, asinain ka hngalhthiammi bia zong in ka cam lai. Thlarau laksawng ruang ah thangṭhatnak hla ka sa lai, asinain ka hngalhthiammi bia zong in thangṭhatnak hla ka sa lai. 16 Cutin a si lo ahcun thlarau laksawng ruang ah thangṭhatnak bia na chim tikah nan sin i a ummi mi sawhsawh pawl nih na chimmi kha an hngalhthiam lo caah lunglawmhnak in thla na cammi kha zeitindah “Amen” tiah an ti khawh lai? 17 Pathian sinah lunglawmhnak bia na chim ning cu a ṭha tuk ko nain midang caah thazaang petu a si lai lo. 18 Nanmah nakin holh phun tam deuh ka thiam caah Pathian kha ka lawmh. 19 Asinain Khrihfabu ah holh dang in kaa thonghra chim nakin cun midang cawnpiaknak caah hngalhthiammi bia kaa nga chim kha ka duh deuh.

20 Unau hna, nan khuaruah ning ah cun ngakchia bantuk si hlah u, ṭhatlonak tu ah ngakchia bantuk si u law khuaruahnak lei ah cun a cuza cangmi bantuk si u. 21 Nawlbia ah “‘Ramdang mi holh le mising holh in hi miphun hna sinah bia ka chim lai, cu hmanh ah cun ka bia kha an ngai duh lai lo’ tiah Jehovah* nih a ti” tiin aa ṭial. 22 Holh dang in holh khawhnak cu zumtu caah si loin zumlotu caah hmelchunhnak a si. Profet bia chim khawhnak cu zumlotu caah si loin zumtu caah hmelchunhnak a si. 23 Cucaah Khrihfabu ning in hmunkhat i nan i pumh tikah holh dangdang in nan chim cio ahcun mi sawhsawh asiloah zumlotu pawl rak lut hna seh law an hrut cang tiah an in ti hna lai, a si ko lo maw? 24 Asinain profet bia nan chim lioah zumlotu asiloah mi sawhsawh a rak luh ahcun nan bia nih a chimhhrinhmi bantuk a si lai i amahle amah ṭha tein aa dothlat lai. 25 A lungthin chung ah a thli tein a ruahmi cu an hung lang lai. Cucaah “Pathian cu nan sinah a um taktak” tiah a ti lai i Pathian kha a kunpiak lai i a biak lai.

26 Cucaah unau hna, zeitindah kan ti lai? Hmunkhat i nan i pumh tikah pakhat nih salm hla a sak, pakhat nih a cawnpiak, pakhat nih bia a phuan, pakhat nih holh dang in a holh, pakhat nih holh a leh. Mah vialte cu thazaang peknak caah siter ko u. 27 Holh dang in a holhmi an um ahcun pahnih asiloah a tam bik ah pathum lawng nih chim hna seh. Cun aa changchang in chim hna seh law pakhatkhat nih lehpiak hna seh. 28 Asinain holh lettu an um lo ahcun Khrihfabu ah dai tein um ko hna seh law Pathian sinah an lung chung in chim ko hna seh. 29 Profet pahnih asiloah pathum nih chim hna seh law a dang tu nih cun a sullam kha tuaktan ko hna seh. 30 Cuka i a ṭhumi a dang pakhat nih Pathian sinin bia phuan ding a hmuh ahcun a hmasa a chimtu pa cu dai tein um ko seh. 31 Mah tikah pakhat hnu pakhat in profet bia nan chim khawh lai. Cuticun mikip nih an cawn khawh lai i thazaang an hmuh lai. 32 Profet hna nih an hmuhmi thlarau laksawng an hman ning kha an uk awk a si. 33 Zeicahtiah Pathian cu ningcang loin a ummi Pathian a si lo, daihnak a duhmi Pathian a si.

Mithiang mi hna Khrihfabu dihlak bantuk in, 34 nu cu Khrihfabu ah dai tein um ko hna seh. Zeicahtiah annih cu biachimnak nawl awnh an si lo. Mah canah Nawlbia nih a chim bantuk in nawlngai tein um ko hna seh. 35 Hngalh an duhmi kong a um ahcun inn ah an vale kha hal ko hna seh. Nu nih Khrihfabu ah biachim cu ningzak a si.

36 Pathian bia cu nanmah sinin maw a hram aa thawk, asiloah Pathian bia a hmumi cu nanmah lawng dahra nan si?

37 Mi pakhatkhat nih profet ka si asiloah thlarau laksawng a hmumi ka si tiah aa ruah ahcun nan sin i ka ṭialmi hi Bawipa nawlbia a si ti kha a cohlan awk a si. 38 Mah hi pakhatkhat nih zei ah a rel lo ahcun anih zong zei ah rel a si ve lai lo.* 39 Cucaah unau hna, profet bia chim khawh awkah fakpi in i zuam peng u, asinain holh dangdang in a holhmi kha thlauh hna hlah u. 40 Zei paohpaoh kha dawhcah tein le ningcang tein tuah hna u.