Hebru

3 Vancung nunnak hmuh awkah auh a simi mithiang mi unau hna, lamkaltu le tlangbawi ngan a si tiah kan phuanmi Jesuh kong kha ruat hmanh u. 2 Moses cu Pathian inn* ah zumhawktlak tein rian a ṭuan bantuk in Jesuh zong rian a petu Pathian cung ah zumhawktlak tein a um ve. 3 Innsatu cu inn nakin upatnak a hmuh deuh bantuk in Jesuh cu Moses nakin sunparnak tam deuh in hmuh awkah aa tlak. 4 Inn cu pakhatkhat nih sakmi a si. Asinain zeizong vialte a satu cu Pathian a si. 5 Moses cu Pathian inn ah zumhawktlakmi sal a si. A rianṭuannak cu Pathian nih hmailei ah a phuan laimi thil caah tehte a si. 6 Khrih cu Pathian inn a zohkhenhtu zumhawktlakmi fapa a si. Kannih cu Pathian inn kan si. Zalong tein biachimnak nawl le uangthlar ngai in kan chimmi ruahchannak kha a dongh tiang fek tein kan i tlaih lawng ah cutin kan si kho lai.

7 Cucaah thiang thlarau hmang in hitin a ti: “Nihin ah ka bia kha ngai u, 8 ramcar ah nan pupa hna nih ka thin an ka phawh i an rak ka hneksak lio bantuk khan nan lungkhong hlah u. 9 Cuka ah nan pupa hna nih kum 40 chung ka rianṭuannak kha an hmuh ko nain an ka hneksak i an ka doh. 10 Cucaah mah chan mi hna cu ka fih hna i hitin ka ti: ‘An lungthin cu a pial zungzal. Ka lam kha an hngal lo.’ 11 Cun ‘Annih cu kaa dinhnak chung ah an lut lai lo’ tiah thinhung ngai in chiat ka ser.”

12 Unau hna, a nungmi Pathian kha nan mertak ahcun zumhnak a ngei lomi le lungthin ṭhalo a ngeimi nan hun si khawh caah i ralring u. 13 “Nihin” tiah timi caan a um chung paoh cu nifate pakhat le pakhat thazaang i pe zungzal u. Cutin nan tuah lo ahcun sualnak i a mihlen khawhnak ruang ah nan lung a khong sual lai. 14 A hramthawk tein kan ngeihmi zumhnak kha a dongh tiang fek tein kan i tlaih lawng ah Khrih nih a hmuhmi kha kan i hrawm kho ve lai. 15 “Nihin ah ka bia kha ngai u, nan pupa hna nih ka thin an ka phawh lio bantuk khan nan lungkhong hlah u” tiah Cathiang nih a ti.

16 Pathian aw a thei ko nain a thin a phawktu cu ahote dah an si? Izipt ram in Moses nih a chuahpimi hna kha an si lo maw? 17 Mah leng ah kum 40 chung Pathian nih a fihmi cu ahote dah an si? Sualnak a tuah i ramcar ah a thimi hna kha an si lo maw? 18 Pathian nih kaa dinhnak chung ah an lut lai lo tiah chiat a serhmi cu ahote dah an si? Nawl a ngai lomi hna kha an si lo maw? 19 Annih cu zumhnak an ngeih lo caah Pathian dinhnak chung ah an lut kho lo ti kha kan hngalh.