Lamkaltu

13 Antiok khua i Khrihfabu ah profet le saya hna an um, annih cu Barnabas, Niger ti zong in auhmi Simeon, Sairin khuami Lusias, peng uktu Herod i a cacawnṭi hawi Manian le Saul an si. 2 Jehovah* rian an ṭuan i rawl an ulh lioah thiang thlarau nih “Barnabas le Saul kha ka caah thim hna u, rian pek ding ka ngei hna” tiah a ti. 3 Cucaah rawl ulh in thla an cam hnuah an cung ah an kut an chuan i an thlah hna.

4 Barnabas le Saul cu thiang thlarau nih a thlah hna ning in Seleusia khua ah an kal i cuka cun Saipras tikulh ah tilawng in an kal. 5 Salamis khua an phanh tikah Judah mi hna pumhnak inn ah Pathian bia kha an chim. Johan zong anmah bawmtu in a kal ve.

6 Tikulh kha an cul dih i Pafos khua an phanh tikah Judah mipa Bar-Jesuh timi he an i tong, amah cu camhthiammi le profet deu a si. 7 Anih cu mifim ngaingai a simi peng uktu bawi Serzias Paulus sinah a um. Peng uktu bawi nih Pathian bia kha theih a duh tuk caah Barnabas le Saul kha a sawm hna. 8 Asinain mah camhthiam pa Elimas nih peng uktu kha Pathian bia zumhter a duh lo caah a hun ralchanh hna. (Elimas i a sullam cu camhthiam pa tinak a si.) 9 Paul ti zong in auhmi Saul cu thiang thlarau in a khat i Elimas kha mit ṭhep loin a zoh. 10 Cun “Nangmah cu hlenthawinak le ṭhatlonak a phunphun in a khatmi, Satan fapa, dinnak vialte ral na si! Jehovah* lam ding merh hi na ngol lai lo maw? 11 Jehovah* nih dan aan tat lai caah na mit a caw lai i caan tlawmpal chung ni ceu na hmu lai lo” tiah a ti. Chikkhat te ah a mit cu a hun maw i khua a hmuh ti lo caah a kut in a hruaitu ding kha dap lengmang in a kawl hna. 12 Mah thil a hmuh tikah peng uktu bawi cu Jehovah* kong a hun hngalhmi ruang ah a khuaruah a har tuk i zumtu a hung si.

13 Paul le a hawile cu Pafos khua khan tilawng in an kal i Pamfilia ram, Perga khua an phan. Asinain Johan nih a kaltak hna i Jerusalem khua ah a kir. 14 Perga cun an i thawh ṭhan i Pisidia ram, Antiok khua an phan. Sabbath ni ah pumhnak inn ah an lut i an ṭhu. 15 Nawlbia le Profet cauk rel dih hnuah pumhnak inn haotu hna nih “Unau hna, hi mi hna caah thazaang peknak bia chim ding nan ngeih ahcun chim ko u” tiah an ti hna. 16 Cucaah Paul cu a tho, dai tein um awkah a kut in a hmuhsak hna i hitin a ti:

“Israel mi le Pathian a ṭihzahmi miphun dang hna, ngai hmanh u. 17 Israel mi Pathian nih kan pupa hna kha a rak thim hna. Izipt ram ah ramdang mi in an um lioah a bawmh hna i a liannganmi a ṭhawnnak in a chuahpi hna. 18 Pathian nih kum 40 chung ramcar ah a rak in hna. 19 Kanaan ram i miphun pasarih kha a hrawh hna hnuah mah ram kha ro ah a pek hna. 20 Mah thil vialte cu kum 450 chung ah a cangmi a si.

“Mah hnuah profet Samuel chan tiang Israel mi kha biaceihtu pawl a pek hna. 21 A hnuah siangpahrang pakhat an hal caah Pathian nih Benjamin phun chungmi Kish fapa Saul kha kum 40 chung a rak ukter hna. 22 Saul kha a ṭhumh hnuah David kha siangpahrang ah a thim. Amah he aa tlaiin Pathian nih ‘Jesse fapa David kha ka hmuh cang, anih cu ka lung duhmi phun a si i ka duhmi thil vialte kha a tuah lai’ tiah a rak ti. 23 Pathian nih a biakam ning in Israel mi caah khamhtu Jesuh kha David tefa chung in a chuahter. 24 Mah khamhtu a rat hlanah Johan nih Israel mi vialte kha nan i ngaihchihnak langhter awkah tipil ing u tiah zapi hmaiah a chimh hna. 25 Johan nih a rian a liim lai ah ‘Aho a si tiah dah nan ka ruah? Amah kha ka si lo. Amah cu ka hnu in a ra lio i kei cu a phanat hri phoihtu ding hmanh ah kaa tlak lo’ tiah a rak ti.

26 “Abraham tefa a simi unau hna le Pathian a ṭihzahmi miphun dang hna, Pathian nih hi khamhnak bia hi a kan theihter cang. 27 Asinain Jerusalem khuami hna le an hruaitu hna nih amah kha an cohlang lo. Amah kha bia an ceihnak thawng in Sabbath ni fatin an relmi Profet bia kha an tlinter. 28 Thah awk tlak a ruang an hmu lo nain amah thah awkah Pilat kha an hal. 29 Amah kong rak ṭialmi Cathiang bia vialte an tlinter dih hnuah tung cung in an ṭhumh i thlan ah an vui. 30 Asinain Pathian nih thihnak in a thawhter ṭhan. 31 Galili in Jerusalem ah a sin i a kal vemi zultu hna sinah ni tampi chung a lang. Atu ah annih cu a kong tehte khangtu an si.

32 “Cucaah Pathian nih kan pupa hna sinah a rak sermi biakamnak kong thawngṭha kha kan in chimh hna. 33 Pathian nih Jesuh kha a thawhternak thawng in an tefa a simi kanmah sinah a biakam kha a tlinter dih cang. Salm fung hnihnak chung ah ‘Nangmah cu ka fapa na si; nihin ah keimah cu na pa ka hung si’ tiah aa ṭial bantuk khan a si. 34 Pathian nih thihnak in a thawhter cang i a thu khomi pum ah zeitik hmanh ah a kirter ṭhan ti lai lo. Cuticun ‘David ka rak kamhmi, a fekmi dawtnak kha nan cung ah ka langhter lai, mah dawtnak cu zumhawk a tlak’ tiah a rak timi bia a hmaan kha a langhter. 35 Salm chung i hmun dang zong ah ‘Zumhawktlak in a ummi cu thutnak na hmuhter lai lo’ tiah a ti. 36 David tu cu a nun chung vialte Pathian rian a ṭuan hnuah thihnak ah a rak i hngilh. Pupa hna sinah vui a si i thutnak kha a rak hmuh. 37 Asinain Pathian nih a thawhtermi pa tu cu thutnak kha a hmu lo.

38 “Cucaah unau hna, hngalhter kaan duhmi hna cu amah thawng in Pathian nih nan sualnak kha aan ngaihthiam hna lai. 39 Moses Nawlbia nih miding ah aan ser kho hna lo nain amah thihnak thawng in a zummi paoh cu miding tiah auh an si lai. 40 Cucaah Profet cauk chung ah aa ṭialmi mah bia hi nan cung ah a tlun nakhnga lo i ralring u: 41 ‘Mi zawmhtaih a hmangmi hna, nan chan ah ka tuahmi thil hi zoh hmanh u. Mah cu a dikthliar in an in chimh hna hmanh ah nan zumh lai lo dingmi thil a si. Asinain nan khuaruah a har lai i nan loral lai.’”

42 Paul le Barnabas cu pumhnak inn in an chuah tikah mi nih a ra laimi Sabbath ni zong ah mah kong hi kan chim rih u tiah an nawl hna. 43 Pumhnak inn in an ṭin dih hnuah Pathian a biami Judah mi le Judah biaknak i a lutmi tampi nih an zulh hna caah Paul le Barnabas nih Pathian vel hmuh zungzal ding in i zuam ko u tiah an forh hna.

44 A hmai Sabbath ni ah cun Jehovah* bia ngaih awkah khuami an dihlak ti awk in an i pum. 45 Judah mi cheukhat nih mibupi kha an hmuh hna tikah nahchuahnak in an khat i Paul nih a chimmi kha an al i an thangchiat. 46 Mah tikah Paul le Barnabas nih “Nan sinah Pathian bia chim hmasa cu a herhmi a si. Asinain nan cohlan lo caah zungzal nunnak hmuh awkah aa tlak lomi nan si kha nanmah theng nih nan langhter cang. Cucaah miphun dang sinah kan kal cang lai. 47 Jehovah* nih ‘Miphun dang hna ceunak caah kaan thim cang, vawlei deng tiang khamhnak kong kha na chim lai’ tiah nawl a kan pek” tiin ralṭha ngai in an leh hna.

48 Mah kha miphun dang hna nih an theih tikah an i lawm tuk i Jehovah* bia kha an thangṭhat. Zungzal nunnak hmuh awkah lungtak tein aa zuammi hna cu zumtu an hung si. 49 Mah leng ah Jehovah* bia cu ram chung dihlak ah a thang. 50 Asinain Judah mi nih Pathian a ṭihzahmi hmaizah awk tlak nu hna le khua upa hna kha an forh hna i Paul le Barnabas kha an hrem hna. Cun an peng chung in an ṭhawl hna. 51 Paul le Barnabas nih an ke i leidip kha an thin hnawh hna i Ikonium khua ah an kal. 52 Zultu hna cu lunglawmhnak le thiang thlarau in an khat.