Johan sin pekmi Biathlam
3 “Sardis Khrihfabu i lamkal sinah hitin ṭial tuah: Pathian thlarau pasarih le arfi pasarih a ngeimi nih hitin a ti: ‘Na tuahsernak kha ka hngalh. A nung timi min na ngei ko nain na rak thi. 2 I ralring tuah, a thi dengmangmi kha ṭhawnter ṭhan hna. Pathian nih tuahter aan duhmi kha tling tein na tuah lo ti kha ka hngalh. 3 Cucaah na rak hmuhmi le na rak theihmi kha i cinken, mah kha zul peng law i ngaichih. Naa hlauh lo ahcun mifir bantuk in ka ra lai i zeitik ah dah ka rat lai ti kha na hngal hrimhrim lai lo.
4 “‘Asinain Sardis khua ah a hnipuan a thurter lomi mi cheukhat an um. Annih cu aa tlakmi an si caah puan raang i aih in keimah he an i chawk lai. 5 Teitu a simi cu puan raang aa aih lai, a min kha nunnak cauk in ka hnawt hrimhrim lai lo. Ka Pa le a vancungmi hna hmaiah a min cu ka hngalh tiah ka ti lai. 6 Khrihfabu hna sinah thiang thlarau chimmi kha hna a ngeimi nih thei ko hna seh.’
7 “Filadelfia Khrihfabu i lamkal sinah hitin ṭial tuah: A thiangmi, a hmaanmi, David tawh a ngeimi, innka a hunmi kha ahohmanh nih an khar khawh lomi le a kharmi kha ahohmanh nih an hun khawh lomi nih hitin a ti: 8 ‘Na tuahsernak kha ka hngalh. Ahohmanh nih an khar khawh lomi innka kha na hmaiah kaan hunpiak. Ṭhawnnak tlawmte lawng na ngei ko nain ka bia kha na zulh i ka min kha na hlaw lo ti ka hngalh. 9 Judah mi an si lo nain kan si tiah aa ti i lih a chimmi, Satan ta a simi phu hna cu na hmaiah ka ratter hna lai i na kehram ah ka bawhter hna lai. Ka dawtmi na si kha ka hngalhter hna lai. 10 Keimah bantuk in inkhawhnak na langhter caah vawleicung i a ummi hna hneksak awkah vawleicung pumpi ah a tlung dingmi hneksaknak caan chung ah kaan huhphenh ve lai. 11 Khulrang in ka ra lai. Na bawiluchin kha ahohmanh nih an in lakpiak nakhnga lo na ngeihmi kha fek tein i tlaih peng.
12 “‘Teitu a simi cu ka Pathian biakinn chung i tungpi ah ka ser lai, cuka in leng ah a chuak ti lai lo. A cung ah ka Pathian min le Jerusalem Thar a simi ka Pathian khualipi min kha ka ṭial lai. Mah khua cu ka Pathian sinin vancung khin a rung ṭummi a si. Cun ka min thar zong ka ṭial lai. 13 Khrihfabu hna sinah thiang thlarau chimmi kha hna a ngeimi nih thei ko hna seh.’
14 “Laodisia Khrihfabu i lamkal sinah hitin ṭial tuah: Zumhawk a tlakmi le a hmaanmi tehte, Pathian sermi thil lakah a hramthawknak a simi Amen nih hitin a ti: 15 ‘Na tuahsernak kha ka hngalh. Nang cu a kih zong na kik lo i a sat zong na sa lo. Rak kik lawlaw asiloah rak sa lawlaw ti ka duh. 16 Kik lo sa lo, lum phutphat lawng na si caah ka kaa in kaan chak lai. 17 “Ka rum, ka ngei i zeihmanh ka bau lo” tiah na ti nain ngaihchia na simi, zaangfah awk tlak na simi le misifak, mitcaw le taklawng na simi kha naa hngal lo. 18 Cucaah ruahnak cheuh kaan duhmi cu na rum nakhnga mei in thianhmi sui rak ka caw, taklawng na si i na ning a zah nakhnga lo i aih awkah puan raang rak ka caw, na mit khua a hmuh nakhnga mitsii rak ka caw.
19 “‘Ka dawtmi paoh cu ka cawnpiak hna i ka chimhhrinh hna. Cucaah na sualnak kha i ngaichih law lungtho tein Pathian kha bia. 20 Zoh hmanh! Innka hram ah ka dir i innka ka kingh. Ka aw a thei i innka a ka hunpiakmi cu a innchung ah ka lut lai i amah he zanriah kan dumṭi lai. 21 Kei cu teitu ka si i ka Pa he a bawiṭhutdan ah kan ṭhut bantuk in teitu a simi cu keimah he ka bawiṭhutdan ah ṭhutnak nawl ka pek lai. 22 Khrihfabu hna sinah thiang thlarau chimmi kha hna a ngeimi nih thei ko hna seh.’”