Johan sin pekmi Biathlam

16 Cun hmunthiang in aw thangpi pakhat nih vancungmi pasarih kha “Va kal u law Pathian thinhunnak khengkuar pasarih cu vawleicung ah va thle u” tiah a timi hna kha ka theih.

2 Vancungmi pakhatnak cu a kal i a khengkuar cu vawlei ah a thlet. Mah tikah sahrang hmelchunhnak a ngeimi le a milem a biami hna cung ah a fak ngaingaimi hmachia a tlung.

3 Vancungmi pahnihnak nih a khengkuar cu rili ah a thlet. Mah tikah rili cu mithi chung in a chuakmi thisen bantuk ah a cang i rili chung i thilnung vialte cu an thi dih.

4 Vancungmi pathumnak nih a khengkuar cu tiva le cerhti put ah a thlet. Mah tikah ti cu thi ah an cang dih. 5 Ti cung ah nawl a ngeimi vancungmi nih hitin a timi kha ka theih: “Hlanlio ah le atu tiang a um zungzalmi, zumhawk a tlakmi Pathian, hi na biaceihnak ah hin na ding ko. 6 Zeicahtiah mithiang mi le profet hna an thi a rak chuahtu hna kha din awkah thisen na pek hna. Mah cu hmuh awkah an i tlakmi a si ko.” 7 Cun biakṭheng nih “A Ṭhawng Bik Jehovah* Pathian, na biaceihnak cu a hmaan i a dik” tiah a timi kha ka theih.

8 Vancungmi palinak nih a khengkuar cu nika ah a thlet. Mah tikah nika cu mei in minung kanghnak nawl a hmu. 9 Mi cu a lin taktakmi mei nih a kangh hna. Cu tikah mah rai pawl chuahternak nawl a ngeitu Pathian min kha an thangchiat. An i ngaichih lo i Pathian kha sunparnak an pe lo.

10 Vancungmi panganak nih a khengkuar cu sahrang bawiṭhutdan ah a thlet. Mah tikah sahrang pennak cu a mui dih. An inmi fahnak ruang ah an lei kha an i seh. 11 An inmi fahnak le an hmachia ruang ah vancung Pathian cu an thangchiat. An tuahsernak kha an i ngaichih lo.

12 Vancungmi paruknak nih a khengkuar cu Zufrates tivapi ah a thlet. Mah tikah tiva ti cu a kao dih i nichuahlei in a rami siangpahrang hna caah lam a awnter.

13 Cun limkeng kaa in le sahrang kaa in le profet deu kaa in utlak he aa lomi, a thiang lomi bia pathum* an hung chuahmi kha ka hmuh. 14 Mah bia cu khuachia sinin a rami bia an si i hmelchunhnak hna an tuah. Vawleicung pumpi siangpahrang hna sinah an kal i A Ṭhawng Bik Pathian ni lianngan ni i raldohnak caah an pumh hna.

15 “Zoh hmanh! Mifir bantuk in ka ra lai. Hliphlau tein a um i a angki leng ṭha tein aa fimhlawmmi cu mi lunglawm a si. Cuticun taklawng in a vak lai lo i zapi hmaiah ningzak in a um lai lo.”

16 Annih nih siangpahrang hna kha Hebru holh in Armageddon* timi hmun ah an pumh hna.

17 Vancungmi pasarihnak nih a khengkuar cu thli lakah a thlet. Mah tikah hmunthiang i a ummi bawiṭhutdan in aw thangpi pakhat nih “A dih cang!” tiah a ti. 18 Cun nimtlau a lek, aw thawng a thang, khua a ri i li fakpi in aa hnin. Vawleicung ah mi an um hramthawk in a um bal lomi, a fak tuk hringhranmi lihnin a si. 19 Khualipi cu cheuthum ah aa cheu i vawleicung pumpi i khualipi hna cu an rawk dih. Pathian nih A Liannganmi Babilon kha a alhmi a thinhunnak mitsur zu hrai dinter awkah a philh lo. 20 Tikulh vialte cu an lo dih, tlang hna zong an um ti lo. 21 Cun rial nganpipi, pakhat ah talent* pakhat tluk a ritmi cu van in minung cung ah an tla. Rial nih a chuahtermi rai cu a fah tuk caah rial ruang ah mi nih Pathian cu an thangchiat.