Matthai

24 Jesuh cu biakinn in a chuah tikah a zultu hna nih biakinn sakmi kha an hmuhsak. 2 Jesuh nih “Mah vialte hi nan hmu ko lo maw? Biatak kaan chimh hna lai, hi lung hna hi chimh dih an si lai. Lungrualmi pakhat hmanh a taang lai lo” tiah a ti hna.

3 Oliv Tlang i Jesuh a ṭhut lioah a zultu hna cu anmah lawng in an ra i “Bawipa, mah thil hna cu zeitik ah dah a si lai, na ratnak* ding le chan donghnak* ding hmelchunhnak cu zei hna dah an si? rak kan chim” tiah an hal.

4 Mah tikah Jesuh nih hitin a ti hna: “Ahohmanh nih lam an in pialter hna nakhnga lo i ralring u. 5 ‘Keimah hi Khrih ka si’ tiah aa ti i ka min in mi pawl lam a pialtertu tampi an hung chuak lai. 6 Lamnai le lamhla i raltuknak thawngpang kha nan theih lai. Mah tikah awlokchong in um hlah u, mah thil hna cu a um hrimhrim awk a si ko. Asinain donghnak cu a phan rih lai lo.

7 “Miphun pakhat le pakhat, ram khat le ram khat an i do lai, hmun khat hnu hmun khat ah mangṭam le lihnin a tlung lai. 8 Mah thil vialte cu sifah harnak* a thawknak an si.

9 “Mah tikah nanmah hrem awkah an in chanh hna lai i an in thah hna lai, mi nih ka min ruang ah an in huat hna lai. 10 Cun mi tampi cu an tluril lai, pakhat le pakhat an i rawi lai i an i hua lai. 11 Profet deu tampi an chuak lai i mi kha an hlen hna lai. 12 Dinlonak a karh chinchin caah mi tampi cu an dawtnak a kik lai. 13 Asinain a dongh tiang inkhawhnak a ngeimi cu khamh an si lai. 14 Miphun vialte hna ca i tehte si awkah Pennak kong thawngṭha kha vawleicung pumpi ah chim a si lai, mah hnu lawng ah donghnak cu a phan te lai.

15 “Profet Daniel nih a rak chim bantuk in hrawktu fihnung cu hmunthiang i a phanhmi kha nan hmuh tikah (careltu nih thleidang thiam ko hna seh), 16 Judea ram i a ummi cu tlang cung ah zam hna seh. 17 Inncung i a ummi cu innchung i thilri lak awkah ṭum hlah seh. 18 Lo ah a ummi zong a hnipuan lak awkah inn ah tlung hlah seh. 19 Cu caan cu fapawi le nauno a ngeimi nu hna caah a har chinchin lai! 20 Nan zam caan cu khuasik caan le Sabbath ni ah a si sual nakhnga lo thlacam peng u. 21 Zeicahtiah vawlei hramthawk in atu ni tiang ah a um bal lomi, hmailei zong ah a um lo dingmi harnak nganpi cu mah caan ah cun a tlung lai. 22 Mah caan cu Pathian nih tawiter hlah seh law ahohmanh luatnak an hmu lai lo, Pathian nih a mithim mi hna caah cu caan cu a tawiter lai.

23 “Cun pakhatkhat nih ‘Khrih cu hika ah a um,’ asiloah ‘Khika ah a um’ tiah an in ti hna ahcun zum hna hlah u. 24 Khrih deu le profet deu pawl an chuak lai, annih nih a si khawh ahcun thim a simi hna hmanh kha lampialter awkah hmelchunhnak nganpipi le khuaruahhar thil hna an tuah lai. 25 Zoh hmanh u! A hlankan in ralrin kaan pek cang hna. 26 Cucaah mi nih ‘Jesuh cu ramlak ah a um’ tiah an ti tikah va kal hlah u. ‘Jesuh cu a khaan chung ah a um’ tiah an ti tik zong ah va zum hna hlah u. 27 Nichuahlei in nimtlau a lek tikah nitlaklei tiang a ceuh dih bantuk in mi Fapa a rat tikah a si te lai. 28 Saruak umnak hmun ah mupi* an i pum tawn.

29 “Mah harnak caan a dihle cangka nika cu a mui lai, thlapa nih a ceunak a chuah ti lai lo, van in arfi an tla lai i van ṭhawnnak cu an i hnin lai. 30 Mah tikah mi Fapa a ra cang ti a langhtermi hmelchunhnak hna van ah a lang lai. Vawleicung ah a ummi miphun vialte cu ngaihchia ngai in an ṭap lai. Mi Fapa cu van khuadawm lakin ṭhawnnak le a liannganmi sunparnak he a ratmi kha mi nih an hmuh lai. 31 Muko tum thawng thangpi in a rak chuak lai. Mi Fapa nih a vancungmi kha a thlah hna lai. Annih nih thim a simi hna kha vanhramdeng khattalei in khattalei tiang, vawlei killi in an pumh hna lai.

32 “Theipi kung tahchunhnak in cawng u, theipi kung cu a nge thar a hung chuak i a hnah a corh tikah ṭhal caan a phan cang lai ti kha nan hngalh. 33 Cu bantuk in mah thil vialte an hung ummi nan hmuh tikah mi Fapa cu kutka hram ah a phan cang ti kha hngal u. 34 Biatak kaan chimh hna lai, hi thil vialte a tlun dih hlanah atu chan mi hna* cu an thi dih rih lai lo. 35 Van le vawlei cu an rawk lai, asinain ka bia cu zeitik hmanh ah a rawk lai lo.

36 “Cu ni le cu caan cu ahohmanh nih an hngal lo, vancungmi zong nih an hngal lo, Fapa zong nih ka hngal lo, Pa lawnglawng nih a hngalh. 37 Mi Fapa a rat caan* cu Noah chan bantuk in a si lai. 38 Tilian a tlun hlanah mi cu Noah lawng chung i a luh ni tiang an ei, an ding, an i ṭhi, an i um. 39 Tilian a tlun i an dihlak in a fenh dih hna hlan tiang zeihmanh an hngal lo, mi Fapa a rat tik zong ah cutin a si lai. 40 Lo ah a ummi pahnih lakah pakhat cu kalpi a si lai i pakhat tu cu nganhta a si lai. 41 Fang a rialmi nu pahnih lakah pakhat cu kalpi a si lai i pakhat tu cu nganhta a si lai. 42 Cucaah nan Bawipa a rat lai ni kha nan hngalh lo caah ralring tein hngak ko u.

43 “Asinain hihi philh hlah u: Inn-ngeitu nih mifir a rat caan kha a hngalh ahcun a inn baoh a si nakhnga lo hngilh lo tein a hngah ko lai. 44 Cucaah nannih zong timhcia tein rak um u, mi Fapa cu nan i ruah lomi caan ah a ra lai.

45 “Zumhawktlak le a fimmi sal cu ahodah a si taktak? A bawipa nih a dang a salle a caan hmaan tein rawl a petu ding ah rian a pekmi kha a si. 46 A bawipa a tlun tikah cutin a tuahmi sal kha a hmuh ahcun mah sal cu aa lawm lai! 47 Biatak kaan chimh hna lai, mah sal kha a bawipa nih a ngeihmi thil vialte zohkhenhtu ah a chiah lai.

48 “Asinain sal ṭhalo nih ‘Ka bawipa cu a rau tuk’ tiah a ruah i, 49 a salhawi kha a velh hna, zuri pawl he a ei, a ding hei ti u sih, 50 aa ruahchan lomi caan le a hngalh lo caan ah a bawipa cu a tlung lai. 51 Fakpi in dan a tat lai i mi depde pawl umnak hmun ah a chiah lai. Cuka ah a ṭap lai i a hacang a rial lai.