Johan

8 12 Cu hnuah Jesuh nih “Kei cu vawlei ceunak ka si. Ka hnu a ka zulmi paoh cu muihnak ah an kal bal lai lo i nunnak a pemi ceunak an ngei lai” tiah a ti. 13 Mah tikah Farasi mi hna nih “Na kong kha nangmah tein tehte na khaan caah na tehte khaannak cu a hmaan lo” tiah an ti. 14 Jesuh nih “Ka kong kha keimah tein tehte ka khaanmi a si hmanh ah ka bia cu a hmaan, zeicahtiah khoika in dah ka rat i khoika ah dah ka kal lai ti kha ka hngalh. Nannih nih cun khoika in dah ka rat i khoika ah dah ka kal lai ti kha nan hngal lo. 15 Nannih nih lenglang zoh in bia nan ceih tawn, kei nih cun ahohmanh bia ka ceih hna lo. 16 Bia ka ceih hna hmanh ah ka biaceihnak cu a hmaan, zeicahtiah keimah lawng in si loin a ka thlahtu ka Pa he kan ceih hna caah a si. 17 Nan Nawlbia zong ah ‘Mi pahnih nih tehte an khaan ahcun a hmaan’ tiah aa ṭial. 18 Keimah nih ka kong kha tehte ka khaan bantuk in a ka thlahtu ka Pa zong nih ka kong kha tehte a khaan” tiah a ti. 19 Mah tikah “Na Pa cu khoika ah dah a um?” tiah an ti. Jesuh nih “Keimah nan ka hngalh lo ahcun ka Pa zong nan hngal lai lo. Keimah nan ka hngalh ahcun ka Pa zong nan hngalh lai” tiah a leh hna. 20 Mah bia kha biakinn chung, thawhlawm an chiahnak hmun i a cawnpiak hna lioah Jesuh nih a chim. Asinain a caan a phanh rih lo caah ahohmanh nih an tlai lo.

21 Jesuh nih hitin a ti ṭhan hna: “Kei cu ka kal cang lai i nan ka kawl lai, asinain nan sualnak chung ah nannih cu nan thi lai. Ka kal lainak hmun ah nannih cu nan ra kho lai lo.” 22 Mah tikah Judah mi hna nih “‘Ka kal lainak hmun ah nannih cu nan ra kho lai lo’ tiah a timi cu amahle amah thah aa tim i maw a si hnga?” tiah an ti. 23 Jesuh nih “Nannih cu tanglei in a rami nan si; kei cu cunglei in a rami ka si. Nannih cu hi vawlei in a rami nan si; kei cu hi vawlei in a rami ka si lo. 24 Cucaah nan sualnak chung ah nan thi lai tiah kaan ti hna. Amah cu keimah hi ka si ti kha nan zumh lo ahcun nan sualnak chung ah nan thi lai” tiah a ti hna. 25 Cucaah “Ahodah na si?” tiah an hal. Jesuh nih “Mah kong kha voi zeizat dah ka chim lai? 26 Nanmah he aa tlaiin chim ding le biaceih ding tampi ka ngei. A ka thlahtu cu a hmaan ning tein a chimmi a si. Kei zong a sinin ka theihmi kha hi vawlei ah ka chim” tiah a leh hna. 27 Pa kong a chimmi a si ti kha an hngalthiam lo. 28 Cucaah Jesuh nih “Mi Fapa kha tung cung i an thlai tik lawng ah amah cu keimah hi ka si i keimah tein zei thil hmanh ka tuahmi a um lo, ka Pa nih a ka cawnpiakmi ning in ka chim ti kha nan hngalh lai. 29 Cun a ka thlahtu cu ka sinah a um. A duhnak kha ka tuah zungzal caah keimah lawng in a ka kaltak lai lo” tiah a ti. 30 Mah bia an theih tikah mi tampi nih Jesuh kha an hun zumh.

31 Cun Jesuh nih amah a zummi Judah mi kha “Ka cawnpiaknak nan zulh peng ahcun ka zultu taktak nan si lai, 32 biatak kha nan hngalh lai i biatak nih cun aan luatter hna lai” tiah a ti hna. 33 Annih nih “Kannih cu Abraham tefa kan si i aho sal hmanh kan si bal lo. Zeicah ‘Nan luat lai’ na kan ti?” tiah an ti. 34 Jesuh nih “Biatak kaan chimh hna lai, a hmaan tein kaan chimh hna lai, sualnak a tuahmi cu sualnak sal a si. 35 Sal cu a bawipa inn ah a zungzal in a um lo, fapa lawng a zungzal in a um. 36 Cucaah Fapa nih aan luatter hna ahcun luatnak taktak nan hmu lai. 37 Abraham tefa nan si cu ka hngalh ko. Asinain ka cawnpiaknak kha nan cohlan lo caah keimah thah awkah nan i zuam. 38 Keimah nih cun ka Pa he kan umṭi lio i ka hmuhmi kha ka chim, nannih zong nih nan pa sinin nan theihmi kha nan tuah” tiah a ti hna. 39 Annih nih “Kan pa cu Abraham a si” tiah an ti. Jesuh nih “Abraham fale nan si ahcun Abraham nunning kha nan i zohchunh awk a si. 40 Asinain Pathian sinin ka theihmi biatak kong a chimtu keimah cu thah nan ka timh. Abraham nih cun cutin a rak tuah lo. 41 Nannih cu nan pa nih a rak tuahmi kha nan tuah” tiah a ti hna. Mah tikah “Kannih cu lakfa* kan si lo, Pa pakhat lawng kan ngei, anih cu Pathian a si” tiah an leh.

42 Mah tikah Jesuh nih “Nan Pa cu Pathian a si ahcun nan ka dawt ko lai, zeicahtiah Pathian nih a ka thlah caah hika ah ka ratmi a si. Keimah nawl in ka ratmi a si lo, Pathian nih a ka thlahmi a si. 43 Ka cawnpiaknak kha nan cohlang duh lo, cucaah ka bia kha nan hngalthiam lo. 44 Nannih nan pa cu Satan a si i amah duhnak tuah kha nan duh. Amah cu a hramthawk tein lainawng a si. A sinah biatak a um lo caah biatak ah a hmun kho lo. Lih a chimmi, lih vialte pa a si caah lih a chim tikah amah i a sining tein a chim tawn. 45 Asinain kei tu cu biatak ka chim caah nan ka zum lo. 46 Ka sualnak a langhter khomi nan um maw? Biatak kaan chimh ko hna nain zeicah nan ka zumh lo? 47 Pathian fale nih cun Pathian nih a chimmi kha an ngaih. Asinain nannih cu Pathian fale nan si lo caah nan ngai duh lo” tiah a ti.

48 Mah tikah Judah mi nih “‘Nang cu Samaria mi na si i Khuachia nih aan tuah’ kan in timi hi a hmaan ko lo maw?” tiah an ti. 49 Jesuh nih “Khuachia nih a ka tuahmi a si lo, ka Pa ka thangṭhatmi a si. Nannih nih cun nan ka thangchiat. 50 Keimah tein thangṭhatnak kha ka kawl lo. Thangṭhatnak pek a ka duhtu cu Pathian a si i Anih cu biaceihtu a si. 51 Biatak kaan chimh hna lai, a hmaan tein kaan chimh hna lai, ka cawnpiaknak a zulmi paoh cu thihnak kha zeitik hmanh ah an hmu lai lo” tiah a ti hna. 52 Judah mi hna nih “Khuachia nih aan tuah ko ti kha kan hngalh cang. Abraham cu a thi cang i profet hna zong an thi cang. Asinain ‘Ka cawnpiaknak a zulmi paoh cu thihnak kha zeitik hmanh ah an tong lai lo’ na ti. 53 Kan pa Abraham nakin maw na ngan deuh? Anih cu a thi cang i profet hna zong an thi cang. Aho ah dah naa rel?” tiah an ti. 54 Jesuh nih “Keimahle keimah kaa thangṭhat ahcun kaa thangṭhatnak cu pakpalawng a si. Keimah a ka thangṭhattu cu ka Pa a si i nannih nih kan Pathian tiah nan timi kha a si. 55 Amah kha nan hngal lo nain kei nih cun ka hngalh. Ka hngal lo tiah ka ti ahcun nanmah bantuk in mi lihchim ka si lai. Asinain amah kha ka hngalh taktak i a bia kha ka ngaih. 56 Nan pa Abraham nih ka rat lai ni kha hmuh ding in aa ruahchan i a rak i lawm. A lungthin in a rak hmuh i aa lawm” tiah a ti. 57 Mah tikah Judah mi hna nih “Kum 50 hmanh na tling rih lo, Abraham cu na hmu bal maw?” tiah an hal. 58 Jesuh nih “Biatak kaan chimh hna lai, a hmaan tein kaan chimh hna lai, Abraham a chuah hlan in kei cu ka rak um cang” tiah a ti hna. 59 Mah tikah lung an i char i cheh an timh, asinain Jesuh cu aa thup i biakinn in a chuak.