Korin Pahnihnak

12 Kaa porhlaw rih ko lai. Mah cu ka caah a ṭhahnem lo nain Bawipa nih a ka pekmi langhnak le biathlam kong kha ka chim rih ko lai. 2 Khrih he lungthin khat tein a ummi pa pakhat kha ka hngalh. A luancia kum 14 lioah a pathumnak van ah lak a si. Takpum in a si le si lo cu ka hngal lo; Pathian nih a hngalh. 3 Mah pa cu ka hngalh. Lak a si lioah takpum in a si le si lo cu ka hngal lo; Pathian nih a hngalh. 4 Anih cu paradis ah lak a si i minung nih chim khawh a si lomi le chim phung a si lomi bia kha a theih. 5 Mah pa kong ah kaa porhlaw lai. Keimah kong tu ah cun ka derthawmnak dah ti lo cu kaa porhlaw lai lo. 6 Porhlawt ka duh hmanh ah khuaruahnak a ngei lomi cu ka si lai lo. Zeicahtiah biatak lawng ka chim lai. Asinain an ka hmuhmi le an ka theihmi leng in a sang deuh ah an ka ruah nakhnga lo porhlawt kha ka hrial. 7 Khuaruahhar a simi mah biathlam kha ka hmuh caah a sang deuh ah ka ruat hlah u.

Porhlawt ruamkai in ka um nakhnga lo ka pum ah hling pakhat pek ka si. Porhlawt ruamkai in ka um nakhnga lo Satan vancungmi bantuk a simi mah hling nih fahnak a ka pek zungzal. 8 Mah kha ka lakpiak ko tiah Bawipa sinah voithum tiang ka nawl. 9 Asinain “Ka vel cu na caah a za ko. Zeicahtiah na derthawm tikah ka ṭhawnnak cu tling tein a lang” tiah a ka ti. Cucaah Khrih ṭhawnnak cu ka cung ah thlam bantuk in a um peng nakhnga ka derthawmnak kong ah hin lunglawm tein kaa porhlaw lai. 10 Cucaah derthawmnak, serhsatnak, herhbaunak, hremnak le harnak hna kha Khrih ruang ah lunglawm tein ka in. Zeicahtiah ka derthawm tikah ṭhawnnak in ka khat.

11 Nanmah ruang ah khuaruahnak a ngei lomi bantuk in bia ka chimmi a si. Nanmah nih rak ka thangṭhat u law cu atu bantuk in bia ka chim hnga lo. Zeihmanh ka si lo nain a hleikhunmi lamkaltu tiah nan timi hna nakin tlawmte hmanh ka niam deuh hlei lo. 12 Lamkaltu ka sinak langhter awkah inkhawhnak ka ngeihmi le khuaruahhar thil, hmelchunhnak le thil lianngan hna ka tuahmi kha nan hmuh ko. 13 Thilrit kaan khinh lomi hna dah ti lo cun Khrihfabu dang nakin nan sungh hleimi pakhatkhat a um maw? Mah cu keimah palh a si ahcun rak ka ngaithiam ko u.

14 Atu hi nan sin rat awkah timhcia ka sinak a voithumnak a si cang. Nan caah thilrit ka si lai lo. Ka duhmi cu nan thilri kha si loin nanmah kha nan si. Zeicahtiah fale nih nulepa caah thil khonpiak a si ṭung lo, nulepa nih pei fale caah thil khonpiak a si cu. 15 Nan caah ka ngeihmi vialte lawng si loin ka nunnak hmanh hi lunglawm tein pek ka duh. Hi tluk in kaan dawtmi hna hi zeicah tlawmte lawng nan ka dawt? 16 Thilrit kaan khinh hna lo bu hmanh in nannih nih Paul cu “a zer” i “a mi hlennak in” a kan foih tiah nan ti. 17 Nan sinah ka rak thlahmi pakhatkhat kha hmang in nan sinin ṭhathnemhnak kaa lak bal maw? 18 Titas kha nan sinah rat ding in ka fial i amah he unaupa pakhat zong ka rak thlah. Titas nih nan sinin ṭhathnemhnak aa lak bal maw? Kannih cu lungthin khat tein kan um ko lo maw? Kan zulhmi lam cu aa khat ko lo maw?

19 Anmahle anmah i runven in bia an chim peng tiah maw nan kan ruah? Khrih zultu in Pathian hmaiah bia kan chimmi a si. Ka dawtle hna, kan tuahmi vialte cu nanmah thazaang peknak caah a si. 20 Nan sin ka phanh tikah siter kaan duh hna ning in nan si lai lo i kei zong siter nan ka duh ning in ka si ve sual lai lo ti ka phang. Nan lakah i siknak, nahchuahnak, thinhunnak, ṭhencheunak, thangchiatnak, mi kong ceihnak, porhlawtnak le ningcang loin umnak hna a um sual lai ti ka phang. 21 Nan sin ka rat ṭhan tikah a hlanah sualnak a tuahmi hna cu atu tiang i ngaihchih loin a thurhnawmmi thil, nupa sualnak* le zah hngal loin thil* an tuah rih caah ka ngaih a chia lai i Pathian nih nan hmaiah ka ning a ka zahter lai ti ka phang.