Johan sin pekmi Biathlam
14 Khua ka hun zoh tikah Zion Tlang cung ah Tuufa a dirmi kha ka hmuh. A sinah cun mi 144,000 an um i an cal ah amah min le a Pa min aa ṭial. 2 Tisor nganpi thawng le khuari thawng thangpi he aa lomi aw pakhat kha vancung in ka theih; ka theihmi aw cu tingtang tum in hla a sami hna aw he aa lo. 3 Bawiṭhutdan hmai le thilnung pali hna hmai le upa hna hmaiah hla thar he aa lomi hla kha an sa. Vawleicung in cawkmi 144,000 dah ti lo cun ahohmanh nih mah hla kha an thiam lo. 4 Annih cu nu he an i thurhnawmh lo i a thianghlimmi an si. Tuufa kha a kalnak kip ah an zulh. Pathian ca le Tuufa caah theitlai hmasa bik in minung hna lakin cawkmi an si. 5 Hlenthawinak bia an chim bal lo i soisel awk zeihmanh a um lomi an si.
6 Cun vanlai ah a zuangmi a dang vancungmi pakhat kha ka hmuh. Vawleicung ah a ummi hna, ram kip, phun kip, holh kip le mi kip sinah zungzal thawngṭha kha a thanh. 7 “Pathian kha ṭih u law sunparnak pe u, zeicahtiah minung biaceih caan cu a phan cang. Cucaah van le vawlei le rili le cerhti put a sertu kha bia u” tiah aw thangpi in a ti.
8 Cun vancungmi pahnihnak nih a hun zulh i “Minu cu a tlu cang! A Liannganmi Babilon cu a tlu cang! Amah cu miphun vialte kha nupa sual* duhnak lungthin a ṭhawntermi mitsur zu a dintertu kha a si” tiah a ti.
9 Cun vancungmi pathumnak nih a hun zulh hna i aw thangpi in hitin a ti: “Sahrang le a milem a bia i a cal ah siseh, a kut ah siseh hmelchunhnak a ngeimi nih cun, 10 Pathian thinhunnak hrai chung ah ti cawh loin thletmi Pathian thinhunnak zu kha a din lai. A thiangmi vancungmi hna le Tuufa hmaiah mei le kat in hrem a si lai. 11 Hremnak* meikhu cu zungzal in zungzal tiang a kai lai. Sahrang le a milem a bia i a min hmelchunhnak a ngeimi hna cu chun he, zan he hnangam tein an um kho lo. 12 Cucaah mithiang mi hna, Pathian nawlbia a zulmi hna le Jesuh ngeihmi zumhnak fek tein aa tlaihmi hna cu inkhawhnak an ngeih a hau.
13 Vancung in aw pakhat nih hitin a timi kha ka theih: “Ṭial tuah: Atu thawk in Bawipa he lungthin khat tein um buin a thimi hna cu mi lunglawm an si. An rianṭuannak nih a zulh hna caah rianhrang ṭuannak in i din cang ko hna seh tiah thiang thlarau nih a ti.”
14 Cun khua ka hun zoh tikah minmei raang ka hmuh. Minmei cung ah cun mi fapa he aa lomi mi pakhat a ṭhu, sui bawiluchin aa chinh i a haar ngaimi fa-ah aa put.
15 Biakinn i hmunthiang chung in a dang vancungmi pakhat a hung chuak i minmei cung ah a ṭhumi kha aw thangpi in hitin a ti: “Na fa-ah khan rawl kung cu va at tuah. Zeicahtiah rawl ṭuan caan cu a cu cang i vawleicung rawl cu an hmin cang.” 16 Minmei cung i a ṭhumi nih a fa-ah cun vawleicung rawl cu a ṭuan.
17 Vancung ah a ummi biakinn i hmunthiang chung in a dang vancungmi pakhat a hung chuak ṭhan, anih zong a haar ngaimi fa-ah a ngei ve.
18 Biakṭheng in a dang vancungmi pakhat a hung chuak, anih cu mei cung ah nawl a ngei. A haar ngaimi fa-ah a ngeitu kha aw thangpi in hitin a ti: “A haar ngaimi na fa-ah khan vawleicung mitsur bor cu va at tuah. Zeicahtiah mitsur thei cu an hmin cang.” 19 Vancungmi nih a fa-ah cun vawleicung mitsur ruang cu a ah hna. Cun Pathian thinhunnak mitsur nennak khor nganpi chung ah a thlak hna. 20 Mitsur cu khua leng i mitsur nennak khor ah an nen. Mitsur nennak khor in a chuakmi thi cu rang chak tiang a phan i stadia 1,600 tiang* a luang.