Johan sin pekmi Biathlam
17 Khengkuar pasarih aa putmi vancungmi pasarih lak i pakhat cu a ra i hitin a ti: “Ra hmanh! Ti tampi cung ah a ṭhumi, a liannganmi hlawhhlangnu cu zeitindah biaceih a si lai ti kha kaan hmuhsak lai. 2 Vawleicung siangpahrang hna cu amah he nupa sualnak* an tuah, vawleicung mi hna cu nupa sualnak* a simi a zu kha an ding i an ri.”
3 Vancungmi nih thiang thlarau ṭhawnnak in ramlak ah a ka kalpi. Sahrang sen cung ah minu pakhat a ṭhutmi kha ka hmuh. Sahrang cu lu pasarih le ki pahra a ngei i a pumpaluk ah Pathian thangchiatnak min in a khat. 4 Minu cu maimaw puan le puan sen in aa thuam. Sui le lung mansung le tikep lungvar hna in aa ṭamh. Thil fihnung le nupa sualnak* thil thurhnawm in a khatmi sui hrai kha aa put. 5 “A Liannganmi Babilon, hlawhhlang hna le vawleicung thil fihnung hna i an nu” timi minhleng kha a cal ah aa ṭial. 6 Minu cu mithiang mi hna thi le Jesuh tehte hna thi in a ritmi kha ka hmuh.
Mah kha ka hmuh tikah ka khuaruah a har tuk. 7 Cun vancungmi nih hitin a ka ti: “Zeicah na khuaruah a har? Minu biathli le minu nih aa citmi, lu pasarih le ki pahra a ngeimi sahrang biathli kha kaan chimh lai: 8 Na hmuhmi sahrang cu a rak um i atu ah a um ti lo. Asinain a rauhhlan ah khor thukpi chung in a rak chuak lai i hrawh a si lai. A hlanah a rak um nain atu ah a um ti lomi sahrang, a hung um ṭhanmi kha an hmuh tikah vawleicung mi hna cu an khuaruah a har tuk lai. Annih cu vawlei ser hramthawk in nunnak cazual ah an min ṭial lomi an si.
9 “Cucaah fimnak le hngalhthiamnak ngeih a hau: Lu pasarih cu minu a ṭhutnak tlang pasarih kha a si. 10 Siangpahrang pasarih an um: Panga cu an tlu cang, pakhat cu a um lio i a dang pakhat cu a phan rih lo; a phanh tikah caan tawite lawng a um lai. 11 Hlanah a rak um i atu ah a um ti lomi sahrang cu siangpahrang pariatnak zong a si. Anih cu siangpahrang pasarih hna sinin a chuakmi a si i hrawh a si lai.
12 “Na hmuhmi ki pahra cu pennak a hmu rih lomi siangpahrang pahra kha an si. Asinain sahrang he suimilam pakhat chung siangpahrang nawlngeihnak an hmu lai. 13 Annih cu aa khatmi ruahnak an ngeih caah an ṭhawnnak le an nawlngeihnak cu sahrang kha an pek. 14 Annih nih Tuufa kha an doh lai. Asinain Tuufa cu bawi vialte Bawi, siangpahrang vialte Siangpahrang a si caah a tei hna lai. Amah sinah a ummi, auh a simi hna le thim a simi hna le zumhawktlak a simi hna zong nih an tei hna lai.”
15 Cun vancungmi nih hitin a ka ti: “Na hmuhmi hlawhhlangnu a ṭhutnak ti cu mi hna, mibu hna, miphun hna le holh phunphun a hmangmi hna kha an si. 16 Na hmuhmi ki pahra a ngeimi sahrang nih hlawhhlangnu cu a huat lai, a ngeihmi vialte kha a chuh dih lai i taklawng in a chiah lai. A sa kha a ei lai i mei in a khangh dih lai. 17 Pathian nih a ruahnak kha an lungthin chung ah a chiah i mah ning in a tuahter hna. Pathian bia a tlin hlan tiang an pennak kha sahrang an peknak thawng in aa khatmi an ruahnak ning in an tuah lai. 18 Na hmuhmi minu cu vawleicung siangpahrang hna a uktu, a liannganmi khualipi kha a si.”