Johan sin pekmi Biathlam

6 Tuufa nih cakhenh pasarih lakah pakhat a phoihmi kha ka hmuh. Cun thilnung pali lakah pakhat nih khuari aw bantuk in “Rak ra!” tiah a timi kha ka theih. 2 Ka hun zoh tikah rang raang pakhat ka hmuh, a cung ah aa citmi nih likuk pakhat aa put; Pathian nih bawiluchin a pek i a ral pawl kha tei awk le tei dih cikcek awkah aa thawh.

3 Tuufa nih cakhenh pahnihnak a phoih tikah thilnung pahnihnak nih “Rak ra!” tiah a timi kha ka theih. 4 Cun rang sen pakhat a hung chuak, a cung ah aa citmi cu mi pakhat le pakhat an i thah nakhnga vawleicung in daihnak lakpiaknak nawl pek a si. Cun vainam nganpi zong pek a si.

5 Tuufa nih cakhenh pathumnak a phoih tikah thilnung pathumnak nih “Rak ra!” tiah a timi kha ka theih. Ka hun zoh tikah rang nak pakhat ka hmuh, a cung ah aa citmi nih cuaithlainak pakhat kha aa put. 6 Thilnung pali hna lakin chuah dawh a simi aw thawng pakhat nih “Changvut hraikhat* caah denarii* pakhat, barli hrai thum caah denarii pakhat a si, oliv chiti le mitsur zu kha dihter hna hlah” tiah a timi kha ka theih.

7 Tuufa nih cakhenh palinak a phoih tikah thilnung palinak nih “Rak ra!” tiah a timi kha ka theih. 8 Ka hun zoh tikah rang rau pakhat ka hmuh, a cung ah aa citmi cu Thihnak timi min a ngei i a hnulei in Thlan* nih a zulh. Annih cu vainam sau, mangṭam, thihnak a chuahtermi rai le sahrang hmang in mi thah awkah vawlei cheuli cheukhat cung ah nawlngeihnak pek an si.

9 Tuufa nih cakhenh panganak a phoih tikah Pathian bia ruang le tehte an khaan ruang ah thah a simi hna i an thi cu biakṭheng tang ah ka hmuh. 10 “Lianngan Bik Bawipa, a thiangmi le a hmaanmi, zeitik tiang dah a kan thattu vawlei mi hna kha biaceih loin le phuhlam loin na um lai?” tiah fakpi in an au. 11 Cu tikah Bawipa nih puan raang pakhat cio a pek hna i anmah bantuk in thah a si dingmi an unau hna le an salhawi hna an tlin hlan tiang, tlawmpal in hngak rih ko u tiah a ti hna.

12 Cun Tuufa nih cakhenh paruknak a phoih tikah li fakpi in aa hninhmi kha ka hmuh; nika cu sahmul* in tahmi buri puan bantuk in a nak i thlapa cu thisen bantuk in a sen dih. 13 Thli fakpi in a hran tik i theipi kuh an ṭilh bantuk in vancung arfi cu vawlei ah an tla. 14 Van cu cazual bantuk in aa zual i a lo, tlang vialte le tikulh vialte cu an hmun in ṭhial dih an si. 15 Cun vawleicung siangpahrang hna, uktu hna, ralbawi hna, mirum hna, miṭhawng hna, sal vialte le miluat vialte cu lungkua le tlang cung i lungpi hna lakah an i thup. 16 Tlang hna le lungpi hna kha “Rak kan cimh hnawh u law bawiṭhutdan ah a ṭhumi hmai in le Tuufa thinhunnak in rak kan thup u. 17 Zeicahtiah an thinhunnak, ni lianngan ni cu a phan cang i aho nih dah a in khawh lai?” tiah ngol loin an ti.