Lamkaltu
6 Mah lio caan ah zultu hna cu an karh chin lengmang. Voikhat cu Greek holh a hmangmi Judah mi hna nih an nuhmei pawl cu nifate rawl i phawtnak ah hrelh an si caah Hebru holh a hmangmi Judah mi kha sual an phawt hna. 2 Mah tikah lamkaltu 12 nih zultu dihlak kha an auh hna i, “Pathian bia cawnpiaknak rian kha kaltak riangmang in cabuai ah rawl phawtzamhnak rian ṭuan cu aa tlak lai lo. 3 Cucaah unau hna, nan lakin minṭha a ngeimi, thiang thlarau le fimnak in a khatmi pa pasarih kha thim hna u law a herhmi hi rian hi ṭuan awkah rian kan pek hna lai. 4 Kannih tu cu thlacamnak le Pathian Bia chimnak ah kan caan le kan thazaang dihlak kha kan hman ko lai” tiah an ti. 5 An chimmi cu zultu dihlak an hna a tla. Cucaah a zumhnak a fek i thiang thlarau in a khatmi Steven i telin Filip, Prokhorus, Nikanor, Timon, Parmenas le Judah biaknak ah a rak lutmi Antiok khuami Nikolas kha an thim hna. 6 Cun lamkaltu hna sinah an ratpi hna, lamkaltu hna nih thla an campiak hna i an lu cung ah an kut an chuan.
7 Cuticun Pathian bia cu a karh chin i Jerusalem khua ah zultu an tam chin thluahmah. Tlangbawi tampi zong zumtu an hung si.
8 Pathian mithmai ṭha a hmu i ṭhawnnak in a khatmi Steven nih khuaruahhar thil le hmelchunhnak nganpipi kha mi hmaiah a tuah. 9 Miluat hna Pumhnak Inn tiah auhmi bu chungtel cheukhat cu Steven he bia i al awkah Sairin rammi, Alekzandria khuami, Silisia rammi le Asia pengmi cheukhat he an rak chuak. 10 Asinain Steven nih thiang thlarau bawmhnak in fimnak he bia a chim caah a bia kha an al kho lo. 11 Cucaah “Hi pa nih Moses le Pathian thangchiatnak bia a chimmi kha kan theih” tiah a titu ding kha a thli tein an lem hna. 12 Cun mi hna le upa hna le phungbia cawnpiaktu hna kha an thin a hun nakhnga an forh hna. Annih nih Steven kha ruahlopi in an fuh, hramhram in an tlaih i Judah Biaceihnak Zungpi ah an kalpi. 13 Lih a chimmi tehte zong kha an chuahpi hna i “Hi pa nih biakinn le Nawlbia ralchanh in bia a chim zungzal. 14 Nazareth khuami Jesuh nih hi biakinn hi a ṭheh lai, Moses nih a kan pekmi phungphai kha a thlen lai tiah hi pa nih a chimmi kha kan theih” tiah an chimter hna.
15 Judah Biaceihnak Zungpi i a ṭhumi hna nih Steven kha mit ṭhep loin an zoh tikah a hmai cu vancungmi hmai bantuk a si kha an hmuh.