Galati

4 Ka chim duhmi cu hihi a si: Rocotu cu thilri vialte a ngeitu a si ko nain ngakchia a si chung paoh cu sal he an i dannak zeihmanh a um lo. 2 A pa nih ri a khiahmi caan a phanh hlan tiang tlangtlatu le zohkhenhtu hna kut tang ah a um. 3 Cu bantuk in kannih zong ngakchia kan si lioah cun hi vawlei i a hrampi phunglam sal kan rak si. 4 Asinain rikhiahmi caan a tlin tikah Pathian nih a Fapa kha a rak thlah. Mah Fapa cu nu pakhat nih a hrin i nawlbia tang ah a um. 5 Mah cu nawlbia tang ah a ummi hna kha cawk in luatter awkah a si. Cuticun Pathian fale ah ser kan si kho lai.

6 Atu cu Pathian fale nan si cang. Pathian nih a Fapa sinah a ummi thiang thlarau kha kan lungthin chung ah a chiah. Mah thiang thlarau nih “Abba,* Ka Pa!” tiah a kan auter. 7 Nannih cu sal nan si ti lo, fa nan si cang. Fa nan si ahcun Pathian thawng in rocotu zong nan si.

8 Pathian nan rak hngalh hlanah cun a hmaan lomi pathian hna sal nan rak si. 9 Asinain atu cu Pathian kha nan hngalh cang, Pathian zong nih aan hngalh cang hna. Cu a si ah a derthawmmi le san a tlai lomi a hrampi phunglam ah kir ṭhan in zeicah an sal si ṭhan cu nan duh? 10 Ni le thla le khuacaan le kum hna kha a hleikhun in nan ulh. 11 Nan caah fakpi in rian ka ṭuanmi cu pakpalawng a si sual lai ti ka phang.

12 Unau hna, kei zong a hlanah nanmah bantuk ka rak si nain atu cu kaa thleng cang. Cucaah keimah bantuk in i thleng ve u tiah kaan nawl hna. Ka cung ah palhnak zeihmanh nan tuah lo. 13 Ka dam lo ruang ah nan sinah a voikhatnak thawngṭha chimnak caanṭha ka hmu ti kha nan hngalh ko. 14 Ka damlonak cu nan caah a har ngai lai nain zei rel loin nan ka um lo i nan ka fih lo.* Pathian vancungmi bantuk, Khrih Jesuh bantuk in nan ka cohlan. 15 Mah lio i nan i lawmhnak cu khoika ah dah a um cang? Si kho seh law nan mit hmanh khoih in nan rak ka pek ko hnga tiah ka chim ngam. 16 A hmaan tein ka chim ruang ah maw nan ral ah ka can? 17 Annih nih anmahlei i ṭanter awkah fakpi in an i zuammi cu a ṭhami tinhnak he a si lo. Keimah he hlatter in anmah hnu zulhter an in duh hna caah a si. 18 Asinain keimah ka um lio lawng ah si loin a zungzal in a ṭhami tinhnak he anmahlei ṭanter awkah aa zuammi an um ahcun a ṭha ko. 19 Ka fale hna, nu nih nau nganfahnak a in bantuk in nan caah fahnak ka in ṭhan. Khrih sining nan langhter hlan tiang cutin ka in peng ko lai. 20 Atu ah nan sinah um in bianem deuh tein chim ka hei duh dah. Zeicahtiah nan kong ah ka lung aa tuai tuk.

21 Nawlbia tang ah um a duhmi hna, Nawlbia nih a chimmi kha nan hngal lo maw? 22 Tahchunhnak ah, Abraham nih fapa pahnih a ngeih hna. Pakhat cu salnu nih a hrinpiakmi a si i a dang pakhat cu a luatmi nu* nih a hrinpiakmi a si tiah cathiang ah aa ṭial. 23 Salnu nih a hrinmi cu hawi phung ning in hrinmi a si. A luatmi nu nih a hrinmi tu cu biakamnak thawng in hrinmi a si. 24 Mah thil hna cu langhternak an si. Mah nu pahnih nih biakamnak pahnih kha a aiawh. Pakhat cu Sinai Tlang ah sermi biakamnak a si i mah cu sal a si dingmi fale a hringtu Hagar kha a si. 25 Hagar nih Arabia ram i Sinai Tlang kha a aiawh. A fale he sal an si caah tuchan i Jerusalem khua zong a aiawh. 26 Asinain cunglei Jerusalem cu a luatmi a si i amah cu kan nu a si.

27 “Fa a hring bal lomi nu, a cingmi nu, i lawm tuah. Nau nganfah a ing bal lomi nu, lunglawmhnak in au tuah. Zeicahtiah kaltakmi nu fale cu va a ngeimi nu fale nakin an tam deuh cang” tiah cathiang ah aa ṭial. 28 Unau hna, nannih cu Isak bantuk in biakammi thawng in hrinmi fale nan si. 29 A hlanah hawi phung ning in hrinmi fa nih thlarau thawng in hrinmi fa kha a rak hrem bantuk in atu zong ah hin a si ve. 30 Asinain cathiang nih zeitindah a ti? “Salnu le a fapa kha ṭhawl hna, zeicahtiah salnu fapa cu a luatmi nu fapa he ro an coṭi hrimhrim lai lo” tiah a ti. 31 Cucaah unau hna, kannih cu salnu fale kan si lo, a luatmi nu fale kan si.