Lamkaltu

17 Cun Amfipolis le Apollonia khua kha an pal pah hna i Thesalonika khua an phan, cuka ah Judah mi hna pumhnak inn pakhat a um. 2 Paul cu a tuah tawn bantuk in pumhnak inn ah a lut i zarh thum chung, sabbath ni fatin Cathiang hmang in aa pummi kha a ruahceihpi hna. 3 Khrih cu fahnak a in awk le thihnak in a thawh ṭhan awk a sinak kong kha Cathiang hmang in a fianter i a langhter. Cun “Kaan chimhmi hna Jesuh hi Khrih cu a si” tiah a ti hna. 4 Cucaah mi cheukhat cu Jesuh zultu an hung si i Paul le Silas sinah an i fon. Pathian a biami Greek mi tampi le a min a thangmi nu cheukhat zong Jesuh zultu an hung si.

5 Nahchuahnak a ngeimi Judah mi cheukhat nih chawdawrnak hmun ah a vakvaimi miṭhalo pawl kha an va khawmh hna i mi an pumh hna. Cun khua chung kha an buaiter dih. Mah hnuah Paul le Silas kha an pumhmi hna hmai i chuahpi awkah Jason inn kha an va luh hnawh. 6 An hmuh hna lo tikah Jason le unau cheukhat kha khua uktu pawl sinah an hei hnuh hna i hitin an au: “Khuazakip ah hnahnawhnak a chuahtertu hna cu kan khua zong ah an rak phan cang. 7 Jason zong nih annih kha a inn ah a tlunter hna. Mah mi hna nih Jesuh timi siangpahrang dang pakhat a um rih tiah an ti i Sizar* nawlbia kha an ralchanh.” 8 Mah bia kha an theih tikah mibu le khua uktu hna cu an lau tuk. 9 Cucaah Jason le midang kha aamah khaannak tangka an pekter hna hnuah an thlah hna.

10 Khua a muihle cangka unau pawl nih Paul le Silas kha Berea khua ah an kalter hna. Mah khua an phak tikah Judah mi hna pumhnak inn ah an lut. 11 Berea khuami cu Thesalonika khuami nakin an lung a kauh deuh caah Pathian bia kha lungtak tein an cohlan. An theihmi kong kha a hmaan, hmaan lo ti hngalh awkah Cathiang kha nifatin ṭha tein an hlathlai. 12 Cucaah mi tampi cu zumtu an hung si. Upat awk a tlakmi Greek nu cheukhat le pa cheukhat zong zumtu an hung si. 13 Thesalonika khua i Judah mi hna nih Berea khua zong ah Paul nih Pathian bia a chim ti kha an theih tikah Berea khua ah an ra i hnahnawhnak chuahter ding in mibu kha an forh hna. 14 Mah tikah unau pawl nih Paul kha tilawng dinhnak ah an kalter colh. Silas le Timote tu cu an taangta. 15 Mi cheukhat nih Paul kha Athens khua tiang an hei thlah. An kir tikah Paul nih Silas le Timote kha a ran khawh chung in ka sinah ra hna seh tiah bia a cah hna.

16 Paul nih Silas le Timote a hngah hna lioah Athens khua cu siasal in a khahmi kha a hmuh tikah a lungsi a vang tuk. 17 Cucaah pumhnak inn i Judah mi hna, Pathian a biami hna le chawdawrnak hmun i nifate a hmuhmi hna kha a ruahceihpi hna. 18 Asinain Epikurus* le Zeno* cawnpiaknak a zulmi khuaruahnaklei mifim cheukhat cu Paul he an i al. “Hi holh tam pa hi zeidah a chim duhmi a si hnga?” tiah a timi an um bantuk in “Miphun dang hna khuazing kong a chimmi a si rua” tiah a timi zong an um. Mah cu Paul nih Jesuh kong le thawhṭhannak kong thawngṭha a chim caah a si. 19 Cun Paul kha Areopagas* ah an kalpi i “Na chimmi cawnpiaknak thar hi zeidah a si, na kan chim kho lai maw? 20 Na kan chimhmi cu kan theih bal lomi kong an si. Zei sullam dah a si ti kha hngalh kan duh ko” tiah an ti. 21 Athens khuami hna le cuka ah a rak tlawngmi ramdang mi hna cu an i manh caan paoh ah thil thar kong kha an chim tawn i an ngaih tawn. 22 Paul cu Areopagas ah a dir i,

“Athens khuami hna, nannih cu midang nakin zeizong vialte ah khuazing pawl a ṭihzah deuhmi nan si ti kha ka hmuh. 23 Kaa chawh pah in nan biakmi pawl kha ṭha tein ka ngiat tikah ‘Kan Hngalh Lomi Pathian Caah’ tiah aa ṭialmi biakṭheng pakhat ka hmuh. Cucaah nan hngalh lo buin nan biakmi Pathian kong kha chimh kaan duh hna. 24 Vawlei le a chung i a ummi thil vialte a sertu Pathian cu van le vawlei Bawi a si caah minung sakmi biakinn chung ah a um lo. 25 Minung nih zeihmanh tuahpiak a herh lo, zeicahtiah Pathian cu mi vialte kha nunnak le thaw le zeizong vialte a petu a si. 26 Pathian nih mi pakhat in miphun vialte kha a ser hna i vawleicung pumpi ah khua a sakter hna. A caan le umnak hmun zong ri a khiahpiak hna. 27 Mah cu Pathian kha mi nih an kawl khawh nakhnga caah a si. Pathian kha fakpi in an kawl ahcun an hmuh khawh lai. A tak ti ahcun Pathian cu aho kan sin hmanh in aa hlat lo. 28 Pathian thawng in kan hung um, kan nung i kan cawl, kan caang. Nan biazai phantu hna hmanh nih ‘Kannih zong Pathian fale kan si’ tiah an ti tawn, a si lo maw?

29 “Pathian fale kan si caah Pathian cu minung nih an zungthiamnak in an serchommi sui siasal, ngun siasal le lung siasal hna he aa khat tiah kan ruah awk a si lo. 30 Cutin mi nih an rak hngalh lo lio caan kha cu Pathian nih sual a phaw hna lo nain atu cu hmun kip ah a ummi vialte kha i ngaichih u tiah a ti hna. 31 Pathian nih a thimmi pa thawng in vawleicung ah a ummi hna ding tein bia a ceih hna lai ni kha a khiah cang. Cu ni cu a ra hrimhrim lai, zeicahtiah Pathian nih cu pa cu thihnak in a thawhter cang” tiah a ti.

32 Thawhṭhannak kong kha an theih tikah a cheu nih an nihsawh. A cheu tu nih cun “Mah kong hi voidang ah kan ngai ṭhan te lai” tiah an ti. 33 Cucaah Paul cu an sinin a chuak. 34 Cheukhat cu Paul sinah an i fonh i zumtu an hung si. Cu hna lakah Areopagas biaceihnak zung i biaceihtu Dionisias, Damaris tiah auhmi nu le midang zong an i tel.