Johan

4 Jesuh nih Johan nakin zultu tam deuh a ser hna i tipil a pek hna ti kha Farasi mi nih an theih. Mah kha Bawipa Jesuh nih a hngalh tikah, 2 (Jesuh theng nih tipil a pekmi hna si loin a zultu nih an pekmi hna a si.) 3 Judea ram in a chuak i Galili ram ah a kal ṭhan. 4 Lampi ah Samaria ram kha a tan pah. 5 Saikhar timi Samaria khua pakhat ah a phan. Saikhar khua cu Jakob nih a fapa Josef a rak pekmi lo he aa naih. 6 Cuka ah Jakob tikhor a um. Jesuh cu a khualtlawnnak in a bat caah mah tikhor pawng ah a ṭhu. A caan cu chun suimilam 12* hrawng a si.

7 Mah lioah Samaria minu pakhat cu ti than awkah a ra. Jesuh nih “Ti din awk tlawmpal in rak ka pe” tiah a hal. 8 (A zultu hna cu rawl cawk awkah khua chung ah an kal.) 9 Samaria minu nih “Nang cu Judah mi na si ko nain Samaria mi a simi keimah kha zeicah din awk ti na ka hal?” tiah a ti. (Cutin a halnak a ruang cu Judah mi nih Samaria mi kha pehtlaih an duh hna lo caah a si.) 10 Jesuh nih “Pathian nih zei laksawng dah aan pek ti le ‘Ti din awk tlawmpal in rak ka pe’ tiah aan haltu hi ahodah a si ti kha hei hngal law cu amah kha nunnak ti na hal hnga i nunnak ti cu aan pek ko hnga” tiah a leh. 11 Mah tikah Samaria minu nih “Saya, ti thannak pung hmanh na ngeih ṭung lo, tikhor nih le a thuk fawn. Mah nunnak ti cu khoika in dah na hmuh lai? 12 Hi tikhor hi kan pu Jakob nih a kan pekmi a si. Amah theng zong, a fale zong, a saṭilrun zong nih hi tikhor ti hi an rak din. Nang cu amah nakin maw na ngan deuh?” tiah a ti. 13 Jesuh nih “Hi ti a dingmi cu a ti a hal ṭhan lai. 14 Keimah nih ka pekmi ti a dingmi cu zeitik hmanh ah a ti a hal ti lai lo. A chung ah mah ti cu zungzal nunnak a petu ding cerhti put ah a cang lai” tiah a leh. 15 Samaria minu nih “Saya, ka ti a hal ti nakhnga lo le hika ah ra in ti ka than ti nakhnga lo mah ti cu rak ka pe” tiah a ti.

16 Jesuh nih “Na va kha va au law hika ah rak ratpi” tiah a ti. 17 Minu nih cun “Va ka ngei lo” tiah a leh. Mah tikah Jesuh nih “‘Va ka ngei lo’ tiah na timi cu a hmaan ko. 18 A tak ti ahcun va panga na rak ngei cang. Atu i na umṭimi hi na va a si lo. Na chimmi cu a hmaan ko” tiah a ti. 19 Minu nih cun “Saya, nang cu profet na si ti kha ka hngalh cang. 20 Kan pupa hna nih hi tlang cung ah Pathian kha an rak biak, asinain nannih nih cun Jerusalem khua lawng ah biak awk a si nan ti” tiah a ti. 21 Mah tikah Jesuh nih “Ka chimmi hi zum ko, hi tlang ah le Jerusalem khua ah si loin Pa Pathian kha nan biak caan a phan te lai. 22 Nannih nih cun nan hngalh lomi kha nan biak; kannih Judah mi nih cun khamhnak kong kha hmasa bik ah hngalhnak nawl kan hmuh caah kan hngalhmi kha kan biak. 23 Pa Pathian a bia taktakmi nih cun thlarau le biatak in an biak caan a phan lai. Cu caan cu atu caan hi a si. Cutin a biatu ding kha Pa Pathian nih a kawl hna. 24 Pathian cu Thlarau a si i amah a biami hna nih cun thlarau le biatak in an biak awk a si” tiah a ti. 25 Mah tikah minu nih “Khrih tiah auhmi Messiah a ra lai ti cu ka hngalh ko. Amah a rat tikah zeizong vialte kha fiang tein a kan chimh te ko lai” tiah a ti. 26 Jesuh nih “Amah cu atu nangmah he bia aa ruahmi keimah hi ka si” tiah a ti.

27 Cu lioah cun a zultu pawl an rak phan. Minu pakhat he bia an i ruahmi kha an hmuh tikah an khuaruah a har tuk. Asinain “Bawipa, zeidah na herh?” asiloah “Zeicah mah minu he khan bia nan i ruah?” tiah ahohmanh nih an hal lo. 28 Minu nih cun a ti-um kha a kaltak i khua chung ah a lut. Cun mi kha, 29 “Ra u law ka rak tuahmi thil vialte a ka chim kho dihtu hi rak zoh hmanh u. Khrih a si hnga maw?” tiah a ti hna. 30 Mah tikah khua chung in an chuak i Jesuh sinah an va kal.

31 Cu lioah a zultu pawl nih, “Rabbi, rawl ei cang” tiah an rak fial. 32 Jesuh nih “Nan hngalh lomi ei awk rawl ka ngei” tiah a leh hna. 33 Cucaah a zultu hna cu “Pakhatkhat nih rawl an rak pek i maw a si hnga?” tiah an i ceih. 34 Jesuh nih “Ka rawl cu a ka thlahtu duhnak tuah le a ka fialmi rian liim hi a si. 35 Hi hnu thla li ah rawl ṭuan caan a cu lai tiah nan ti tawn a si lo mei? Kaan chimh hna lai: Lo khi zoh hna hmanh u. Rawl cu an hmin cang i ṭuan an cu cang. 36 Rawlṭuantu hna nih an ṭuan man kha an hmuh bantuk in theitlai zong an pumh hna. Mah theitlai cu zungzal nunnak a hmu dingmi kha an si. Cucaah a tuhtu he, a zuntu he an i lawm. 37 Pakhat nih a tuh i a dang pakhat nih a zun timi bia cu hi kong ah a hmaanmi a si. 38 Nan ṭuan lomi kha zun awkah kaan thlah hna. Midang nih an ṭuan i an ṭuanmi in ṭhatnak nan hmuh” tiah a ti.

39 Samaria minu nih “Ka rak tuahmi thil vialte kha a ka chimh khawh dih” tiah a ti caah cuka khua i Samaria mi tampi nih Jesuh kha an hun zumh. 40 Samaria mi cu an ra i an sinah caam ding in an nawl caah Jesuh cu cuka khua ah nihnih a caam. 41 Jesuh cawnpiaknak kha an theih tikah mi tam chinchin nih an hun zumh. 42 Annih nih minu kha “Na chimmi bia ruang ah kan zumhmi a si lo; kanmah theng nih kan theih caah kan zumhmi a si. Anih cu hi vawlei khamhtu taktak a si ti kha kan hngalh cang” tiah an ti.

43 Nihnih hnuah Jesuh cu Galili ram ah a kal. 44 Profet cu a umnak khua ah upatnak a hmu lo tiah amah theng nih a rak chim bal. 45 Galili ram a phanh tikah Galili mi nih Jesuh kha an rak conglawmh. Zeicahtiah Jerusalem khua i tuahmi puai ah an rak kal ve i Jesuh nih a tuahmi vialte kha an hmuh caah a si.

46 Mah hnuah Jesuh cu ti kha mitsur zu ah a canternak Galili ram, Kana khua ah a rak phan ṭhan. Cu lioah cun Kapernaum khua ah siangpahrang rianṭuantu pakhat i a fapa cu a zaw. 47 Jesuh cu Judea ram in Galili ram ah a phan ti kha a theih tikah mah bawi cu Jesuh sinah a ra i a thi dengmangmi a fapa kha damter awkah a nawl. 48 Jesuh nih “Khuaruahhar thil le hmelchunhnak hna nan hmuh lo ahcun nan zum lai lo” tiah a ti tikah, 49 cu bawi nih cun “Bawipa, ka fapa te cu a thi dengmang cang. Zokzok in ra law rak ka zohpiak” tiah a nawl. 50 Jesuh nih “Inn ah va ṭin ko; na fapa cu a dam cang” tiah a ti tikah Jesuh bia kha a zumh i inn ah a ṭin. 51 Lampi ah a sinum hna nih an rak don i “Na fapa cu a dam cang” tiah an chimh. 52 Zeitik ah dah a dam tiah a hal hna tikah “Nizan chun suimilam 1* hrawng ah a taklinh cu a dai” tiah an ti. 53 Cu caan cu Jesuh nih “Na fapa cu a dam cang” tiah a ti caan te a si ti kha mah bawi nih a hngalh. Cucaah amah le a chungkhar dihlak nih Jesuh kha an hun zumh. 54 Mah cu Judea ram in Galili ram a kir hnuah Jesuh nih a voihnihnak khuaruahhar thil a tuahmi a si.