Hebru

4 Cucaah Pathian dinhnak chung ah nan lut kho timi biakam cu a hmunh rih caah mah biakam he aa tlak lomi kan si sual nakhnga lo i ralring hna u sih. 2 Thawngṭha cu kan sinah phuan a si bantuk in an sin zong ah phuan a si ve. Asinain nawl a ngaimi hna zumhnak bantuk kha an ngeih lo caah an theihmi bia nih ṭhathnemhnak a pe hna lo. 3 Zumhnak a ngeimi kannih tu cu Pathian dinhnak chung ah kan lut cang. Pathian nih vawlei ser hramthawk* tein a rian cu a liim cang ko nain “‘Annih cu kaa dinhnak chung ah an lut lai lo’ tiah thinhung ngai in chiat ka ser” tiah a ti. 4 Nisarihnak ni he aa tlaiin cathiang nih “Pathian cu nisarihnak ni ah a rian vialte in aa din” tiah a ti. 5 Cun “Annih cu kaa dinhnak chung ah an lut lai lo” ti zong in a ti.

6 Thawngṭha a thei hmasami hna cu nawl an ngaih lo caah Pathian dinhnak chung ah an lut kho lo. Asinain mi cheukhat caah cun luh khawh a si rih ko. 7 Kum tampi hnuah Pathian nih David ṭialmi salm hla ah “Nihin ah ka bia kha ngai u. Nan lungkhong hlah u” tiah a ti. “Nihin” tiah auhmi a dang ni nikhat kha a khiah ṭhan. 8 Joshua nih Pathian dinhnak hmun ah rak luhpi hna seh law cu kum tampi hnuah a dang ni nikhat kong kha Pathian nih a chim ti hnga lo. 9 Cucaah Pathian miphun caah sabbath dinhnak ni a um rih. 10 Zeicahtiah Pathian cu a rian in aa dinh bantuk in Pathian dinhnak ah a lutmi hna zong an rian in an i din ve.

11 Cucaah Pathian dinhnak chung luh awkah fakpi in i zuam hna u sih. Cutin kan tuah lo ahcun nawlngai lomi hna lam kha kan zulh ve sual lai. 12 Pathian bia cu a nung i a ṭhawng. Zei bantuk kap hnih haar vainam nakhmanh in a haar deuh, nunnak* le thlarau,* hliahcaang le thlek tiang hmanh a cheu khawh dih. Lungthin ruahnak le duhnak zong a thleidan khawh. 13 Pathian mithmuh ah thuh khawhmi sermi thil zeihmanh a um lo. Kan kong kan i chim te lainak ding Pathian hmaiah cun zeizong vialte hi khuh khawh an si lo i an lang dih.

14 A liannganmi tlangbawi ngan a simi Pathian Fapa Jesuh cu vancung ah a kai cang. Cucaah a kong kha zapi hmaiah chim zungzal hna u sih. 15 Kan ngeihmi tlangbawi ngan cu kan derthawmnak cung ah zawnruahnak a ngei kho lomi a si lo. Kanmah bantuk in a lam kip in hneksaknak a tongmi a si. Asinain sualnak zeihmanh a tuah lo. 16 Cucaah velngeihnak in a khatmi Pathian bawiṭhutdan kha fuh hna u sih. Zalong tein biachimnak nawl kha hmang in thlacam hna u sih. Cuticun bawmh kan herh lio caan te ah zaangfahnak le velngeihnak kan hmu lai.