Peter Pakhatnak

2 Ṭhatlonak, i hlennak, chungthu lengnal sinak, nahchuahnak le thangchiatnak vialte kha hrial u. 2 Ngakchia chuakka nih a nu hnuk a duh tuk bantuk in nannih zong hnuk thiang a simi Pathian bia kha duh tuk ve u. Cuticun mah hnuk thiang thawng in nan ṭhang lai i khamhnak nan hmu lai. 3 Zeicahtiah Bawipa zaangfahnak cu nan teh cang.

4 Mi nih an hlawt nain Pathian caah cun a sunglawi i a thimmi, a nungmi lung Bawipa sinah nan ra cang. 5 A nungmi lung bantuk a simi nanmah thengte hi thlaraulei biakinn ah sak nan si. Cucaah a thiangmi tlangbawi phun nan hung si i Jesuh Khrih thawng in Pathian cohlanmi thlaraulei raithawinak kha nan pek. 6 “Thimmi lung, a sunglawimi a hrampi a kil lung kha Zion ah ka chiah. Mah lung a zummi paoh cu zeitik hmanh ah an lung a dong lai lo” tiah Cathiang ah aa ṭial.

7 Cucaah nannih zumtu caah cun anih cu a sunglawimi a si nain zumlotu caah cun cutin a si lo. Cathiang nih “Innsatu hna nih an hlawtmi lung cu lung santlai bik a kil lung* a hung si” tiah a ti. 8 Cun “Tlukrilhtertu lung le dawnkhantu lungtum” zong a hung si. Annih cu Pathian bia an ngaih lo ruang ah an tlukrilhmi a si. Cutin an ton awk a si ko. 9 Muihnak in khuaruahhar a simi ceunak ah aan autu hna Pathian i “a ṭha tukmi a sining hna kha khuazakip ah thanh ding in thimmi miphun, siangpahrang tlangbawi phun, a thiangmi miphun, a hleiin amah ta a simi miphun” nan si. 10 Hlanah cun Pathian miphun nan rak si lo, asinain atu cu Pathian miphun nan si cang; hlanah cun zaangfahnak nan rak hmu lo, asinain atu cu zaangfahnak nan hmu cang.

11 Ka dawtle hna, nannih cu ramdang mi le khual bantuk nan si. Cucaah nanmah he aa domi nan pumsa duhnak kha hrial awkah kaan forh hna. 12 Vawlei mi hna hmaiah a ṭhami nan ziaza kha langhter peng ko u. Cuticun miṭhalo tiah sual an in puh hna tikah a ṭhami nan tuahsernak kha an hmuh caah hneksaknak ni ah Pathian kha an thangṭhat lai.

13 Bawipa ruang ah minung nawlngeitu hna tang ah i dor ko u. Nanmah nakin a lianngan deuhmi siangpahrang a si ah, 14 thil ṭhalo a tuahtu dantat awk le thilṭha a tuahtu thangṭhat awkah siangpahrang nih a thlahmi uktu an si ah an tang ah i dor u. 15 Pathian duhnak cu thilṭha nan tuahnak thawng in khuaruahnak a ngei lomi hna nih an chimmi hruh bia daihter kha a si. 16 A luatmi bantuk in um u. Asinain nan luatnak kha ṭhatlonak khuhnak* caah hmang hlah u. Pathian sal bantuk tu in um u. 17 Mi phunzakip* kha upat hna u. Zumtukhat unau vialte kha daw hna u. Pathian kha ṭih u law siangpahrang kha upat hna u.

18 Salle zong nih ṭihzah upatnak he an bawile tang ah i dor hna seh. A lungthin a ṭhami le a tlarimi sin lawng ah si loin a lungton a harmi bawi sin zong ah i dor hna seh. 19 Zeicahtiah mi pakhat nih Pathian hmaiah a thiangmi chiaṭha thleidannak lungthin ngeih awkah harnak le dinlonak a in ahcun Pathian lung a ton lai. 20 Sualnak nan tuah ruang ah tuknak nan huah ahcun mah cu thangṭhat awk tlak a si maw? Asinain ṭhatnak nan tuah ruang ah fahnak nan in ahcun mah cu Pathian duhmi a si.

21 Nannih cu hi caah hin pei auh nan si cu. Khrih zong nan caah fahnak a ing i a keneh kha naih tein nan zulh nakhnga zohchunh awk ṭha aan chiahpiak cang hna. 22 Sualnak zeihmanh a tuah lo i lihbia a chim lo. 23 Serhsat a si tikah serhsatnak in a let hna lo. Fahnak a in tikah a tlerh hna lo. Ding tein bia a ceihtu Pathian kut tu ah amahle amah aa ap. 24 Tung cung ah khenh a si tikah kan sualnak kha a pum in amah hrimhrim nih a phorh. Mah cu sualnak in kan luat nakhnga le dinnak in kan nun nakhnga caah a si. Cun “Nannih cu a hma in damter nan si.” 25 Nannih cu lam a pialmi tuu bantuk nan si, asinain atu cu nan tuukhal le nan hruaitu sinah nan kir cang.