Lamkaltu

5 Ananias le a nupi Safira nih an vawlei cheubang kha an zuar. 2 Asinain Ananias nih a zuarmi man tangka cheukhat kha a thuh, mah kha a nupi zong nih a hngalh. Cun a taangmi kha a rak put i lamkaltu pawl a pek hna. 3 Mah tikah Peter nih “Ananias, zeicah na lungthin kha Satan naa ukter i thiang thlarau kha na hlen ngam? Vawlei na zuar man tangka cheukhat kha zeicah na thuh? 4 Mah vawlei kha na zuar hlan paoh cu nangmah ta a si ko lo maw? Na zuar hnu zong ah tangka cu na duh ning in na hman khawh ko lo maw? Hi bantuk thil tuah awkah zeicah khua na ruah? Mah cu minung na hlenmi si loin Pathian na hlenmi a si” tiah a ti. 5 Mah bia a theih tikah Ananias cu a tlu i a thi. Mah thawng a theimi paoh cu ṭihnak in an khat. 6 Tlangval pawl an ra i a ruak kha puan in an zual, leng ah an chuahpi i an vui.

7 Suimilam pathum hrawng a rauh hnuah a nupi cu a cangmi kong zeihmanh hngal loin a rak lut ve. 8 Peter nih “Nan pahnih in vawlei nan zuar man cu hi zat hi maw a si?” tiah a hal tikah anih nih “A si, hi zat hi a si ko” tiah a leh. 9 Peter nih “Jehovah* thlarau hneksak awkah nan pahnih in zeicah khua nan khaan? Zoh hmanh! Na va a vuitu pawl cu innka hram ah an phan cang. Nangmah zong an in chuahpi ve lai” tiah a ti. 10 Chikkhat te ah anih zong Peter kehram ah a tlu i a thi ve. Tlangval pawl cu an rak lut i a thihmi kha an hmuh tikah an chuahpi i a va pawng ah an vui. 11 Cucaah Khrihfabu ningpi in le mah thawng a theimi vialte cu ṭihnak in an khat.

12 Lamkaltu hna nih khuaruahhar thil le hmelchunhnak hna kha mi hmaiah an tuah lengmang. An dihlak in Solomon Deu ah an i pum tawn. 13 Midang tu cu an sinah an i tel ngam lo; asinain mizapi nih cun an thangṭhat ko hna. 14 Bawipa a zummi pa le nu hna cu an karh chin lengmang. 15 Mizaw hmanh kha zatlang lam ah an zawnh hna i ihphah le pher cung ah an ihter hna. Peter aa chawh tikah a thladem cu an cung ah a tla lai i an dam hnga maw timi ruahchannak he a si. 16 Jerusalem pawngkam khua hna in mi tampi cu an ra thluahmah i a zawmi le khuachia nih a tuahmi kha an ratpi hna. A zawmi vialte cu an dam dih.

17 Asinain tlangbawi ngan le a sinah a ummi Sadusi bu chungtel hna cu an thin a hung tuk i nahchuahnak in an khat. 18 Cucaah lamkaltu hna kha an tlaih hna i thong ah an thlak hna. 19 Asinain Jehovah* vancungmi nih thonginn kutka kha a hunpiak hna i a chuahpi hna. 20 Cun “Va kal u, biakinn ah va dir u law nunnak a pemi bia vialte kha mi nih an theih nakhnga va chim peng u” tiah a cah hna. 21 Mah bia an theih hnuah zingka tein biakinn chung ah an lut i an cawnpiak hna.

Tlangbawi ngan le a mi pawl cu an rak phan i Judah Biaceihnak Zungpi chungtel le Israel mi upa dihlak kha an pumh hna. Mah hnuah lamkaltu pawl ratpi ding in thonginn ah mi an thlah hna. 22 Asinain an thlahmi hna cu an va phanh tikah lamkaltu hna kha thonginn ah an hmu ti hna lo. Cucaah an rak kir ṭhan i thil sining kha an chimh hna. 23 “Thonginn kutka cu ṭha tein aa hrenhmi le a cawngtu hna zong kutka hram ah an dirmi kha kan hmuh ko. Asinain kutka kan on tikah a chung ah ahohmanh kan hmu hna lo” tiah an ti. 24 Mah kha biakinn haotu le tlangbawi upa hna nih an theih tikah zei thil dah a cang rih hnga tiah an khuaruah a har. 25 Mah lioah mi pakhat a ra i “Zoh hmanh u! Thong nan thlakmi hna cu biakinn ah an dir i mi kha an cawnpiak len ko hna” tiah a chimh hna. 26 Cucaah biakinn haotu cu biakinn cawngtu hna he an va kal i mi nih lung in an kan cheh sual lai ti an phan caah lamkaltu pawl kha fahnak pe loin an ratpi ṭhan hna.

27 An ratpi hna hnuah Judah Biaceihnak Zungpi chung ah an dirter hna. Cun tlangbawi ngan nih bia a hal hna. 28 “Mah min in nan cawnpiak ti hna lai lo tiah fakpi in nawl kan in pek hna, asinain zoh tuah u! Jerusalem khua hi nan cawnpiaknak in nan khahter dih cang. Mah pa a thihmi cu kanmah ruang ah a si tiin maw sualphawt nan kan duh?” tiah a hal hna. 29 Peter le a dang lamkaltu hna nih “Minung bia nakin uktu Pathian bia kha kan ngaih deuh awk a si. 30 Nanmah nih thingtung cung ah nan thlai i nan thahmi Jesuh kha kan pupa hna Pathian nih a nunter ṭhan cang. 31 Israel mi pawl an i ngaihchih nakhnga le sual ngaihthiam an si nakhnga amah kha Hruaitu le Khamhtu in Pathian nih a orhlei kam ah a hlorh cang. 32 Kannih cu hi thil vialte a hmutu tehte kan si. Pathian nih amah kha an uktu in a cohlang i a nawl a ngaimi pawl a pekmi hna thiang thlarau zong tehte a si ve” tiah an leh hna.

33 Mah bia an theih tikah an thin a hung tuk i lamkaltu pawl kha thah an duh hna. 34 Mah tikah Gamaliel tiah auhmi Farasi* mi pakhat cu Judah Biaceihnak Zungpi ah a dir i lamkaltu pawl kha a leng ah chikkhat chuahter ding in nawl a pek hna. Anih cu mi nih an upat ngaimi Nawlbia cawnpiaktu a si. 35 Mah hnuah anih nih “Israel mi hna, hi mi hna cung ah tuah nan i timhmi thil kong ah i ralring u. 36 Tahchunhnak ah, hlanlio ah Theudas timi pa pakhat a rak chuak i amahle amah kha a biapimi ka si aa ti caah mi 400 hrawng nih a hnu an zulh. Asinain amah cu thah a si caah a zultu pawl cu an i ṭhek dih i an tlau dih. 37 Mah hnuah Galili mi Judas zong milu rel caan ah a hung chuak ve i mi kha a hnu zulh awkah a lem hna. Mah pa zong thah a si tikah a zultu vialte cu an i ṭhek dih. 38 Cucaah atu thil sining zong ah annih kha hnahnawhnak pek loin anmah um in umter ko hna u tiah ti kaan duh hna. Zeicahtiah hi khuakhannak le rianṭuannak cu minung sinin a rami a si ahcun a rawk ko lai. 39 Asinain Pathian sinin a rami a si ahcun nan hrawk kho lai lo. Pathian dotu lehlam ah nan cang sual lai” tiah ralrin a pek hna. 40 Ruahnak a cheuhmi hna kha an cohlan i lamkaltu pawl kha an auh ṭhan hna. An tuk hna hnuah Jesuh min in phungchim ti lo awkah nawl an pek hna i an thlah hna.

41 Lamkaltu hna cu Jesuh min ruang ah ningzah in awk aa tlakmi in rel an si caah Judah Biaceihnak Zungpi in lunglawm thanuam tein an chuak. 42 Mah hnuah Jesuh Khrih kong thawngṭha kha biakinn lawng ah si loin innkhat hnu innkhat ah kal in nifatin an cawnpiak hna.