Johan

20 Zarh i a nikhatnak ni, zingka khuadei hlanah Mary Magdalin cu thlan ah a kal i thlankhar lung a rak i thawn cangmi kha a hmuh. 2 Cucaah Simon Peter le Jesuh nih a dawtmi a dang zultu sinah a va tli i “Bawipa cu thlan in an lak cang, khoika ah dah an chiah ti kha kan hngal lo” tiah a ti hna.

3 Cun Peter le a dang zultu cu thlan ah an kal. 4 An pahnih in an tli nain a dang zultu cu Peter nakin a ran deuh caah thlan ah a phan hmasa. 5 A kun i a vun zoh tikah khiangraang puan kha a hmuh, asinain a chung ah a lut lo. 6 Cun Simon Peter zong a rak phan i thlan chung a luh tikah khiangraang puan kha a hmuh. 7 Jesuh a lu an mennak puan le a pum an zualnak puan cu aa bil i a dang tein an um. 8 Thlan ah a phan hmasami a dang zultu zong a chung ah a lut i a hmuh tikah an chimmi kha a zumh. 9 Asinain Jesuh cu thihnak in a tho ṭhan lai timi cathiang bia kha an hngalthiam rih lo. 10 Cucaah zultu hna cu inn ah an ṭin.

11 Mary tu cu thlan leng ah a ṭah buin a taangta. A ṭah pah in a kun i thlan chung a zoh tikah, 12 puan raang aa aihmi vancungmi pahnih cu Jesuh ruak an chiahnak ah a lulei ah pakhat, a kelei ah pakhat an ṭhutmi kha a hmuh. 13 “Zeicah na ṭah?” tiah an hal tikah “Ka Bawipa kha pakhatkhat nih an lak cang, khoika ah dah an chiah ti ka hngal lo” tiah a leh hna. 14 Cutin a chim hnuah hnulei aa mer i Jesuh a dirmi kha a hmuh. Asinain Jesuh a si kha a hngal lo. 15 Jesuh nih “Zeicah na ṭah? Ahodah na kawl?” tiah a hal. Mary nih dum cawngtu ah a ruah i “Saya, nangmah nih a ruak kha na lak ahcun na chiahnak hmun kha ka chim law ka va lak lai” tiah a ti. 16 Jesuh nih “Mary!” tiah a auh tikah Mary cu a hun i mer i Hebru holh in “Rab·bo′ni!” tiah a ti. (A sullam cu “Saya!” tinak a si.) 17 Jesuh nih “Ka tlai peng hlah, ka Pa sinah ka kal rih lo. Asinain ka unau hna sinah va kal law ‘Ka Pa le nan Pa, ka Pathian le nan Pathian sinah ka kal cang lai’ a ti tiah va chim hna” tiin a ti. 18 Mary Magdalin cu zultu hna sinah khan a kal i “Bawipa kha ka hmuh!” tiah a ti hna. Jesuh nih a cahmi vialte kha a chimh hna.

19 Mah ni cu zarh i a nikhatnak ni a si. Zanlei khua a tlai tikah zultu hna cu an i pum i Judah mi kha an ṭih hna caah innka an i kharkhumh. Jesuh cu an laifang ah a hung dir i “Nan cung ah daihnak um ko seh” tiah a ti hna. 20 Cutin a chim hnuah a kut le a hnak kha a hmuhsak hna. Zultu hna cu an Bawipa an hmuh caah an i lawm tuk. 21 Jesuh nih “Nan cung ah daihnak um ko seh. Ka Pa nih hi vawlei ah a ka thlah bantuk in kei zong nih hi vawlei ah kaan thlah ve hna” tiah a ti ṭhan hna. 22 Cutin a chim hnuah a thaw in a chem hna i “Thiang thlarau hmu ko u. 23 Mi pakhat a sualnak nan ngaihthiam ahcun Pathian zong nih a ngaihthiam ve lai. Nan ngaihthiam lo ahcun Pathian nih a ngaithiam ve lai lo” tiah a ti hna.

24 Asinain Jesuh an sin a langh lioah lamkaltu 12 lak i Faphir tiah auhmi Thomas cu a rak um lo. 25 Cucaah a dang zultu hna nih “Bawipa kan hmuh!” tiah an chimh tikah Thomas nih “A kut thir an khenhnak hmaneh kha ka hmuh i ka kutdong in ka tawngh lo ahcun, a hnak zong ka kut in ka tawngh lo ahcun ka zum kho hrimhrim lai lo” tiah a ti hna.

26 Niriat a rauh hnuah zultu hna cu inn pakhat ah an i pum ṭhan i Thomas zong a um ve. Innka an hrenh ko nain Jesuh cu an laifang ah a hung lang i “Nan cung ah daihnak um ko seh” tiah a ti hna. 27 Cun Jesuh nih Thomas cu “Na kutdong in ka kut hi tawng tuah, ka hnak zong hi na kut in tawng tuah. Na lunghring ti hlah, zum cang ko” tiah a ti. 28 Mah tikah Thomas nih “Ka Bawipa le ka Pathian!” tiah a ti. 29 Jesuh nih “Na ka hmuh caah maw na zumh? A ka hmu lo nain a zummi cu lunglawmmi an si” tiah a ti.

30 A tak ti ahcun mah cazual ah ṭial lomi a dang khuaruahhar thil tampi zong Jesuh nih a zultu hna hmaiah a tuah. 31 Asinain mah kong hna ṭial a simi cu Jesuh cu Khrih le Pathian Fapa a si ti nan zumh nakhnga le cutin nan zumh i a min thawng in nunnak nan hmuh nakhnga caah a si.