Korin Pakhatnak

13 Minung holh le vancungmi holh hmanh hei holh thiam ning law dawtnak ka ngeih ṭung lo ahcun darkhuang hnachet thawng le sumsel aa khawngmi bantuk ka si hnga. 2 Profet bia chim khawhnak laksawng, a thiangmi biathli vialte hngalh khawhnak, hngalhnak vialte le tlang ṭhial khawhnak zumhnak hmanh ngei ning law dawtnak ka ngeih lo ahcun zeihmanh ka si hnga lo. 3 Midang bawmhnak caah ka ngeihmi thil vialte hmanh hmang ning law, kaa porhlawt nakhnga ka nunnak hmanh pe ning law dawtnak ka ngeih lo ahcun ka caah ṭhathnemhnak zeihmanh a um lo.

4 Dawtnak cu a lung a sau i zaangfahnak a ngei. Dawtnak cu a nah a chuak lo, aa porhlaw lo i a lung a puam lo, 5 dawhcah loin khua a sa lo,* amah zawn lawng aa ruat lo, fawi tein a thin a hung lo, palhnak kha aa cinken peng lo, 6 dinlonak ah aa lawm lo i biatak tu ah aa lawm. 7 Dawtnak cu zeitik hmanh ah a lung a dong lo, zeizong vialte kha a zumh, zeizong vialte kha aa ruahchan i zeizong vialte kha a inkhawh.

8 Dawtnak cu dongh a thiam lo. Profet bia chim khawhnak laksawng cu a dong lai, holh dangdang chim khawhnak cu a dong lai, hngalhnak zong a lo lai. 9 Zeicahtiah hngalhnak kan ngeihmi cu a tling lo, profet bia kan chimmi zong a tling lo. 10 Asinain a tlingmi a phanh tikah cun a tling lomi cu a lo lai. 11 Ngakchia ka si lioah cun ngakchia bantuk in bia ka chim, ngakchia bantuk in khua ka ruat i ngakchia bantuk in ka tuaktan. Asinain upa ka hun si tikah ngakchia sining hna kha ka hlawt. 12 Atu ah hin cun dar thlalang ah kan i zoh bantuk in, maw chialchual in kan hmuh. Asinain mah tikah cun hmaitonh in hmuh bantuk in fiang tein kan hmuh te lai. Atu ah cun tling tein ka hngal lo, asinain Pathian nih tling tein a ka hngalh bantuk in tling tein ka hngalh te lai. 13 A hmun zungzalmi thil pathum a um: cu hna cu zumhnak, ruahchannak le dawtnak an si i cu hna lakah a ngan bikmi cu dawtnak a si.