Johan sin pekmi Biathlam

22 Cun vancungmi nih nunnak ti a luangmi tiva pakhat kha a ka hmuhsak, mah tiva cu crystal lungvar bantuk in a fim, Pathian le Tuufa bawiṭhutdan hram in, 2 khuapi lam laifang ah a luang thluahmah. Tivakam veve ah nunnak thingkung an um i thlakhat ah voikhat, kumkhat ah voi 12 a tlai. Thingkung a hnah cu miphun hna caah damnak a si.

3 Cun khuapi ah chiatserhnak a um ti lai lo. Pathian le Tuufa bawiṭhutdan cu khuapi chung ah a um lai i a salle nih Pathian kha an biak lai. 4 Annih nih a hmai kha an hmuh lai i an cal ah a min aa ṭial lai. 5 Cun zan zong a um ti lai lo. Meiinn ceunak siseh, nika ceunak siseh an herh ti lai lo. Zeicahtiah Jehovah* Pathian cu an ceunak a si lai i annih nih siangpahrang in zungzal in zungzal tiang an uk lai.

6 Hitin a ka ti: “Hi bia cu zumhawk a tlakmi le a hmaanmi an si. Profet hna hmang in bia a chimtu Jehovah* Pathian nih a rauhhlan ah a cang dingmi thil hna kha a salle sin phuan awkah vancungmi kha a thlah. 7 Zoh hmanh! Khulrang in ka ra lai. Hi cazual chung i chimchungbia a zulmi paoh cu mi lunglawm an si.”

8 Keimah Johan nih hi thil hna hi ka theih i ka hmuh. Cutin ka theih i ka hmuh tikah hi thil hna a ka hmuhsaktu vancungmi kha biak awkah a kehram ah ka bawk. 9 Asinain “I ralring tuah! Cutin tuah hlah! Kei zong nangmah le na unau profet hna le hi cazual ah aa ṭialmi bia a zulmi hna salhawi pei ka si ve ko cu. Pathian tu kha bia” tiah a ka ti.

10 Hiti zong in a ka ti: “Rikhiahmi caan cu a naih cang caah hi cazual chung i chimchungbia hna hi cakhenh khenh hlah. 11 Midinglo cu ding loin um rih ko seh, fih a nungmi cu fihnung in um rih ko seh; miding mi cu ding tein um rih ko seh, mithiang mi cu thiang tein um rih ko seh.

12 “‘Zoh hmanh! Khulrang in ka ra lai, mikip kha an tuahsernak ning cio in ka cham hna lai. 13 Keimah cu Alfa le Omega,* hmasa bik le hmanung bik, hramthawknak le donghnak ka si. 14 Nunnak thingkung i a thei einak nawl an hmuh nakhnga le khuapi chung ah a kutka in an luh khawh nakhnga an puan a sumi cu mi lunglawm an si. 15 Khua leng ah uico bantuk a simi,* khuachia thiamnak a hmangmi, nupa sualnak* a tuahmi, lai a nawngmi, siasal a biami, bia le tuahsernak in mihlen a duhmi hna an um.’

16 “‘Keimah Jesuh nih Khrihfabu hna ṭhatnak caah hi kong hna hi na sinah tehte khaan ding in ka vancungmi kha ka rak thlah. Keimah cu David tefa, David hrinsor le deirel arfi ceu ka si.’”

17 Cun thiang thlarau le monu nih “Ra u!” tiah an ti lengmang. Cu bia a theimi zong nih “Ra u!” tiah ti ve hna seh. A ti a halmi paoh ra hna seh; a duhmi paoh nih nunnak ti kha man loin i lak hna seh.

18 “Hi cazual chung i chimchungbia hna a theimi paoh sinah ka chim lai: Hi thil hna ah a chapmi cu hi cazual chung i aa ṭialmi dantatnak kha Pathian nih a chap lai; 19 hi cazual chung i chimchungbia hna a zukmi cu cazual chung i aa ṭialmi a covo kha Pathian nih a lakpiak lai. Nunnak thingkung i a thei einak nawl le khuathiang chung luhnak nawl a pe lai lo.

20 “Hi kong hna tehte a khangtu nih ‘A si, khulrang in ka ra lai’ tiah a ti.”

“Amen! Bawipa Jesuh, ra cang ko.”

21 Bawipa Jesuh vel cu mithiang mi hna sinah um ko seh.