Johan sin pekmi Biathlam
5 Bawiṭhutdan cung ah a ṭhumi nih a orhlei kut in cazual pakhat aa putmi kha ka hmuh. Cazual cu a chunglei he, a lenglei he ca aa ṭial i cakhenh pasarih in fek tein aa khenh. 2 Cun a ṭhawngmi vancungmi pakhat kha ka hmuh i, “Cakhenh phoih awk le cazual samh awkah ahodah aa tlak?” tiah aw thangpi in a au. 3 Asinain van ah siseh, vawlei ah siseh, vawlei tang ah siseh cazual a samh kho i a zoh khomi ahohmanh an um lo. 4 Cazual kha samh in zoh awkah aa tlakmi ahohmanh an um lo caah fakpi in ka ṭap. 5 Mah tikah upa pakhat nih “Ṭap ti hlah. Zoh hmanh! David tefa,* Judah phun a simi Chiandeih cu teinak a hmuh cang caah cakhenh pasarih kha a phoih khawh cang” tiah a ka ti.
6 Cun bawiṭhutdan le thilnung pali le upa hna laifang ah a dirmi, thah dawh a rak simi tuufa pakhat kha ka hmuh. Tuufa cu ki pasarih le mit pasarih a ngei. A mit nih vawleicung pumpi ah thlahmi Pathian thlarau pasarih kha a aiawh. 7 Tuufa cu a kal i bawiṭhutdan cung ah a ṭhumi orhlei kut i cazual kha a lak colh. 8 Cazual a lak tikah thilnung pali le upa 24 cu Tuufa hmaiah an khuk an i bil. Pakhat cio nih tingtang le rimhmui in a khatmi sui kheng pakhat cio an i put. (Rimhmui nih mithiang mi hna thlacamnak kha a aiawh.) 9 Cun hla thar kha an sa i, “Nangmah cu cazual lak awk le cakhenh phoih awkah naa tlak. Zeicahtiah thah na rak si i na thisen in phun kip, holh kip, mi kip le ram kip chung in mi kha Pathian caah na cawk hna. 10 Kan Pathian caah siangpahrang le tlangbawi ah na ser hna i annih nih siangpahrang in vawlei kha an uk lai” tiah an ti.
11 Cun ka hun zoh tikah bawiṭhutdan le thilnung hna le upa hna velchum ah a ummi vancungmi tampi aw kha ka theih. Annih cu a thongthong le a sangsang an si. 12 Annih nih “Thah a simi Tuufa cu ṭhawnnak, rumnak, fimnak, thazaang, upatnak, sunparnak le thangṭhatnak hmuh awkah aa tlak” tiah aw thangpi in an au.
13 Cun vancung, vawleicung, vawlei tang le rili chung ah a ummi sermi thil vialte le thilnung vialte nih “Bawiṭhutdan cung ah a ṭhumi le Tuufa cung ah thangṭhatnak, upatnak, sunparnak le lianngannak cu zungzal in zungzal tiang um ko seh” tiah an timi kha ka theih. 14 Thilnung pali nih “Amen!” tiah an ti, upa hna cu an khuk an i bil i Pathian kha an biak.