Matthai

13 Mah ni ah Jesuh cu inn in a chuak i rilikam ah a ṭhu. 2 A sinah mi tampi an rat caah lawng cung ah a kai i a ṭhu, mibupi tu cu rilikam ah an dir. 3 Cun Jesuh nih tahchunhnak hna hmang in a konglam tampi a cawnpiak hna. Hitin a ti: “Voikhat cu thlaici vorhtu pa cu thlaici vorh awkah aa thawh. 4 Thlaici a vorh tikah thlaici cheukhat cu lamcung ah an tla i va nih an rak ei. 5 Thlaici cheukhat cu vawlei a tlawmnak lung cung ah an tla. Vawlei cu a chah lo caah khulrang in a keuh colh. 6 Asinain ni a hun chuak i thlaikheu hme tete kha a emh hna tikah an hram a thuh lo caah an car colh. 7 Thlaici cheukhat cu hling lakah an tla, hlingkung cu an hun ṭhan tikah a khuh dih hna. 8 Thlaici cheukhat cu vawlei ṭhatnak ah an tla i a let 100, a let 60, a let 30 in an vui. 9 Hna a ngeimi nih thei ko hna seh.”

10 A zultu hna cu a sinah an ra i “Bawipa, zeicah tahchunhnak hmang in na cawnpiak hna?” tiah an hal. 11 Jesuh nih hitin a leh hna: “Nannih cu vancung Pennak he aa tlaimi, a thiangmi biathli hngalh khawhnak pek nan si nain annih tu cu pek an si lo. 12 A ngeimi cu chap an si lai, liam lakin chap an si lai. A ngei lomi cu a ngeihchunte hmanh kha chuh a si lai. 13 Annih nih a zoh cu an zoh ko nain an hmu lo, a theih cu an theih ko nain an hngalthiam lo. A sullam kha an i fiang lo. Cucaah tahchunhnak hna hmang in ka chimmi a si. 14 Profet Isaiah chimmi bia cu an sinah a tling, ‘Nan theih ko nain a sullam kha nan hngal hlei lai lo, nan zoh ko nain nan hmu hlei lai lo. 15 Hi mi hna nih an lung innka kha an khar, an theih ko nain an zul lo, zeihmanh an theih lo nakhnga an hna kha an i phih, zeihmanh an hmuh lo nakhnga an mit an i chinh. Cucaah a sullam kha an i fiang lo. Keimah sin an i mer lo caah kei zong nih an dam ṭhan nakhnga ka thlop kho ve hna lo’ tiah aa ṭial.

16 “Asinain nannih cu nan mit nih a hmuh i nan hna nih a theih caah lunglawmmi nan si. 17 Biatak kaan chimh hna lai, profet hna le miding mi hna nih nan hmuhmi kha hmuh an duh nain an rak hmu lo, nan theihmi kha theih an duh nain an rak thei lo.

18 “Atu thlaici vorhtu tahchunhnak bia i a sullam kha ngai hmanh u. 19 Lamcung ah a tlami thlaici a sullam cu mi pakhat nih Pennak kong a theih tikah a sullam kha aa fiang lo. Cucaah a lungthin chung ah a tlami thlaici kha miṭhalo pa nih a lak ṭhan. 20 Vawlei a tlawmnak lung cung ah a tlami thlaici a sullam cu mi pakhat nih Pathian bia a theih tikah lunglawm tein a cohlan colh. 21 Asinain a lungthin chung ah hram aa sih lo caah chikkhat lawng a nguh. Pathian bia ruang ah harnak le hremnak a ton tikah a tlu colh. 22 Hling lakah a tlami thlaici a sullam cu mi pakhat nih Pathian bia kha a theih ko nain hi vawleicung* i lungretheihnak hna le thilri chawva hlennak hna nih Pathian bia kha a khuh caah thei a tlai lo. 23 Vawlei ṭha ah a tlami thlaici a sullam cu mi pakhat nih Pathian bia kha a theih tikah a sullam kha aa fian caah a let 100, a let 60, a let 30 in thei a tlai.”

24 Jesuh nih a dang tahchunhnak pakhat kha a chimh ṭhan hna, hitin a ti: “Vancung Pennak cu mi pakhat nih a lo ah thlaici ṭha a vorhmi he tahchunh khawh a si. 25 Mi an i hngilh lioah ral pakhat a ra i rawlci lakah belhci a vorh i a kal. 26 Rawl kung cu a keuh i favui a chuah tikah belh kung cu an hun lang ve. 27 Lo ngeitu i a salle nih ‘Bawipa, lo ah thlaici ṭha na vorh a si lo maw? Zeitindah belh kung hi an chuah khawh ning a si?’ tiah an hal. 28 Lo ngeitu nih ‘Mah hi ral nih a tuahmi a si’ tiah a ti hna. A salle nih ‘Belh kung cu kan va bawt lai maw?’ tiah an hal. 29 Mah tikah lo ngeitu nih ‘Bawt rih hlah u, belh kung nan bawh pah in rawl kung zong nan bawh chih sual lai. 30 Rawl ṭuan a zat tiang ṭhangṭi ko hna seh, rawl ṭuan caan a phanh tikah rawlṭuantu hna kha belh kung kha bawt hmasa u law mei khangh awkah tom u. Mah hnuah rawl kha ṭuan u law buk chung ah rawng u tiah ka ti hna lai’ tiin a leh hna.”

31 Jesuh nih a dang tahchunhnak pakhat kha a chimh ṭhan hna, hitin a ti: “Vancung Pennak cu mi pakhat nih a lo ah a tuhmi anṭam ci he aa lo. 32 Anṭam ci cu thlaici vialte lakah a hme bik a si, asinain a kung a ṭhan tikah anhringso kung vialte lakah a ngan bik. A nge ah a zuangmi va pawl nih bu i ser khawh ding tiang in a kung cu a hung ngan.”

33 Jesuh nih a dang tahchunhnak pakhat kha a chimh ṭhan hna: “Vancung Pennak cu thilnu he aa lo, nu pakhat nih thilnu kha aa lak i changvut rel thum chung ah a phulh i a cawh tikah a ningpi in a thawhter.”

34 Jesuh nih mah a konglam vialte kha tahchunhnak hmang in mibupi sinah a chim, tahchunhnak hmang loin a chim lo. 35 “Ka kaa kha ka pau lai i tahchunhnak hna ka chim lai, vawlei ser hramthawk* in aa thupmi thil hna ka langhter lai” tiah profet sinin chimmi bia cu a hung tling.

36 Jesuh nih mibu kha a ṭinter hna hnuah innchung ah a lut. A zultu pawl cu a sinah an ra i “Lo ah a khomi belh tahchunhnak kong kha kan hrilhfiah” tiah an hal. 37 Jesuh nih hitin a leh hna: “Thlaici ṭha a vorhtu cu mi Fapa hi a si, 38 Lo cu hi vawlei hi a si, thlaici ṭha cu Pennak fale an si i belhci cu miṭhalo pa i a fale an si, 39 belhci a vorhtu cu kan ral Satan a si. Rawl ṭuan caan cu chan donghnak caan* a si i rawl a ṭuantu hna cu vancungmi kha an si. 40 Belh kung cu bawh in mei khangh a si bantuk in chan donghnak* ahcun a si ve te lai. 41 Mi Fapa nih vancungmi kha a thlah hna lai. Vancungmi hna nih mi a sualtertu* le ṭhatlonak a tuahtu hna kha vancung Pennak chung in an pumh hna lai i, 42 meiphu chung ah an paih hna lai. Cuka ah an ṭap lai i an hacang an rial lai. 43 Mah lio caan ah miding mi hna cu an Pa Pathian Pennak ah ni bang in an ceu lai. Hna a ngeimi nih thei ko hna seh.

44 “Vancung Pennak cu lo ah thuhmi rothil he aa lo, mi pakhat nih mah rothil kha a hmuh tikah a thuh ṭhan, lunglawm tein a ngeihmi thil vialte kha a zuar i mah lo kha a cawk.

45 “Cun vancung Pennak cu chawlettu pakhat nih hmun kip ah kal in a kawlmi lungvar ṭha he aa lo. 46 A man a sungmi lungvar pakhat a hmuh tikah a ngeihmi vialte kha a zuar colh i mah lungvar kha a cawk.

47 “Cun vancung Pennak cu rili chung ah zammi, nga phunphun a tlaimi paih he aa lo. 48 Nga a khah tikah an paih kha rilikam ah an hnuh, an ṭhu i a ṭhami nga kha bawm chung ah an sanh, a ṭhalomi nga kha cu an hlonh. 49 Chan donghnak ah cu bantuk in a si lai, vancungmi kha an kal lai i miding mi sinin miṭhalo kha an ṭhen hna lai, 50 cun meiphu chung ah an paih hna lai. Cuka ah an ṭap lai i an hacang an rial lai.

51 “Mah a konglam vialte i a sullam kha nan hngal maw?” tiah Jesuh nih a hal hna tikah “Kan hngalh ko” tiah an leh. 52 Jesuh nih “A si ahcun vancung Pennak kong a cawngmi saya cu a thil khonnak chung in thil thar he, thil hlun he a chuah lengmangtu inn-ngeitu bantuk a si” tiah a ti.

53 Mah tahchunhnak kong hna a chim dih hnuah Jesuh cu cuka in a chuak. 54 A umnak khua a phak tikah pumhnak inn ah a cawnpiak hna. Mi cu an khuaruah a har tuk i “Hi bantuk fimnak le khuaruahhar thil tuah khawhnak ṭhawnnak hi khoika in dah a lak hnga? 55 Anih cu lettama fapa kha a si ko lo maw? A nu cu Mary, a naule cu Jeim, Joses, Simon le Judas kha an si lo maw? 56 A farle cu hika khua ah a ummi kha an si ko lo maw? Mah vialte hi khoika in dah a lak hnga?” tiah an ti. 57 Annih nih Jesuh kha an cohlang lo, Jesuh nih “Profet cu mi upatnak kha a hmuh. Asinain a umnak khua le a inn ahcun upatnak a hmu lo” tiah a ti. 58 Zumhnak an ngeih lo caah cuka ah khuaruahhar thil tampi a tuah lo.