Peter Pahnihnak

1 Jesuh Khrih sal le lamkaltu a simi keimah Simon Peter nih kan Pathian dinnak le Khamhtu Jesuh Khrih dinnak thawng in kanmah bantuk a sunglawimi zumhnak a ngei vemi nan sinah cakuat ka rak ṭial:

2 Pathian le kan Bawipa Jesuh kong a hmaanmi hngalhnak nan ngeihnak thawng in velngeihnak le daihnak cu nan cung ah karh chin ko seh. 3 Pathian lei i pekchanhnak ning in kan nun khawh nakhnga a herhmi vialte cu Pathian ṭhawnnak thawng in kan hmuh. Cutin kan hmuhmi cu a sunparnak le a ṭhatnak thawng in a kan autu Pathian kong a hmaanmi hngalhnak kan ngeih caah a si. 4 Cu a sunparnak le a ṭhatnak thawng in a sunglawimi le a ṭha tukmi biakam kha a kan pek. Mah biakam thawng in Pathian ngeihmi sining kha nan i hrawm kho lai. A ṭhalomi duhnak ruang ah a chuakmi vawlei rawhralnak in kan luat cang caah mah biakam cu pek kan si.

5 Cucaah fakpi in i zuam in nan tuah dingmi cu nan zumhnak ah ṭhatnak, nan ṭhatnak ah hngalhnak, 6 nan hngalhnak ah mahle mah i uk khawhnak, mahle mah i uk khawhnak ah inkhawhnak, inkhawhnak ah Pathian lei i pekchanhnak, 7 Pathian lei i pekchanhnak ah unau bantuk dawtnak, unau bantuk dawtnak ah mi vialte dawtnak kha chap u. 8 Hi ziaza hna hi tampi in nan ngeih ahcun kan Bawipa Jesuh Khrih kong a hmaanmi hngalhnak lei ah san a tlai lomi le thei a tlai lomi nan si lai lo.

9 Hi bantuk ziaza hna a ngei lomi cu mitcaw bantuk a si. Ceunak kha hmuh lo awkah a mit aa chinhmi* bantuk a si i hlanlio a sualnak in thianter a simi kha a philh. 10 Cucaah unau hna, auh nan sinak le thim nan sinak ah zumhfek tein nan um khawh nakhnga fakpi in i zuam u. Cutin nan tuah peng ahcun zeitik hmanh ah nan tlu lai lo. 11 Cun kan Bawipa le Khamhtu Jesuh Khrih i zungzal a Pennak chung luhnak nawl timi thluachuah nganpi zong nan hmu lai.

12 Hi kong hna cu nan hngalh cangmi a si ko nain, biatak ah fek tein nan um ko nain hngalhter ṭhan lengmang kaan duh hna. 13 Hi ka pum* in ka nun chung paoh cu nanmah ralrin pek ṭhan lengmang hi ka rian a si tiah ka ruah. 14 Kan Bawipa Jesuh Khrih nih fiang tein a ka hngalhter cang bantuk in a rauhhlan ah hi ka pum hi ka kaltak cang lai ti kha ka hngalh. 15 Ka kal hnuah hi kong hna hi nanmah tein nan hngalh ṭhan khawh nakhnga ka si khawh chung in kaa zuam peng lai.

16 Kan Bawipa Jesuh Khrih a ṭhawnnak le a ratnak kong kan in chimh hna tikah phuahchommi, a hmaan lomi tuanbia kha kan zul lo. A sunparnak kha kan mit hrimhrim in kan hmuh caah kan chim. 17 “Amah hi ka dawtmi ka Fapa a si, a cung ah ka lung a tling” timi bia* kha sunparnak hrampi Pathian nih a chim lioah Pa Pathian sinin sunparnak le upatnak kha a rak hmuh. 18 A thiangmi tlang cung i amah he kan um lioah vancung in a rami mah aw kha kan rak theih.

19 Cucaah profet bia hna cu kan caah a hung fiang chinchin. (Khua a hun dei i deirel arfi a chuah hlan tiang) muihnak chung ah a ceumi meiinn ah lungthin nan pek bantuk in profet bia hna ah lungthin nan pekmi cu a ṭhami a si. 20 Cathiang chung i chimchungbia hna cu minung ruahnak in a rami an si lo ti kha nan hngalh ko. 21 Zeicahtiah chimchungbia cu minung duhnak in chimmi a si lo. Thiang thlarau lamhruainak thawng in Pathian sinin a rami bia kha minung nih an chimmi a si.