Peter Pakhatnak
1 Jesuh Khrih lamkaltu a simi Peter nih Pontas, Galati, Kappadosia, Asia le Bithinia ram ah aa ṭhek i ramdang mi bantuk a simi le thim a simi hna nan sinah cakuat ka rak ṭial. 2 Pa Pathian nih a rak timhtuah cangmi ning in thim nan si i thiang thlarau in thianter nan si. Aa tinhnak cu nawl nan ngaih nakhnga le Jesuh Khrih thisen thawng in nan thian nakhnga caah a si:
Velngeihnak le daihnak cu nan cung ah karh chin ko seh.
3 Kan Bawipa Jesuh Khrih a Pa le a Pathian cu thangṭhat si ko seh. A nganmi a zaangfahnak ruang ah hrin ṭhan kan si i Jesuh Khrih thihnak in a thawhter ṭhannak thawng in a hmunmi ruahchannak a kan pek. 4 A thu kho lomi, a thurhnawm lomi le a ziam kho lomi ro kha aan pek hna. Mah ro cu vancung ah chiahpiak nan si. 5 Zumhnak nan ngeih caah khamhnak nan hmuh nakhnga Pathian nih a ṭhawnnak in a kilvenmi nan si. Mah khamhnak cu donghnak caan ah langhter a si te lai. 6 Cucaah hneksaknak a phunphun nan ton ruang ah caan tawite chung cu nan ngaihchia hmanh seh law i lawm tuk ko u. 7 Hneksak cangmi nan zumhnak cu mei in hneksak a si nain a rawk khomi sui nakin a sunglawi deuh tuk. Cu bantuk zumhnak nan ngeih caah Jesuh Khrih a langh tikah thangṭhatnak, sunparnak le upatnak nan hmu lai. 8 Khrih kha nan hmu bal lo nain nan dawt. Atu zong ah nan hmu hlei lo nain a cung ah zumhnak nan langhter i chim khawh lo tiang in nan i lawm. 9 Mah cu nan zumhnak ruang ah khamhnak nan hmuh lai caah a si.
10 Pek nan simi Pathian i a liannganmi velngeihnak kong a chimtu profet hna nih mah khamhnak kong kha lungtho tein an rak kawl i an rak hlathlai. 11 Khrih nih zeidah a ton lai i zeitik ah dah a ton lai timi kong he aa tlaiin thiang thlarau nih a phuanmi kha an hlathlai peng. Zeicahtiah Khrih cu sifah harnak a in hnuah hlorh a si lai tiah thiang thlarau nih a rak chimchung. 12 Profet hna nih an chimmi cu anmah caah si loin nanmah caah a si ti kha Pathian nih a hngalhter hna. Annih nih van in thlahmi thiang thlarau bawmhnak thawng in nan sinah thawngṭha an chim, atu ah cu thawngṭha cu nan theih cang. Mah cu vancungmi hmanh nih hngalh an duh tukmi a si.
13 Cucaah rian fakpi in ṭuan awkah nan lungthin kha timhcia tein chia u law hliphlau tein um peng ko u. Jesuh Khrih a langh tikah nan hmuh laimi velngeihnak kha i ruahchan ko u. 14 Nawlngaimi fale nan si caah Pathian nan rak hngalh hlan i nan ngeihmi, a ṭhalomi duhnak kha i ukter ti hlah u. 15 Aan autu hna Pathian cu a Thiangmi a si caah nan tuahsernak kip ah thiang tein um u. 16 Zeicahtiah “Keimah cu ka thian caah nannih zong nan thian ve awk a si” tiah cathiang ah aa ṭial.
17 Thleidannak ngei loin pakhat cio kha an tuahsernak ning in bia a ceihtu Pa Pathian sinah thla nan cam ahcun hi vawlei ah ramdang mi bantuk in nan um chung ah Pathian ṭihzah bu tein khuasa u. 18 Pupa hna rohmi, san a tlai lomi nunning in aan luattertu* hna cu sui le ngun ti bantuk a rawk khomi thil a si lo ti kha nan hngalh ko. 19 Mah canah dotlami le soisel awk a um lomi tuufa bantuk a sunglawimi Khrih thisen kha a si. 20 Pathian nih Khrih cu vawlei a ser hlan* in a rak thim cang. Asinain nanmah ṭhatnak caah donghnak caan lawng ah a langhter. 21 Nannih cu Khrih thawng in thihnak in a thawhter ṭhantu le sunparnak a petu Pathian a zummi nan hung si. Cuticun Pathian cung ah zumhnak le ruahchannak nan hun ngei.
22 Biatak nan zulh caah nan thiang cang i, i titernak a um lomi unau taktak dawtnak nan ngei cang. Cucaah pakhat le pakhat lungtak tein i daw u. 23 A rawk khomi ci si loin a rawk kho lomi ci* a simi, a nungmi le a hmunmi Pathian bia in hrin ṭhan nan si cang. 24 “Mi vialte cu ramkung bantuk an si. An sunparnak vialte cu ramlak pangpar bantuk an si; ramkung cu a uai i a par cu a ṭil ko. 25 Asinain Jehovah* bia cu zungzal in a hmun.” Mah “bia” cu nan sinah phuanmi thawngṭha kha a si.