Johan sin pekmi Biathlam
11 Tahnak fung bantuk a simi phaikung pakhat pek ka si i “Tho law, Pathian biakinn i hmunthiang le biakṭheng kha va tah hna. Cuka ah Pathian a biami kha va rel hna. 2 Asinain biakinn lenglei tual kha cu ngaan rih, va tah rih hlah. Zeicahtiah biakinn tual cu miphun dang sinah pek a si cang. Annih nih khuathiang kha thla 42 chung an ke in an naan lai. 3 Ka tehte pahnih ka thlah hna lai, annih nih buri puan i aih in ni 1,260 chung Pathian bia an chim lai” tiah a ti. 4 Annih cu oliv kung pahnih le mei vannak tung pahnih an si i vawlei Bawi hmaiah an dir.
5 Pakhatkhat nih harnak pek an timh hna ahcun an kaa in mei a chuak i an ral kha a kangh dih hna. Harnak pek a timmi paoh cu cutin thah an si lai. 6 Pathian bia an chim chung vialte ruah a sur nakhnga lo van khar khawhnak ṭhawnnak an ngei. Cun ti kha thi ah canter khawhnak ṭhawnnak le an duh tik paoh ah vawleicung ah rai a phunphun tlunter khawhnak ṭhawnnak zong an ngei.
7 An tehte khaannak a dih tikah khor thukpi chung in a chuakmi sahrang nih anmah cu a doh hna lai, a tei hna lai i a thah hna lai. 8 An ruak cu khuapi chung lampi ah khan an ril lai. Cu khua cu an Bawipa tung cung ah thah a sinak khua, langhternak in Sodom le Izipt tiah auhmi khua kha a si. 9 Mi kip, phun kip, holh kip, ram kip chung in mi hna nih nithum le a cheu chung an ruak cu an zoh lai. An ruak cu thlan ah vuinak nawl an pe hna lai lo. 10 An thih ruang ah vawleicung mi hna cu an i lawm lai i puai an tuah lai. Pakhat le pakhat laksawng an i pe lai. Zeicahtiah mah profet pahnih nih vawleicung mi kha an rak hrem hna caah a si.
11 Nithum le a cheu hnuah Pathian sinin nunnak thaw cu an chung ah a lut i an nung ṭhan. A hmutu hna nih an ṭih tuk. 12 Van in “Hika ah rak kai u” timi aw thawng thangpi pakhat an theih. Cun minmei in van ah an kaimi kha an ral hna nih an hmuh. 13 Cu caan te ah li fakpi in aa hnin i khuapi cheuhra cheukhat cu a rawk. Lihnin ruang ah minung 7,000 an thi. A taangmi hna nih an ṭih tuk caah vancung Pathian kha sunparnak an pek.
14 A pahnihnak thil ṭihnung cu a dih cang. A pathumnak thil ṭihnung cu khulrang in a ra lio.
15 Vancungmi pasarihnak nih a muko a tum tikah vancung in aw thangpi nih “Vawlei pennak cu kan Pathian Pennak le Khrih Pennak a si cang. Cun Pathian nih siangpahrang in zungzal in zungzal tiang a uk lai” tiah a ti.
16 Pathian hmai i an bawiṭhutdan cung ah a ṭhumi upa 24 cu an khuk an i bil i Pathian kha an biak. 17 “Hlanlio ah le atu tiang a um zungzalmi A Ṭhawng Bik Jehovah* Pathian, a liannganmi na ṭhawnnak cu na hman cang i siangpahrang in uk hram na thawk cang caah kan i lawm. 18 Asinain miphun hna cu an thin a hung i nang zong na thin a hung ve. Mithi mi hna biaceih caan cu a phan cang. Na sal profet hna, mithiang mi hna, na min a ṭihzahmi mihme he, mingan he laksawng pek caan le vawlei a hrawktu hna hrawh caan zong a phan cang” tiah an ti.
19 Cu tikah vancung ah a ummi Pathian biakinn cu aa hung i biakinn chung ah a ummi biakamnak kuang kha ka hmuh. Cun nimtlau a lek, aw thawng a thang, khua a ri, li aa hnin i rial nganpipi an tla.