Marka

13 Jesuh cu biakinn in a rak chuah tikah a zultu pakhat nih “Saya, hi lung ṭhaṭha le inn ṭhaṭha hna hi zoh hmanh!” tiah a ti. 2 Jesuh nih “Hi inn nganpipi hna hi nan hmu ko lo maw? Asinain hi lung hna hi chimh dih an si lai, lungrualmi pakhat hmanh a taang lai lo” tiah a ti.

3 Jesuh cu biakinn a langhnak Oliv Tlang i a ṭhut lioah Peter, Jeim, Johan le Andru cu anmah lawng in an ra i, 4 “Saya, rak kan chim, mah thil hna cu zeitik ah dah a si lai, hi thil vialte i a donghnak a phanh tikah zei hmelchunhnak hna dah a um lai?” tiah an hal. 5 Mah tikah Jesuh nih hitin a ti: “Ahohmanh nih lam an in pialter hna nakhnga lo i ralring u. 6 ‘Keimah hi Khrih ka si’ tiah aa ti i ka min in mi pawl lam a pialtertu tampi an hung chuak lai. 7 Mah leng ah lamnai le lamhla i raltuknak thawngpang kha nan theih lai. Mah tikah awlokchong in um hlah u, mah thil hna cu a um hrimhrim awk a si ko, asinain donghnak cu a phan rih lai lo.

8 “Miphun pakhat le pakhat, ram khat le ram khat an i do lai, hmun khat hnu hmun khat ah li aa hnin lai, mangṭam zong a tlung lai, mah thil vialte cu sifah harnak* a thawknak an si.

9 “Ralring tein um ko u. Mi nih biaceihnak zung ah an in chanh hna lai, keimah ruang ah pumhnak inn ah an in tuk hna lai i bawi hna le siangpahrang hna hmaiah an in chanh hna lai, cuticun an sinah tehte khaannak caanṭha nan hmu lai. 10 A hmasa bik ah miphun vialte hna sinah thawngṭha chim a si lai. 11 An in tlaih hna i an in kalpi hna tikah zeidah ka chim lai tiin nan thinphang hlah u; mah caan te ah pek nan simi kong tu kha chim ko u, zeicahtiah a chimtu ding cu nanmah nan si lo, thiang thlarau a si. 12 Cu leng ah mi nih anmah unau lila kha thah awkah an chanh hna lai, pale nih an fale kha an thahter hna lai, fale zong nih an nu le an pa kha an ralchanh hna lai i an thahter hna lai. 13 Keimah min ruang ah mikip nih an in huat hna lai. Asinain a dongh tiang inkhawhnak a ngeimi cu khamh an si lai.

14 “Hrawktu fihnung cu a um awk a si lonak hmun ah a ummi kha nan hmuh tikah (careltu nih thleidang thiam ko hna seh), Judea ram i a ummi cu tlang cung ah zam u. 15 Inncung ah a ummi cu ṭum ti hlah u, thilri lak awkah innchung ah lut hlah u. 16 Lo ah a ummi zong hnipuan lak awkah inn ah tlung ti hlah u. 17 Cu caan cu fapawi le nauno a ngeimi nu hna caah a har chinchin lai! 18 Nan zam caan cu khuasik caan a si nakhnga lo thlacam peng u. 19 Zeicahtiah Pathian thil ser hramthawknak in atu tiang ah a um bal lomi, hmailei zong ah a um lo dingmi harnak cu mah caan ah cun a tlung lai. 20 Mah caan cu Jehovah* Pathian nih tawiter hlah seh law ahohmanh luatnak an hmu lai lo. Asinain Pathian nih a mithim mi hna caah cu caan cu a tawiter lai.

21 “Cun pakhatkhat nih ‘Khrih cu hika ah a um,’ asiloah ‘Khika ah a um’ tiah an in ti hna ahcun zum hna hlah u. 22 Khrih deu le profet deu pawl an chuak lai, annih nih a si khawh ahcun thim a simi hna hmanh kha lampialter awkah hmelchunhnak le khuaruahhar thil hna an tuah lai. 23 Cucaah ralring tein um ko u. Mah thil vialte kha kaan chimh chung cang hna.

24 “Mah harnak caan a dih hnuah nika cu a mui lai, thlapa nih a ceunak a chuah ti lai lo. 25 Van in arfi an tla lai i van ṭhawnnak cu an i hnin lai. 26 Mah hnuah mi Fapa cu van khuadawm lakin ṭhawnnak le a liannganmi sunparnak he a ratmi kha mi nih an hmuh lai. 27 Cun mi Fapa nih vancungmi kha a thlah hna lai. Annih nih thim a simi hna kha vanhramdeng khattalei in khattalei tiang, vawlei killi in an pumh hna lai.

28 “Theipi kung tahchunhnak in cawng u, theipi kung cu a nge thar a hung chuak i a hnah a corh tikah ṭhal caan a phan cang lai ti kha nan hngalh. 29 Cu bantuk in mah thil hna an hung ummi nan hmuh tikah mi Fapa cu kutka hram ah a phan cang ti kha hngal u. 30 Biatak kaan chimh hna lai, hi thil vialte a tlun dih hlanah atu chan mi hna* cu an thi dih rih lai lo. 31 Van le vawlei cu an rawk lai, asinain ka bia cu zeitik hmanh ah a rawk lai lo.

32 “Cu ni le cu caan cu ahohmanh nih an hngal lo, vancungmi zong nih an hngal lo, Fapa zong nih ka hngal lo, Pa lawnglawng nih a hngalh. 33 Pathian rikhiahmi caan kha nan hngalh lo caah ralring tein um ko u, hliphlau tein um ko u. 34 Zei he dah aa lawh ti ahcun a inn a kaltak i ramdang ah khualtlawn aa thawhmi pa he aa lo. A salle kha nawlngeihnak le anmah rian cio a pek hna, innka cawngtu zong kha ralring tein cawngh awkah a cahtak. 35 Inn-ngeitu cu zeitik ah dah a rak kir lai, zanlei ah maw, zanṭim ah maw, khuadei hlanah maw, zingkate ah maw ti kha nan hngalh lo caah ralring tein hngak ko u. 36 Cutin a si lo ahcun ruahlopi in inn-ngeitu a rak kir tikah nan i hngilhmi kha aan hmuh sual hna lai. 37 Ralring tein hngak ko u tiah kaan ti hna bantuk in mi vialte zong kha ka ti hna.”