Luka

22 Lanhtak Puai tiah auhmi Thilnu Phulh Lo Changreu Puai cu a nai cang. 2 Tlangbawi upa hna le phungbia cawnpiaktu hna nih mi kha an ṭih hna caah Jesuh kha zeitindah kan thah ah a ṭhat lai tiah lam an kawl. 3 Mah tikah Satan cu lamkaltu 12 lakah aa telmi Judas Iskariot lungthin chung ah a lut. 4 Cucaah Judas cu tlangbawi upa hna le biakinn haotu hna sinah a kal i Jesuh kha zeitindah an sinah ka chanh khawh lai ti kha a va ceihpi hna. 5 Annih cu an i lawm tuk i ngun tangka kan in pek lai tiah bia an kamh. 6 Judas zong a hna a tla i mi an um lo karah an sinah Jesuh chanh khawhnak caanṭha kha kawl hram a thawk.

7 Lanhtak Puai raithawinak an pekchanh tawn ni, Thilnu Phulh Lo Changreu Puai cu a hung phan. 8 Cucaah Jesuh nih Peter le Johan kha a thlah hna i “Va kal u law Lanhtak zanriah kan ei ding kha va tim u” tiah a ti hna. 9 Annih nih “Khoika ah dah kan va timh lai?” tiah an hal. 10 Jesuh nih “Khua chung ah va lut u law ti-um aa putmi pa pakhat kha nan hmuh lai. A hnu in va zul u law a luhnak inn ah khan va lut ve u. 11 Cun inn-ngeitu kha ‘Kan Sayapa nih “Ka zultu hna he Lanhtak zanriah kan einak ding khaan cu khoika ah dah a si?” a ti’ tiah va ti u. 12 Inn-ngeitu nih cungdot ah timhciami khaan nganpi pakhat aan hmuhsak hna lai. Mah khaan ah zanriah cu va tim u” tiah a ti hna. 13 Zultu hna cu an chuak i Jesuh nih a chimh hna ning khan an va hmuh i Lanhtak Puai caah an timhtuah.

14 Zanriah ei caan a phanh tikah Jesuh cu lamkaltu hna he cabuai ah a ṭhu i, 15 “Harnak ka in hlanah nanmah he Lanhtak zanriah ei hi ka duh tukmi a si. 16 Kaan chimh hna lai, Pathian Pennak ah Lanhtak Puai he aa tlaimi vialte a tlin dih hlan tiang hi Lanhtak zanriah hi ka ei ti lai lo” tiah a ti. 17 Mah hnuah hrai kha a lak i Pathian sinah lawmhnak bia a chim: “Hihi i lak u law i chaan u. 18 Kaan chimh hna lai, Pathian Pennak a rat hlan tiang atu thawk in mitsur zu ka ding ti lai lo” tiah a zultu pawl kha a ti hna.

19 Cun Jesuh nih changreu kha a lak i lawmhnak bia a chim, changreu kha a cheu hnuah “Mah hi nanmah caah ka pekmi, ka pum a aiawhmi a si. Keimah philhlonak ah hitin rak tuah zungzal u” tiah a ti i a zultu pawl kha a phawt hna. 20 Zanriah an ei dih hnuah hrai zong kha a lak i cu bantuk ṭhiamṭhiam in a tuah, “Mah hrai nih ka thi kha a aiawh, hihi nan caah ka thlet dingmi ka thi in sermi biakamnak thar a si.

21 “Asinain zoh hmanh u! keimah a ka rawitu ding cu keimah he cabuai pakhat ah a ṭhu ko. 22 Chimchung a si bantuk in mi Fapa cu a thi ko lai, asinain mi Fapa a rawitu cu thil ṭhalo a tong lai!” tiah a ti. 23 Mah tikah zultu hna nih cutin a tuah dingmi cu ahodah a si hnga tiah anmahle anmah an i ceih.

24 Mah hnuah zultu hna lakah ahodah a ngan bik timi bia alnak fakpi in a chuak. 25 Jesuh nih “Vawlei uktu hna nih an ukmi kha an lal hnawh tawn hna, nawlngeitu hna zong midang ca thilṭha a tuahtu tiah ti an si tawn. 26 Nannih cu cutin nan si awk a si lo. Nan lakah a ngan bikmi cu a hme bik bantuk a si lai, hruaitu zong sinum bantuk a si lai. 27 Cabuai ah a ṭhu i rawl a eimi le a bultawltu ah ahodah a ngan deuh? Cabuai ah a ṭhu i rawl a eimi a si ko lo maw? Asinain kei cu nan lakah bultawltu bantuk in ka um.

28 “Asinain nannih cu hneksaknak ka in chung ah a ka umpitu nan si. 29 Ka Pa nih keimah he biakamnak a ser bantuk in kei zong nih pennak ah uktu ṭuan ding in nanmah he biakamnak ka ser ve lai. 30 Ka Pennak ah ka cabuai ah nan ei, nan ding lai. Bawiṭhutdan ah nan ṭhu lai i Israel mi, phun 12 kha bia nan ceih hna lai.

31 “Simon, Simon, changvut bantuk in nan dihlak in fingrilh in rilh awkah Satan nih nawl a hal cang. 32 Na zumhnak a der lo nakhnga thla kaan campiak; naa ngaihchih i na hun i mer ṭhan tikah na unau kha thazaang va pe hna” tiah a ti. 33 Mah tikah Peter nih “Bawipa, nangmah he cun thongtlak awk le thih awk zong ah timhcia ka si ko” tiah a ti. 34 Jesuh nih “Peter, kaan chimh lai, nihin ah ar a khuan hlanah ka hngal lo tiah voithum tiang na ka hlawt lai” tiah a ti.

35 Mah hnuah Jesuh nih “Tangka bawm, rawl i rawnhnak sawngkhoi, phanah i ken loin kaan thlah hna lioah nan chambaumi a um maw?” tiah a hal hna tikah annih nih “A um lo!” tiah an leh. 36 “Cun atu cu tangka bawm a ngeimi nih tangka bawm i ken seh, rawl i rawnhnak sawngkhoi a ngeimi nih sawngkhoi i ken seh, vainam a ngei lomi zong nih a angki kha zuar seh law vainam i cawk seh. 37 Kaan chimh hna lai, ‘Amah cu nawlbia a buarmi hna lakah rel chih a si cang’ tiah Cathiang ah aa ṭialmi cu ka sinah a tlin awk a si ko. Ka kong he aa tlaiin an ṭialmi vialte cu a tling cuahmah cang” tiah a ti. 38 Cun zultu hna nih “Bawipa, zoh hmanh! hika ah vainam pahnih a um” tiah an ti. Jesuh nih “Cucu a za ko” tiah a ti hna.

39 Cu hnuah Jesuh cu a rak kal tawnnak Oliv Tlang ah a kal i a zultu hna zong nih an zulh. 40 Cuka an phanh tikah “Tukforhnak chung nan tlak nakhnga lo thlacam zungzal u” tiah a ti hna. 41 Cun an sinin lungchep hrawng aa hlatnak ah a kal, cuka ah a khuk aa bil i, 42 “Ka Pa, na duh ahcun hi hrai* hi ka ṭhialpiak ko. Asinain keimah duh ning in si hlah seh, nangmah duh ning tu in si ko seh” tiah thla a cam. 43 Mah tikah van in vancungmi pakhat a rung lang i Jesuh kha thazaang a pek. 44 A lungre a theih tuk caah lungthin dihlak in fakpi in thla a cam i a thlan cu thidor bantuk in vawlei ah a tla. 45 Thla a cam dih in a zultu pawl sin a kal tikah an ngaih a chiat tuknak ah an tha a dih i an rak i hngilhmi kha a hmuh. 46 Jesuh nih “Zeicah nan i hngilh ko? Tho u, tukforhnak ah nan tlak nakhnga lo thlacam zungzal u” tiah a ti hna.

47 Cutin a chim lioah mibu cu an rak phan i lamkaltu 12 lakah aa telmi Judas nih a rak hruai hna. Judas cu Jesuh sinah a kal i a va hnamh. 48 Mah tikah Jesuh nih “Judas, mi Fapa hi hnamh in maw na rawi ko lai?” tiah a ti. 49 A sin i a ummi hna nih thil a cang hngami kha an hmuh tikah “Bawipa, vainam in kan saam hna lai maw?” tiah an ti. 50 An lak i pakhat nih tlangbawi ngan sal kha a tuk tikah a orhlei hnakhaw a pet. 51 Asinain Jesuh nih “A za cang” tiah a ti. A hnakhaw kha a tawnghpiak i a damter ṭhan. 52 Mah hnuah Jesuh nih a sinah a rami tlangbawi upa hna, biakinn haotu hna le Judah mi hruaitu hna kha “Damiah tlaih bantuk in keimah tlaih awkah nam le thingtan i put in zeicah nan rat? 53 Biakinn ah nifate nan sin i ka um lioah nan ka tlai lo, asinain atu cu nanmah nan caan, muihnak ah a tlonglengmi hna nawl an ngeih caan a si” tiah a ti.

54 Mah hnuah Jesuh kha an tlaih i tlangbawi ngan inn ah an kalpi, Peter nih lamhlat nawn in a hei zulh. 55 Tual laifang ah mei an kau i mi pawl cu hmunkhat ah an ṭhu, Peter zong an sinah a ṭhu ve. 56 Mei a tomi Peter kha sinum nu pakhat nih a hmuh tikah ṭha tein a zoh i “Hi pa zong hi amah he khin phukhat an si” tiah a ti. 57 Asinain “Minu, mah pa cu ka hngal lo” tiah aa pheh. 58 Tlawmpal hnuah a dang pakhat nih Peter kha a hmuh tikah “Nang zong amah zultu na si ve” tiah a ti. Asinain Peter nih “Mipa, ka si lo” tiah aa pheh. 59 Suimilam pakhat hrawng a rauh hnuah a dang pakhat nih “Hi pa zong hi Galili mi a si caah amah he phukhat an si hrimhrim ko” tiah a ti. 60 Peter nih “Mipa, na chimmi kong hi ka hngal hrimhrim lo” tiah aa pheh. Cutin aa pheh lio te ah ar a khuang. 61 Mah lioah Bawipa Jesuh cu aa mer i Peter kha a hei zoh, Peter nih “Nihin ah ar a khuan hlanah ka hngal lo tiah voithum tiang na ka hlawt lai” timi Jesuh bia kha a lung ah a chuak ṭhan. 62 Mah tikah Peter cu leng ah a chuak i ngaihchia ngai in a ṭap.

63 A cawngtu hna nih Jesuh kha an cawhdeh i an thongh. 64 A hmai kha an khuh i “Aho nih dah aan thongh? Chim tuah!” tiah an ti. 65 A phunphun in an serhsat.

66 Khua a dei tikah Judah mi hruaitu hna, tlangbawi upa hna le phungbia cawnpiaktu hna cu an i pum i Jesuh kha Judah Biaceihnak Zungpi* ah an kalpi. 67 “Khrih cu na si maw? Chim tuah” tiah an ti. Asinain Jesuh nih “Kaan chimh hna zong ah nan ka zum hlei lai lo. 68 Kaan hal hna zong ah nan ka let fawn lai lo. 69 Asinain atu thawk in mi Fapa cu a liannganmi Pathian orhlei kam ah a ṭhu lai” tiah a ti hna. 70 Mah tikah an zapi in “Cu a si ah, Pathian Fapa cu na si maw?” tiah an hal i Jesuh nih “Nan chim ning khan a si ko” tiah a leh hna. 71 Annih nih “Tehte dang zeidah kan herh ti? Amah theng nih a chimmi kha kan theih cang ko cu ta” tiah an ti.