Johan

10 “Biatak kaan chimh hna lai, a hmaan tein kaan chimh hna lai, tuukawm chung ah kutka in a lut lo i kaadang in a kai i a lutmi cu mifir le damiah a si. 2 Asinain kutka in a lutmi cu tuukhal a si. 3 Amah cu kutka cawngtu nih kutka a hunpiak. Tuu zong nih a aw kha an ngaih. Anih nih tuu pakhat cio kha an min in a auh hna i tuukawm leng ah a chuahpi tawn hna. 4 An hmai in a hruai hna i a chuahpi hna tikah tuu pawl nih a aw kha an hngalh caah a hnu in an zulh tawn. 5 Mising cu an zul duh hna lo i an zamtak tawn hna. Zeicahtiah an aw kha an hngal lo.” 6 Jesuh nih mah tahchunhnak kha a chimh ko hna nain a sullam kha an hngalthiam lo.

7 Cucaah Jesuh nih hitin a ti ṭhan hna: “Biatak kaan chimh hna lai, a hmaan tein kaan chimh hna lai, kei cu tuu pawl an luhnak kutka ka si. 8 Keimah bantuk in aa umter i a rami vialte cu mifir le damiah an si; asinain tuu nih an aw kha an ngai lo. 9 Kei cu kutka ka si; ka sinin a lutmi paoh cu khamh an si lai. An lut, an chuak lai i ramhring kha an hmuh lai. 10 Mifir cu fir ding, thah ding le hrawh ding lawng ah a ra. Kei tu cu tuu pawl nih nunnak an hmuh nakhnga le an nunkhua a sau nakhnga caah ka ra. 11 Kei cu tuukhal ṭha ka si; tuukhal ṭha nih cun tuu pawl caah a nunnak* kha a pek. 12 Tuukhal zong a si lo i tuu ngeitu zong a si lomi, man phalhmi pa nih cun cenghngia a ratmi a hmuh tikah tuu pawl kha a kaltak hna i a zam tawn. Cenghngia nih a seh hna i tuu pawl cu an i ṭhek dih. 13 Anih cu man phalh in hlanmi a si caah tuu pawl kha zei ah a rel hna lo. 14 Kei tu cu tuukhal ṭha ka si caah ka tuu kha ka hngalh hna i ka tuu zong nih an ka hngalh ve. 15 Ka Pa nih a ka hngalh i keimah zong nih ka Pa ka hngalh bantuk kha a si; tuu pawl caah ka nunnak kha ka pek.

16 “Hi tuukawm chung ah aa tel lomi, tuudang zong ka ngei rih. Annih zong ka rak hruai hna lai i annih nih ka aw kha an ngaih lai, cucaah annih cu tuukhal pakhat tang i tuurun runkhat an si lai. 17 Nunnak ka hmuh ṭhan nakhnga ka nunnak kha ka pek caah ka Pa nih a ka dawt. 18 Ka nunnak kha ahohmanh nih an ka la lo, keimah lungtho tein ka pekmi a si. Kei cu nunnak peknak nawl le hmuh ṭhannak nawl ka ngei. Mah nawlbia cu ka Pa sinin ka hmuhmi a si.”

19 Mah bia ruang ah Judah mi lakah ṭhencheunak a um ṭhan. 20 Mi tampi nih “Hi pa cu khuachia nih a tuahmi mihrut a si. Zeicah a bia kha nan ngaih?” tiah an ti. 21 A cheu nih “Khuachia tuahmi nih cun hitin bia a chim kho hnga maw, khuachia nih cun a mit a cawmi cu khua a hmuhter kho hnga maw?” tiah an ti.

22 Mah caan cu Jerusalem khua ah Pekchanhnak Puai* tuah caan a si i khuasik caan zong a si. 23 Jesuh cu biakinn chung i ‘Solomon Deu’ tiah auhmi hmun ah aa chawk. 24 Mah lioah Judah mi nih an hun kulh i “Zei can tiang dah lungawṭawm in na kan chiah lai? Khrih na si le si lo kha hlangfang tein kan chim tuah” tiah an ti. 25 Jesuh nih “Kaan chimh cang ko hna cu ta, asinain nan ka zum lo. Ka Pa min in ka ṭuanmi rian hna nih ka kong kha tehte an khaan ko. 26 Nannih cu ka tuu nan si lo caah nan ka zum lo. 27 Ka tuu nih cun ka aw kha an ngaih. Annih kha ka hngalh hna i annih zong nih ka hnu an ka zulh. 28 Zungzal nunnak ka pek hna lai i zeitik hmanh ah hrawh an si lai lo. Annih cu ka kut chung in ahohmanh nih an ka chut kho lai lo. 29 Ka Pa nih a ka pekmi hna cu zeizong vialte nakin an sunglawi deuh. Annih cu ka Pa kut chung in ahohmanh nih an chut kho lai lo. 30 Keimah le ka Pa cu lungthin khat tein kan um”* tiah a leh hna.

31 Mah tikah Judah mi hna nih lung an i char i Jesuh kha cheh an timh ṭhan. 32 Jesuh nih “Ka Pa nawl peknak in thilṭha tampi ka tuah. Mah thilṭha hna lakin a zei ruangte ah dah lung in cheh nan ka timh?” tiah a ti hna. 33 Judah mi nih “Thilṭha na tuah caah lung in cheh kan in timhmi a si lo. Pathian serhsat in bia na chim caah a si. Minung na si ko nain nangmahle nangmah pathian ka si naa ti” tiah an leh. 34 Mah tikah Jesuh nih “Nan Nawlbia chung ah ‘Pathian nih “Nannih cu pathian hna nan si” a ti’ tiah aa ṭial a si ko lo maw? 35 Cathiang bia cu hrawh khawh a si lo. Pathian nih a bia a ralchanhmi hna hmanh kha ‘pathian hna’ tiah a auh hna ahcun, 36 Pa nih a thianter i hi vawlei ah a rak thlahmi keimah nih ‘Pathian Fapa ka si’ ka ti ruang ah maw ‘Pathian thangchiat in bia na chim’ tiah sual nan ka puh? 37 Ka Pa rian kha ka ṭuan lo ahcun rak ka zum hlah u. 38 Ka ṭuan ahcun keimah nan ka zumh lo hmanh ah ka tuahmi thil hna hi zum ko u. Cutin a si ahcun ka Pa cu keimah he lungthin khat tein a um bantuk in kei zong ka Pa he lungthin khat tein ka um ve ti kha nan hngalh lai” tiah a ti hna. 39 Cucaah Jesuh kha tlaih awkah an i zuam ṭhan, asinain an tlaih khawh lonak hmun ah a zam.

40 Cu hnuah Jesuh cu Jordan Tiva ral, Johan nih hmasa bik tipil a rak pek hnanak hmun ah a kal ṭhan i cuka ah a va um. 41 A sinah mi tampi an ra i “Johan nih khuaruahhar thil pakhat hmanh a tuah lo nain hi pa kong a chimmi vialte cu a hmaan dih” tiah anmahle anmah an i ceih. 42 Cuka ah mi tampi nih Jesuh kha an hun zumh.