Peter Pakhatnak

3 Cu bantuk in nupile hna, nan vale tang ah i dor u. Nan vale cu Pathian bia a ngai lomi an si hmanh ah bia kaakhat hmanh chim hau loin nan tuahsernak thawng in zumtu nan siter khawh hna lai. 2 A thiangmi nan ziaza le nan upat tukmi hna kha anmah theng nih an hmuh caah a si. 3 Nan i dawhnak cu lenglei lawng siter hlah u. A hleihluat tuk in sam phiar le sui le thilpuan man fakfak in i thuam ti bantuk si loin, 4 nan i dawhnak cu nan lungthin muru ah a si awk a si. Daihnak le nemnak lungput he i ṭamh u. Mah cu Pathian mithmuh ah a sunglawi tukmi a si leng ah a rawk kho lomi dawhnak zong a si. 5 Pathian aa ruahchanmi hlanlio i a thiangmi nu hna zong cutin an rak i ṭamh i an vale tang ah an i dor. 6 Sarah nih Abraham kha ka bawipa tiah a auh i a nawl a ngaih. Nannih zong ṭihnak kha nan tei i thilṭha nan tuah peng ahcun Sarah fanule nan si lai.

7 Vale hna, nannih zong nan nupile he nan umṭi tikah hngalhthiamnak ngei u.* Annih cu a kuai a fawimi um bantuk in an tha a der leng ah velngeihnak thawng in hmuhmi nunnak ro kha nanmah he a coṭi dingmi an si caah upat hna u. Cutin nan tuah lo ahcun nan thlacamnak ah dawnkhantu a si lai.

8 A donghnak ah cah kaan duhmi hna cu nan dihlak in lungthin khat tein um u, zaangfahnak ngei u, unau bantuk in i daw u, zawnruahnak le toidornak ngei u. 9 Ṭhatlonak kha ṭhatlonak in lehrulh hlah u, serhsatnak kha serhsatnak in lehrulh hlah u, thluachuahnak tu in lehrulh u. Cutin tuah awkah Pathian nih aan auhmi hna a si. Mah lawng ah thluachuah nan hmu lai.

10 “Nuam tein nun a duhmi le ni sunglawi hmuh a duhmi paoh nih bia ṭhalo chim lo awkah a lei kha i sum seh. Hlenthawinak bia chim lo awkah a hmur kha i sum seh. 11 Ṭhatlonak kha mertak seh law ṭhatnak kha tuah seh; daihnak kha kawl seh law ngeih peng awkah fakpi in i zuam seh. 12 Jehovah* mit nih miding mi kha a zoh hna i a hna nih an nawlnak kha a ngaih. Asinain ṭhatlonak a tuahmi kha cu Jehovah* nih a hnu a chit hna.”

13 Ṭhatnak tuah awkah nan lung a thawh ahcun aho nih dah harnak aan pek hna lai? 14 Miding nan si ruang ah temhnak nan in ahcun lunglawmmi nan si. Asinain midang nih an ṭihmi kha ṭih ve hlah u.* Lungrethei zong in um hlah u. 15 Khrih kha a thiangmi Bawi in nan lungthin in cohlang u. Nan zumhnak kong aan halmi hna paoh kha leh khawh awkah timhcia tein um zungzal u. Asinain nemnak le upatnak he chim u.

16 A thiangmi chiaṭha thleidannak lungthin kha kilveng u. Mi nih nan kong kha a ṭhatlonak in zeitin an chim hmanh ah Khrih zultu in ziaza ṭha nan langhtermi kha an hmuh caah an ning a zak lai. 17 Ṭhatlonak tuah ruang ah temhnak in nakin Pathian nih a awnh ahcun ṭhatnak tuah ruang ah temhnak in cu a ṭha deuh. 18 Zeicahtiah Khrih cu sualnak hloh awkah voikhat ah zungzal ca in a thi. Pathian he remter nan si nakhnga miding mi cu a ding lomi hna caah a thi. Taksa pum in thah a si nain thlarau pum in thawhter ṭhan a si. 19 Thlarau pum in cun thong a tlami vancungmi hna sinah a kal i biaceihnak kong kha a chim. 20 Cu vancungmi hna cu Noah chan ah Pathian nih lungsau tein a hngah lioah nawl a ngai duh lomi kha an si. Mah caan chung ah lawng cu sak a si. Lawng chung ah a lutmi mi tlawmte, mi pariat* cu ti in khamh an si.

21 Cu he i lo in tuchan ah aan khamh khotu hna cu tipil innak a si. Jesuh Khrih thawhṭhannak kha nan zumh caah tipil nan ing. Tipil innak timi cu pum thurhnawmhnak i thianh kha a si lo, Pathian sinah chiaṭha thleidannak lungthin thiang hal kha a si. 22 Khrih cu vancung ah a kai i Pathian orhlei kam ah a ṭhu. Vancungmi, nawlngeihnak le ṭhawnnak vialte cu a tang ah chiah an si.