Matthai

2 Siangpahrang Herod* chan, Judea ram Bethlehem khua i Jesuh a chuah hnuah Nichuahlei in arfi zohthiam pawl cu Jerusalem ah an ra i, 2 “Judah mi siangpahrang a chuakmi cu khoika ah dah a um? Nichuahlei i kan um lioah a arfi kha kan hmuh caah amah upatnak pek* awkah kan ratmi a si” tiah an ti. 3 Mah bia kha an theih tikah Siangpahrang Herod le Jerusalem khua i a ummi vialte cu an thin a phang. 4 Tlangbawi upa pawl le phungbia cawnpiaktu vialte kha a pumh hna i Khrih* cu khoika ah dah a chuah lai tiah a hal hna. 5 Annih nih hitin an leh: “Judea ram Bethlehem khua ah a chuak lai. Profet pakhat ṭial ning ah cun hitihin a si: 6 ‘Judah ram Bethlehem khua, nangmah cu Judah ukmi khua hna lakah khua hme bik na si lo. Nangmah chung in ka mi Israel mi a khaltu ding uktu pakhat a chuak lai.’”

7 Mah tikah Herod nih arfi zohthiam pawl kha a thli tein a auh hna i arfi a chuah caan kha fiang tein a hal hna. 8 Cun Bethlehem khua ah a thlah hna i, “Va kal u law ngakchia cu ṭha tein va kawl tuah u, nan hmuh tikah thawng rak ka thanh ṭhan u, kei zong a sinah ka kal ve lai i upatnak ka pek ve lai” tiah a ti hna. 9 Siangpahrang bia an ngaih hnuah an i thawh ṭhan. Mah tikah Nichuahlei ah an rak hmuhmi arfi nih an hmai in lam a hruai hna i ngakchia umnak hmun an phanh tikah a dir. 10 Arfi a dirmi an hmuh tikah an i lawm tuk. 11 Innchung i an luh tikah a nu Mary sinah a ummi ngakchia kha an hmuh. Mah tikah an khuk an i bil i upatnak an pek.* Cun an i kenmi sui, frankinsen* le mura zihmui kha laksawng an pek. 12 Asinain an mang ah Herod sinah kir ti lo ding in Pathian nih ralrin a pek hna caah lam dang in an ram ah an kir.

13 An kir hnuah Jehovah* vancungmi cu Josef mang ah a lang i hitin a ti: “Tho law ngakchia le a nu kha Izipt ram ah zampi hna. Herod nih ngakchia kha thah ding in a kawl lai caah thawng kaan thanh hna hlan tiang cuka ah va um u.” 14 Cucaah Josef cu a tho i mah zan ah ngakchia le a nu kha Izipt ram ah a zampi hna. 15 Herod a thih tiang cuka ah cun an um. Cuticun “Ka fapa cu Izipt ram in chuah awkah ka auh” timi profet hmang in Jehovah* chimmi bia cu a tling.

16 Arfi zohthiam pawl nih an ka hlen ti kha Herod nih a hngalh tikah a thin a hung tuk. Cucaah arfi zohthiam pawl nih an chimmi ning in a caan kha ṭha tein a tuak. Cun a mi pawl kha a thlah hna i Bethlehem le a pawngkam khua vialte i pa ngakchia kum hnih le kum hnih in a tanglei vialte kha thah awkah a fial hna. 17 Cuticun profet Jeremiah sinin Pathian chimmi bia cu a tling, hitin a ti: 18 “Ramah khua ah fakpi in ṭah thawng le aihram thawng a thang. Rachel nih a fale kha a ṭah hna, annih cu an um ti lo caah a ṭap i hnemh khawh a si ti lo.”

19 Herod a thih hnuah Jehovah* vancungmi cu Izipt ram ah a ummi Josef mang ah a lang i, 20 “Tho law ngakchia le a nu kha Israel ram ah kirpi hna, ngakchia thah a duhmi hna cu an thi cang” tiah a ti. 21 Cucaah Josef cu a tho i ngakchia le a nu kha Israel ram ah a kirpi hna. 22 Asinain Arkhelaus nih a pa Herod kha a chaan i Judea ram siangpahrang a si ti a theih tikah cuka lei kal kha a ṭih. Pathian zong nih a mang ah ralrin a pek caah Galili peng lei tu ah a kal. 23 Cun Nazareth timi khua ah khua an sa. Cucaah “Amah cu Nazareth khuami tiah auh a si lai” timi profet chimchungbia hna cu a hung tling.