Rom

2 Aho na si hmanh ah midang bia na ceih ahcun i silhnalh khawhnak lam zeihmanh a um lo. Midang bia na ceih hna tikah nangmah lila sual naa phawtmi a si ko. Zeicahtiah bia na ceihmi hna nih an tuahmi kha na tuah ve ko. 2 Cu bantuk thil a tuahmi hna cung i Pathian biaceihnak cu biatak he aa tlak ti kha kan hngalh.

3 Cu bantuk thil a tuahmi kha bia na ceih hna buin nangmah theng nih mah thil hna kha na tuah ve ahcun Pathian biaceihnak in ka luat lai tiah maw naa ruah? 4 Pathian i a nganmi a zaangfahnak, a in khawhnak le a lungsaunak kha zei rel loin maw na um? Na cung ah zaangfahnak a ngeihmi cu i ngaichih seh ti aan duh caah a si kha na hngal lo maw? 5 Na lung a khon i ngaihchih duhnak lungthin na ngeih lo caah Pathian thinhunnak ni le a dingmi biaceihnak ni ah Pathian thinhunnak cu na cung ah a tlung lai. 6 Pathian nih mikip kha an tuahmi ning cio in a rulh hna lai: 7 thilṭha kha inkhawhnak he a tuah i sunparnak le upatnak hmuh awkah aa zuammi hna kha a thu kho lomi pum le zungzal nunnak a pek hna lai; 8 asinain bia al le i sik a zuammi, biatak a zul lo i a ding lomi thil a tuahmi hna cung ah Pathian thinhunnak le thinlinhnak a tlung lai. 9 Thil ṭhalo a tuahmi kip cu harnak le lungretheihnak an tong lai. A hmasa bik ah Judah mi nih an ton lai i a hnuah Greek mi zong an ton ve lai; 10 thilṭha a tuahmi kip nih sunparnak, upatnak le daihnak an hmuh lai. A hmasa bik ah Judah mi nih an hmuh lai i a hnuah Greek mi zong nih an hmuh ve lai. 11 Zeicahtiah Pathian cu thleidannak a ngei lo.

12 Nawlbia hngalh loin sualnak a tuahmi hna cu nawlbia hngalh loin an thi lai. Nawlbia hngalh buin sualnak a tuahmi tu cu nawlbia ning in biaceih an si lai. 13 Nawlbia theihnak men in Pathian hmaiah miding si khawh a si lo. Nawlbia zulhnak thawng lawng in miding tiah ti an si lai. 14 Miphun dang nih nawlbia cu an hngal lo nain nawlbia ning in an tuah tik paoh ah an lungthin chung ah nawlbia a um ti kha a lang. 15 An lungthin chung ah aa ṭialmi nawlbia a um ti kha an tuahsernak nih a langhter. An chiaṭha thleidannak lungthin nih an tuahsernak a hmaan maw, hmaan lo ti kha a hngalhter hna. Cuticun anmah ruahnak lila nih sual a phawt hna caan a um i a ngaihthiam hna caan zong a um. 16 Mi nih a thli tein an ruahmi le an tuahmi kha Khrih Jesuh thawng in Pathian nih bia a ceih ni ah cutin a si te lai. Ka chimmi thawngṭha ah mah kong zong aa tel.

17 Nang cu Judah mi tiah auhmi, nawlbia aa bochanmi, Pathian miphun si ruang ah aa uangthlarmi, 18 Pathian duhnak a hngalmi, Nawlbia ning in cawnpiak na si caah a biapimi thil a thleidang khomi, 19 mitcaw lam a hruaimi, muihnak ah a ummi ceunak a pemi, 20 mihrut a chimhrinmi, ngakchia a cawnpiakmi, Nawlbia ah a ummi a hrampi hngalhnak le biatak a hngalthiammi ka si tiah naa ruat— 21 cu a si ah midang a cawnpiaktu nih zeicah nangmahle nangmah naa cawnpiak kun lo? “Fir hlah u” tiah a cawnpiaktu nih zeicah na fir? 22 “Zuangzam hlah u” tiah na ti buin zeicah na zuanzam? Siasal a fihmi na si buin siasal biakinn cu zeicah na chuh hna? 23 Nawlbia ruang ah aa uangthlarmi na si buin zeicah Nawlbia kha na buar i Pathian thang na chiatter? 24 Cathiang ah aa ṭial bantuk in “Nanmah ruang ah miphun dang nih Pathian min kha an thangchiat.”

25 A tak ti ahcun nawlbia nan zulh lawng ah nan cuarpar tannak cu san a tlai. Nawlbia nan buar ahcun nan cuarpar tannak cu tan lo bantuk a si lai. 26 Cucaah cuarpar aa tan lomi nih Nawlbia ah aa ṭialmi, Pathian halmi kha a tuah ahcun cuarpar aa tanmi ah rel a si lai. 27 Ṭialmi nawlbia a ngei i cuarpar aa tanmi nan si nain nawlbia nan buar ahcun cuarpar aa tan lomi nih Nawlbia an zulhnak thawng in nan sualnak kha an langhter lai. 28 Lenglei in Judah mi a simi cu Judah mi taktak a si lo, lenglei taksa in cuarpar aa tanmi zong cuarpar tannak taktak a si lo. 29 Chunglei in Judah mi a simi lawng Judah mi taktak a si. Ṭialmi nawlbia thawng in si loin thiang thlarau thawng in lungthin ah cuarpar aa tanmi lawng cuarpar tannak taktak a si. Cu bantuk mi hna cu minung sinin si loin Pathian sinin thangṭhatnak an hmu.