Hebru

12 Cucaah minmei tom bantuk a simi tehte tampi nih an kan kulh caah kan thilrit vialte le fawi tein a kan foih khotu sualnak vialte kha hlaw hna u sih. Kan hmai i chiahpiakmi tlikzuamnak ah inkhawhnak he tli hna u sih. 2 Kan zumhnak a Tlintertu le Hruaitu Jesuh kha i zoh chih hna u sih. Anih cu a hmaiah chiahpiakmi lawmhnak ruang ah ningzahnak kha zei rel loin hremnak tung* cung ah thihnak kha a in. Atu cu Pathian bawiṭhutdan orhlei kam ah a ṭhu cang. 3 Ralchanhnak bia chim in anmahle anmah harnak aa pemi misual mi hna bia a ingtu kong kha ṭha tein ruat hmanh u. Cuticun thaba le lungdong in nan um lai lo.

4 Sualnak nan dohnak ah nan thisen chuak tiang ngaingai cun nan in rih ṭung lo. 5 Pathian nih a fale bantuk in ruahnak aan cheuhmi hna hi nan philh taktak cang: “Ka fapa, Jehovah* chimhhrinhnak kha zei rel loin um hlah. Na palhnak aan remh tik zong ah na lung dong hlah. 6 Zeicahtiah Jehovah* nih a dawtmi cu a chimhhrinh tawn hna i fa bantuk in a hmuhmi cu dan a tat tawn hna.”

7 Harnak nan ton tikah chimhhrinh* kan si tiah ruat in inkhawhnak ngei u. Pathian nih a fale bantuk in aan pehtlaih hna. Pa nih a chimhhrinh lomi fapa a um bal maw? 8 Midang cu chimhhrinh an si i nannih tu cu chimhhrinh nan si lo ahcun fa taktak si loin lakfa nan si hnga. 9 Minung kan pale nih an kan chimhhrinh tawn i kan upat hna. Nunnak kan hmuh nakhnga thiang thlarau in lam a kan hruaitu vancung kan pa cu a nawl kan ngaih chinchin awk a si lo maw? 10 Minung kan pale nih a hmaan tiah an ruahmi ning in chikkhat chung an kan chimhhrinh. Asinain vancung kan Pa nih cun amah bantuk in kan thian khawh nakhnga kan ṭhatnak caah zungzal in a kan chimhhrinh. 11 Chimhhrinh kan si lioah cun kan i nuam lo i kan ngaih a chia ti cu a hmaan ko. Asinain chimhhrinhnak thawng in cawnpiak a simi hna cu a hnuah ding tein an nun caah daihnak an hmu.

12 Cucaah a thlepmi ban le a thermi khuk kha ṭhawnter hna u. 13 Nan ke caah lam kha dinter peng u. Cuticun a beimi nan ke cu hliahcaang pelh loin a dam hmanh a dam ṭhan lai. 14 Mi vialte he rem tein um awk le thiang tein um awkah fakpi in i zuam u. A thiang lomi nih cun Bawipa kha an hmu kho lai lo. 15 Pathian vel hmu loin nan um sual nakhnga lo i ralring u. Nan i ralrin lo ahcun nan lakah siivai a ngeimi thingkung hram cu a corh lai i harnak a chuahter caah mi tampi cu an thurhnawm lai. 16 Nan lakah nupa sualnak* a tuahmi, Esau bantuk in a thiangmi thil zei ah a rel lomi nan um nakhnga lo i ralring u. Esau cu fater sinak tinvo sung kha rawl voikhat ei ah a thlen. 17 Nan hngalh bantuk in a hnuah thluachuah co a duh tikah hlawt a rak si. A pa lung i thlen ding in mitthli he fakpi in a nawl nain san a tlai ti lo.

18 Nannih cu tawngh khawhmi tlang, mei a alh thluahmahmi tlang ah a kalmi nan si lo. Cuka ah cun minmei nakpipi le muihnak hna a um i thlichia a hrang. 19 Muko tum thawng le biachim thawng kha an theih i a theimi hna nih an sinah zei bia hmanh chim ti lo ding in an rak nawl. 20 “Saram an si hmanh ah cuka tlang kha an tawngh ahcun lung in thi lakin cheh an si lai” timi nawlbia kha an ṭih tuk. 21 An hmuhmi cu ṭih a nun tuk caah Moses hmanh nih “Ka ṭih tuknak ah a ther in ka ther” tiah a ti. 22 Nannih tu cu Zion Tlang ah, a nungmi Pathian khuapi a simi vancung Jerusalem ah, vancungmi tampi an i pumhnak ah, 23 vancung ah an min ṭial a simi fater hna i Khrihfabu ah, mi vialte Biaceihtu a simi Pathian sinah, thiang thlarau lamhruainak ning in a nung i mitling a hung simi miding mi hna sinah, 24 biakamnak thar i remnak sertu Jesuh sinah le kan cung ah Jesuh thehmi thisen sinah nan kal cang. Jesuh thisen cu Abel thisen nakin a ṭha deuh.

25 Vancung in bia a chimtu aw kha ngaih loin nan um sual nakhnga lo i ralring u. Hlanlio mi hna cu Pathian ralrin peknak kong vawleicung ah a chimtu bia kha an ngaih lo caah dantat an rak si. Cucaah vancung in bia a chimtu aw kha kan ngaih lo ahcun zeitluk in dah dantat kan si chinchin lai! 26 Cu lio caan ah Pathian aw nih vawlei kha a hninh. Asinain atu ah cun “Vawlei lawng si loin van zong voikhat in ka hninh ṭhan lai” tiah bia aa kam. 27 “Voikhat in” timi bia nih hninh khawhmi thil, Pathian nih a ser lomi thil hna cu hloh an si lai ti kha a langhter. Cuticun hninh khawh lomi thil hna cu an hmun lai. 28 Cucaah hninh khawh lomi Pennak pek kan si lai caah velngeihnak kha hmu zungzal hna u sih. Cu velngeihnak thawng in Pathian kha ṭihzahnak le upatnak he a duhmi lam in bia hna u sih. 29 Kan Pathian cu ciam dihlak in a kang khotu mei bantuk a si.