Marka

10 Jesuh cu cuka hmun in a chuah hnuah Jordan Tiva kha a tan i Judea ramri a phan. Mibu cu a sinah an rat ṭhan caah voidang bantuk in a cawnpiak hna. 2 Farasi mi cu Jesuh sinah an ra i hneksak duh ah “Pa pakhat nih a nupi kha mak khawh a si maw?” tiah an hal. 3 “Moses nih zei nawlbia dah aan pek hna?” tiah Jesuh nih a hal hna. 4 Annih nih “Maknak ca ṭial in a nupi kha mak awkah Moses nih nawl a awnh” tiah an leh. 5 Jesuh nih “Nan lung a khon ruang ah Moses nih mah nawlbia kha a ṭialmi a si. 6 A tak ti ahcun ser hramthawknak ah ‘Pathian nih pa le nu kha a ser hna. 7 Cucaah pa nih a nu le a pa kha a kaltak hna lai i, 8 cu hna pahnih cu pumkhat an si lai,’ pahnih si ti loin pumkhat an si cang. 9 Cucaah Pathian nih a fonhmi hna cu ahohmanh nih ṭhen hna hlah seh” tiah a ti hna. 10 Inn ah an um lioah a zultu hna nih mah kong kha an hal ṭhan. 11 Jesuh nih “A nupi kha a ma i nu dang a ṭhimi cu a zuangzammi, a nupi cung ah sualnak a tuahmi a si. 12 A vapa kha a ṭhen i midang he aa ṭhiummi nu zong a zuangzammi a si” tiah a ti hna.

13 Mi nih an fale cung ah a kut chuanter an duh caah Jesuh sinah an ratpi hna. Asinain a zultu pawl nih an thlauh hna. 14 Mah kha Jesuh nih a hmuh tikah a thin a hung i “Ngakchia cu ka sinah ra ko hna seh, kham hna hlah u. Pathian Pennak cu hi ngakchia bantuk mi hna ta pei a si cu. 15 Biatak kaan chimh hna lai, Pathian Pennak kha hi ngakchia nih a cohlan bantuk in nan cohlan lo ahcun Pennak chung ah nan lut kho lai lo” tiah a ti hna. 16 Mah hnuah ngakchia kha a pom hna, an cung ah a kut a chuan i thluachuahnak a pek hna.

17 Jesuh cu lam i a kal lioah mi pakhat cu a rak tli, a hmaiah a khuk aa bil i “A Ṭhami Saya, zungzal nunnak hmuh awkah zeidah ka tuah lai?” tiah a hal. 18 Jesuh nih “Zeicahdah a ṭhami saya tiah na ka auh? Pathian dah ti lo cu a ṭhami ahohmanh an um lo. 19 ‘Lai va nawng hlah, va zuangzam hlah, fir hlah, lih chim hlah, mi va hleng hna hlah, na nu le na pa kha upat hna’ timi nawlbia hna kha na hngalh ko cu ta” tiah a ti. 20 Mah mipa nih “Saya, mah nawlbia vialte cu ka ngakchiat lioin ka rak tuahmi an si” tiah a ti. 21 Jesuh nih dawtnak lungthin he a zoh i “Na tuah dingmi pakhat a um rih: Na ngeihmi thilri hna kha va zuar law misifak va ṭhen hna, cuticun van ah chawva na ngei lai, mah hnuah rak ka zul” tiah a ti. 22 Mah bia a theih tikah a rum ngaimi mah pa cu ngaihchia ngai in a kal.

23 Pawngkam kha a zoh hnuah Jesuh nih a zultu hna kha “Mirum mi caah Pathian Pennak chung luh cu a har tuk lai!” tiah a ti hna. 24 Mah bia ruang ah a zultu hna cu an khuaruah a har. Mah tikah Jesuh nih a zultu hna kha “Ka fale, Pathian Pennak chung luh cu a har tuk! 25 Pathian Pennak chung ah mirum mi luh nakin cun ṭhimkaa chung i kalauk luh hmanh a fawi deuh lai” tiah a ti. 26 A zultu hna cu an khuaruah a har chinchin i “Cutin a si ahcun khamhnak a hmu khomi an um ti lai maw?” tiah an hal.* 27 Jesuh nih a hei zoh hna i “Minung caah cun mah hihi a si kho lo. Pathian caah cun cutin a si lo. Pathian caah cun zeizong vialte hi a si kho ko” tiah a ti hna. 28 Peter nih “Zeizong vialte kha kaltak in na hnu kan in zulh cang” tiah a ti tikah, 29 Jesuh nih “Biatak kaan chimh hna lai, ka min le thawngṭha ruang ah nulepa, u le nau, fale, inn le lo pakhatkhat a kaltakmi paoh cu, 30 tuchan ah nulepa, u le nau, fale, inn le lo a let 100 in a hmuh lai i hremnak zong a ing lai. Cun a ra dingmi chan* zong ah zungzal nunnak a hmuh rih lai. 31 Asinain hmasa bik a simi mi tampi cu hmanung bik an si lai, hmanung bik a simi cu hmasa bik an si lai” tiah a ti.

32 Jerusalem khualei kainak lam ah Jesuh cu an hmaiah a rak phanh cang caah a zultu pawl cu an khuaruah a har. Asinain a rak zul vemi midang tu nih cun an ṭih. Atu tan zong ah Jesuh nih lamkaltu 12 lawng kha a auh hna i a ton dingmi thil kong kha hitin a chimh hna: 33 “Atu Jerusalem khua ah kan kal lai, mi Fapa cu tlangbawi upa hna le phungbia cawnpiaktu hna kut ah chanh a si lai. Thihdan pek awkah sualphawt a si lai. Miphun dang hna kut ah chanh a si lai. 34 Nihchuak capo ah an saih lai, fung in an tuk lai, an cil an chak lai i an thah lai, asinain nithum hnuah a nung ṭhan lai.”

35 Zebedi fapa pahnih Jeim le Johan cu Jesuh sinah an ra i “Saya, kan in halmi hi kan tuahpiak law kan duh” tiah an ti. 36 Jesuh nih “Zeidah kan tuahpiak seh ti nan ka duh?” tiah a hal hna. 37 “Na Pennak ah na orhlei ah pakhat, na kehlei ah pakhat ṭhutnak nawl kan pe” tiah an hal. 38 Asinain Jesuh nih “Nan ka halmi hi nan hngal lo. Ka din laimi hrai* kha nan ding kho lai maw, ka in laimi tipil tah nan ing kho lai maw?” tiah a hal hna. 39 Annih nih “Kan tuah khawh ko lai” tiah an leh. Mah tikah Jesuh nih “Ka din dingmi hrai cu nan din ko lai, ka in dingmi tipil zong nan in ko lai. 40 Asinain ka orhlei le ka kehlei ah ahodah a ṭhu lai ti cu keimah nih biachahnak nawl ka ngei lo. Ka Pa lawng nih bia a chah te lai” tiah a ti hna.

41 Mah kong kha a dang zultu pahra nih an theih tikah Jeim le Johan cung ah an thin a hung. 42 Jesuh nih a auh hna i “Vawlei uktu hna nih an ukmi kha an lal hnawh tawn hna i hruaitu hna zong nih an nawlngeihnak an langhter tawn ti kha nan hngalh ko. 43 Nannih tu cu cutin nan si awk a si lo. Mingan si a duhmi cu sinum a si awk a si. 44 Nan lakah pakhatnak si a duhmi cu nan dihlak sal a si awk a si. 45 Mi Fapa zong midang rian fial awkah a ra lo, midang rianṭuanpiak in mi tampi tlanhnak caah a nunnak pek awkah a ra” tiah a ti.

46 Mah hnuah Jeriko khua chung ah an lut. Jesuh cu a zultu hna le mibu he Jeriko khua in an chuah ṭhan lioah Timaeus fapa Bartimu tiah auhmi a mit a caw i mi thil a halmi pa cu lamkam ah a rak ṭhu. 47 Nazareth khuami Jesuh a si ti kha a theih tikah “David Fapa Jesuh, ka zaangfah ko!” tiah a au. 48 Mi nih dai tein um awkah an sik nain “David Fapa, ka zaangfah ko!” tiah fakpi in a au chinchin. 49 Cucaah Jesuh cu a dir i “Hei au u” tiah a ti tikah mi nih “Ṭih hlah! Tho tuah; aan auh khih” tiah an ti. 50 Mah tikah a puan kha a hlonh i khulrang in Jesuh sinah a kal. 51 Jesuh nih “Zeidah ka tuahpiak seh ti na ka duh?” tiah a hal. Mitcaw pa nih “Saya, ka mit khua ka hmuhter” tiah a nawl. 52 Jesuh nih “Va ṭin cang. Na zumhnak nih na mit khua a hmuhter cang” tiah a ti. Mah tikah khua a hun hmuh colh i Jesuh hnu kha a zulh.