Lamkaltu

19 Korin khua i Apollo a um lioah Paul cu rili he aa hlatnak hmun hna ah a tlawng i Efesa khua a phan. Cuka ah zultu cheukhat a hmuh hna i, 2 “Zumtu nan hung si lioah khan thiang thlarau nan hmu maw?” tiah a hal hna tikah “Thiang thlarau kong cu kan theih bal ṭung lo” tiah an leh. 3 “Cu a si ah, zei bantuk tipilnak dah nan in kun?” tiah a hal hna tikah “Johan tipilnak” tiah an leh. 4 “Johan nih mi kha i ngaihchihnak langhternak caah tipil a pek hna i a hnuah a ra dingmi Jesuh kha zumh awkah a cahtak hna” tiah Paul nih a ti. 5 Mah bia an theih tikah Bawipa Jesuh min in tipil an ing. 6 Cun Paul nih an cung ah a kut a chuan tikah thiang thlarau an hmu. Holh dangdang in an holh i profet bia kha an chim. 7 An dihlak ah pa 12 hrawng an si.

8 Paul cu pumhnak inn ah a lut i thla thum chung Pathian Pennak kong kha ralṭha tein a chim, cun an lung a pem khawh nakhnga aa zuam. 9 Asinain a lung a khongmi mi cheukhat nih an zum duh lo i Bawipa Lam kong kha mizapi hmaiah an thangchiat. Cucaah Paul cu cuka in a chuak i zultu pawl kha aa kalpi hna. Cun Tirannas biachimnak khaan ah nifate phung a chim. 10 Cutin kumhnih chung phung a chim caah Asia peng ah a ummi Judah mi le Greek mi vialte nih Bawipa bia cu an theih.

11 Pathian nih Paul hmang in khuaruahhar thil pakhat hnu pakhat a tuah. 12 Cun Paul nih a hmanmi thlan hnawhnak le a puan hmanh kha mizaw sin an put tikah an zawtnak a dam i khuachia zong nih a chuahtak hna. 13 Khuachia ṭhawl ah khuazakip i a vakmi Judah mi cheukhat zong nih Bawipa Jesuh min in khuachia ṭhawl awkah an i zuam ve. “Paul nih a chimmi Jesuh min in chuak kaan ti” tiah an ti hna. 14 Judah tlangbawi upa a simi Skeva fapa pasarih zong nih cutin an tuah ve. 15 Asinain khuachia nih “Jesuh cu ka hngalh i Paul zong ka hngalh, nannih cu ahodah nan si?” tiah a leh hna. 16 Khuachia aa hrolhmi pa nih cun a zuan hnawh hna, a ṭhuat hna i pakhat hnu pakhat a tei hna caah hnipuan loin an hma he cun cuka inn in an zam. 17 Mah kong cu Efesa khua ah a ummi Judah mi le Greek mi vialte nih an theih dih i an ṭih tuk. Bawipa Jesuh min zong a thang chin lengmang. 18 Zumtu a hung simi tampi cu an ra i an tuahsernak kha an i phuang dih. 19 Camh a thiammi tampi zong nih an cauk kha an rak put i zapi hmaiah mei in an khangh hna. Mah cauk man kha an tuak tikah ngun tangka 50,000 man a si kha an hun hngalh. 20 Cuticun Jehovah* bia cu a karh chin lengmang i a ṭhawng chin lengmang.

21 Mah thil pawl a can dih hnuah Paul nih Masidonia ram le Akhaia ram ka tlawn dih in Jerusalem khua zong ah ka tlawng lai tiah bia a khiah. “Cuka ka phak hnuah Rom khua zong ka kal hrimhrim lai” tiah a ti. 22 Cucaah amah a bawmtu pahnih Timote le Erastas kha Masidonia ram ah a thlah hna. Amah tu cu Asia peng ah caan tlawmpal a taangta.

23 Mah lio caan ah Bawipa Lam kong ah buaibainak nganpi a hung chuak. 24 Ngun sosertu Demetrias timi pa nih Artemis biakinn he aa lomi biakinn lem tete kha ngun in a ser hna caah a hawile sosertu pawl zong a miak tampi an hmu. 25 Demetrias nih anmah le a dang sosertu kha a pumh hna i “Ka hawile hna, mah kan rian thawng in tangka tampi kan hmuhmi hi nan hngalh ko. 26 Atu Paul timi pa nih minung kut in sermi pathian hna cu pathian taktak an si lo tiah a ti i Efesa khua lawng ah si loin Asia peng dihlak ah a ummi mi tampi kha a zumhter hna caah an lung aa let dih cang, mah kha nan hmuh i nan theih ko. 27 Mi nih kan rian an thangchiat lai leng ah a liannganmi khuazingnu Artemis biakinn zong zei ah an rel ti lai lo ti phan awk a um. Asia peng dihlak lawng ah si loin vawleicung pumpi ah a ummi hna nih an biakmi khuazingnu Artemis i a lianngannak zong a ṭumchuk cang lai” tiah a ti. 28 Mah bia an theih tikah mi cu an thin a hung tuk i “Efesa khuami hna biakmi Artemis cu a liannganmi khuazingnu a si!” tiah an au.

29 Cuticun an khuapi ning in aa tuai-ur dih, mi cu puai tuahnak hmun ah an tli i Paul i a khualtlawnṭi hawi, Masidonia rammi Gaius le Aristarkas kha an hnuhchih hna. 30 Paul zong mibu sinah va luh a duh nain zultu hna nih an thlauh. 31 Puai le lentecelhnak tlangtlatu a simi a hawikom cheukhat hmanh nih Paul kha a chung ah luh hrimhrim lo ding in bia an cah i an nawl. 32 Mi cheukhat nih bia pakhat an aupi, a cheu nih bia dang kha an aupi caah aa pummi hna cu an i tuai-ur dih i tam deuh nih cun zei ruang ah kan i pumh ti awk hmanh an hngal lo. 33 Mi nih Alexander kha mibu lakin an chuah i Judah mi zong nih hmailei ah an nam. Alexander nih a kut a zaoh hna i runvennak bia chim awkah aa tim. 34 Anih cu Judah mi a si ti kha an hngalh tikah an dihlak in “Efesa khuami hna biakmi Artemis cu a liannganmi khuazingnu a si!” tiah suimilam pahnih chung awkhat tein an au.

35 A donghnak ah khua bawi nih mibu kha a daihter hna i “Efesa khuami hna, Efesa khua cu a liannganmi khuazingnu Artemis biakinn cawngtu le van in a tlami milem biakinn cawngtu a si ti kha a hngal lomi aho tal an um maw? 36 Cucu al khawh a si lo caah lungdai tein um ko u law ruat setsai loin zeihmanh tuah hlah u. 37 Hika i nan rak chuahpimi hna hi Artemis biakinn hna a chuttu zong an si lo i kan khuazingnu a thangchiattu zong an si lo. 38 Cucaah Demetrias le a hawile ngun sosertu pawl nih taza cuai an duhmi pakhatkhat a um ahcun biaceihnak zung chuah ni a um ko i peng uktu zong an um ko, mah tikah pakhat le pakhat taza i cuai te ko hna seh. 39 A dang chuahpi nan duhmi a um rih ahcun khuami zapi pumhnak ah biachah awk a si lai. 40 Nihin i mibu i tuai-urnak kong ah a ruang zei set chim awk kan ngeih lo caah ram hnahnawhnak a chuahpitu tiin sualpuh kan fawite” tiah a ti. 41 Cutin a chim dih hnuah mi kha a ṭinter hna.