Pumpak Baibal Hlathlainak—A Biapi Ah Chiah Ding
1 Zei thil dah a biapi ah kan chiah lai? Jehovah he naih tein i pehtlaihnak ṭha ngeih peng hi a si. Mah pehtlaihnak a ṭhat chin nakhnga pumpak Baibal hlathlainak nih tampi a kan bawmh. Atu chan ah ṭha tein ruahnak le pumpak Baibal hlathlainak caah a caan tampi a pemi hi an tlawm te. Pathian Bia hmaan tein kan rel lo a si ahcun, vawlei lungthin le pumsa duhnak doh awkah thazaang ngei lo tiangin kan tha a der kho.
2 Pathian Bia kha Duh: Pathian tinhmi kong kan hngalhka ah tam deuh in hngalh kan rak duh. Asinain a caan a hung rauh tikah thlaraulei kan rawl ṭamnak cu a tlawm deuh men lai. Thlarau rawl “duh” tuk a herh men lai. (1 Pit. 2:2) Cu bantuk duhnak kha zeitindah ṭhanter khawh a si?
3 Na duhtukmi rawl cu a rim na theih leh cangka in ei na duh ko lai. Caan tawite pumpak Baibal hlathlainak kan tuah tikah thlaraulei ah kha bantuk khan a si ko. Thlarau rawl tlawmte einak in a thukmi biatak ei awkah kaa a hung thaw men lai. Hlathlainak in hmuhmi lungsinak hi Jehovah Bia hlathlai deuh awkah thazaang petu a si kho.
4 Na ca ah a Ṭha Bik Rian Tuah Tawnmi Ngeih: A cheu nih pumpak Baibal hlathlainak kha zanlei sang dihlak ah an tuah. A cheukhat nih cun mah tluk khan a caan a sau lo nain atu le tu in an tuah. Zinglei ah na lung a luh deuh a si ahcun zing rawl ei hlan ah hlathlainak tuah ding bia na khiah men lai. Zanlei ah naa hliphlau deuh a si ahcun ih hlan ah tuah na duh men lai. Zei bantuk a si hmanh ah, na ca ah a ṭha bikmi caan ah hmaan tein hlathlainak tuah kha a herh.
5 Pumpak Baibal hlathlainak tuah ding thapek a si tikah rian a tam tiah kan i phetchem men lai. Asinain kan zapi in kan caan kha zeitindah kan hman kha i chek awk a herh. Nifate TV hmai ah a caan ka hmang dih maw? Tuah ka duhmi rian cheukhat kha hlawt duhnak ka ngei maw? A caan zeitindah kan hman ṭha tein tuaktannak thawngin pumpak Baibal hlathlainak caah nifate a caan tlawmpal hman khawh a si kha kan hmuh ko lai.—Efe. 5:15, 16.
6 Pathian Bia kha lungthin pek in hlathlai hi a herh ngaingai. Hlathlainak tuah lioah thil dang tuah pah cu ṭhat-hnemnak a tlawm. Ei pah, radio ngaih pah asiloah TV zoh pah buin hlathlainak kan tuah a si ahcun kan lung ah a lut lai lo. (1 Tim. 4:15) Cucaah lung a vaivuanhtermi thil kha hrial a herh.—ဓမ္မအမှုကျောင်း cauk, cahmai 27-8 zoh.
7 Baibal nih a kan cawnpiakmi kha teimak tein nifate hlathlai hi a biapi tuk. Zeicahtiah cuti tuahnak cu Jehovah pekmi lamhruainak hmuhnak lam a si caah a si. Seh in nammi cahmai i biatak kha na lungthin chung a luh nakhnga hmuitinh ngei. A caan zeitluk in a tawi hmanh ah caan ṭha hmuh fate thlaraulei kong kha rel law ṭha tein ruat.—Deut. 6:6-8; Kol. 1:9, 10.